ທ່ານ ໄມໂຄ ຣອນນິ້ງ ຜູ້ຕາງໜ້າອົງການ USAID ປະຈໍາລາວ ມອບມຸ້ງເຄືອບຢາ 70.000 ດາງເຄື່ອງກວດເລືອດເພື່ອບົ່ງມະຕິໄຂ້ມາລາເຣຍແບບໄວ 450.000 ຊຸດ ແລະ ຢາຕ້ານມາລາເຣຍ 200.000 ຊຸດ ໃຫ້ທ່ານ ດຣ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ວັນທີ 10 ກັນຍາ 2021 ຢູ່ນະຄອນຫຼວງວຽງຈັນ.
ເຄື່ອງຊ່ວຍເຫຼືອດັ່ງກ່າວ ຈະຖືກຈັດສົ່ງໄປໃຫ້ໂຮງໝໍ ແລະ ສຸກສາລາຕ່າງໆໃນຊຸມຊົນທີ່ຍັງມີການແຜ່ລະບາດຂອງພະຍາດມາລາເຣຍ ເຊິ່ງຈະຊ່ວຍໃຫ້ລັດຖະບານລາວມີອຸປະກອນພຽງພໍໃນການຮອງຮັບກັບການລະບາດຂອງພະຍາດມາລາເຣຍໃນໄລຍະທີ່ມີການລະບາດຂອງພະຍາດໂຄວິດ-19.
ທ່ານ ໄມໂຄ ຣອນນິ້ງ ກ່າວວ່າ: ການຊ່ວຍເຫຼືອດ້ານສາທາລະນະສຸກ ແມ່ນໃຈກາງສໍາຄັນພາຍໃຕ້ການຮ່ວມມືແບບກວມລວມ ລາວ-ອາເມຣິກາ ເຊິ່ງປີນີ້ ຄົບຮອບ 5 ປີ ສ ອາເມຣິກາມີຄວາມພາກພູມໃຈທີ່ໄດ້ສືບຕໍ່ເຮັດວຽກຮ່ວມກັບ ສປປ ລາວ ແລະ ເຈົ້າໜ້າທີ່ສາທາລະນະສຸກຂອງພວກເຮົາ ໂດຍຜ່ານການປະກອບສ່ວນອຸປະກອນຮັກສາຊີວິດເຫຼົ່ານີ້ ເພື່ອປ້ອງກັນການແຜ່ລະບາດຂອງພະຍາດມາລາເຣຍ ແລະ ສະໜັບສະໜູນ ສປປ ລາວ ໃນການລົບລ້າງພະຍາດດັ່ງກ່າວໃຫ້ໝົດໄປພາຍໃນປີ 2030.
ການມອບ-ຮັບເຄື່ອງຊ່ວຍເຫຼືອຄັ້ງນີ້ ແມ່ນຕົວຢ່າງການສະໜັບສະໜູນຄັ້ງຫຼ້າສຸດໃນການສະກັດກັ້ນ ແລະ ຄວບຄຸມພະຍາດລະບາດມາລາເຣຍ ມາຮອດປັດຈຸບັນ ອົງການ USAID ໄດ້ໃຫ້ການຊ່ວຍເຫຼືອດ້ານວິຊາການ ອຸປະກອນຫ້ອງທົດລອງ ມອບມຸ້ງຫຼາຍກວ່າ 800.000 ດາງ ເຄື່ອງກວດເລືອດເພື່ອບົ່ງມະຕິໄຂ້ມາລາເຣຍແບບໄວຫຼາຍກວ່າ 1 ລ້ານຊຸດ ແລະ ໃຫ້ຢາປິ່ນປົວພະຍາດມາລາເຣຍ ລວມມູນຄ່າຫຼາຍກວ່າ 4,73 ລ້ານໂດລາສະຫະລັດ ໃນໄລຍະ 10 ຜ່ານມາ ນອກນີ້ ການຮັບມືກັບພະຍາດໂຄວິດ-19 ສ ອາເມຣິກາ ຍັງໄດ້ໃຫ້ການຊ່ວຍເຫຼືອມູນຄ່າ 10 ລ້ານໂດລາສະຫະລັດ ນັບແຕ່ຕົ້ນປີ 2020 ເປັນຕົ້ນມາ ແລະ ເດືອນກໍລະກົດ 2021 ສ ອາເມຣິກາຍັງໄດ້ຊ່ວຍເຫຼືອວັກຊີນປ້ອງກັນພະຍາດໂຄວິດ-19 ຍີ່ຫໍ້ Johnson & Johnson ຫຼາຍກ່ວາ 1 ລ້ານໂດສ ໃຫ້ ສປປ ລາວ ເຊິ່ງເປັນສ່ວນໜຶ່ງຂອງເຈດຈຳນົງຂອງທ່ານ ໂຈ ໄບເດີນ ປະທານາທິບໍດີ ສ ອາເມຣິກາ ເພີ່ອລົບລ້າງພະຍາດໂຄວິດ-19 ໃນ ສປປ ລາວ ນອກນີ້ ສ ອາເມຣິກາ ຍັງໄດ້ໃຫ້ການຊ່ວຍເຫຼືອລ້າໃນໄລຍະ 10 ປີຜ່ານມາໃນຫຼາຍຂົງເຂດ ອົງການ USAID ໄດ້ສະໜັບສະໜູນ ສປປ ລາວ ໃນການສູ້ກັບພະຍາດລະບາດຕ່າງໆ ປັບປຸງວຽກງານແມ່ ແລະ ເດັກ ແລະ ຊ່ວຍເຫຼືອໃຫ້ຜູ້ທີ່ມີຄວາມພິການ ຕື່ມອີກ..
# ຂ່າວ & ພາບ : ສະບາໄພ