ພິທີມອບ-ຮັບໜ້າທີ່ລະຫວ່າງຜູ້ອຳນວຍການໃຫຍ່ຕະຫຼາດຫຼັກຊັບລາວ (ຕລຊລ) ຜູ້ເກົ່າ ທ່ານ ອ໊ອດ ພົນຊຽງດີ ແລະ ຜູ້ໃໝ່ ທ່ານນາງ ສາຍສະໝອນ ຈັນທະຈັກ ຈັດຂຶ້ນວັນທີ 10 ກັນຍາ 2021 ທີ່ສຳນັກງານ ຕລຊລ ນະຄອນຫຼວງວຽງຈັນ ມີທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ (ທຫລ) ຮອງປະທານ ຜູ້ປະຈໍາການ ຄຄຊ ບັນດາຄະນະນໍາ ຜູ້ຕາງໜ້າກົມ ທຫລ ຕລຊລ ບໍລິສັດຈົດທະບຽນ ບໍລິສັດຫຼັກຊັບ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ຕະຫຼາດຫຼັກຊັບລາວ ສ້າງຕັ້ງຂຶ້ນວັນທີ 10 ຕຸລາ 2010 ແລະ ໄດ້ເປີດໃຫ້ມີການຊື້-ຂາຍວັນທີ 11 ມັງກອນ 2011 ໃນ 8 ເດືອນປີ 2021 ໄດ້ສໍາເລັດຈົດທະບຽນພັນທະບັດລັດຖະບານປະເພດດຸ່ນດ່ຽງງົບປະມານ ແລະ ຄັງເງິນສະກຸນເງິນກີບ 43 ຊຸດ ລວມມູນຄ່າ 994,94 ຕື້ກີບ ແລະ ສະກຸນເງິນໂດລາ 75 ຊຸດ ລວມມູນຄ່າ 30,6 ລ້ານໂດລາສະຫະລັດ ໃນທ້າຍເດືອນສິງຫາ 2021 ດັດຊະນີ ຕລຊລ ປິດຢູ່ທີ່ 636,90 ຈຸດ ເພີ່ມຂຶ້ນ 60,43 ຈຸດ ຫຼື 10,48% ທຽໃສ່ໄລຍະດຽວກັນປີຜ່ານມາ ມູນຄ່າການຊື້-ຂາຍຫຼັກຊັບຢູ່ທີ່ 79,05 ຕື້ກີບ ຫຼຸດລົງ 44,13% ໃນນີ້ການຊື້-ຂາຍຮຸ້ນລາຍໃຫຍ່ ກວມເອົາ 55,9% ຂອງມູນຄ່າການຊື້-ຂາຍທັງໝົດ ຈໍານວນບັນຊີຫຼັກຊັບຮອດທ້າຍເດືອນສິງຫາ 2021 ມີທັງໝົດ 16.752 ບັນຊີ ເພີ່ມຂຶ້ນ 4,2% ທຽບໃສ່ໄລຍະດຽວກັນປີຜ່ານມາ (ໃນນັ້ນ ມີນັກລົງທຶນພາຍໃນ 79,42% ແລະ ນັກລົງທຶນຕ່າງປະເທດ 20,58% ຂອງຈໍານວນບັນຊີທັງໝົດ) ສໍາເລັດຂຶ້ນທະບຽນ ແລະ ຝາກພັນທະບັດລັດຖະບານໃນລະບົບພັນທະບັດ ຕລຊລ 118 ຊຸດ (ສະກຸນເງິນກີບ 43 ຊຸດ ແລະ ສະກຸນເງິນໂດລາ 75 ຊຸດ) ລວມມູນຄ່າ 994,94 ຕື້ກີບ ແລະ 30.602.600 ໂດລາ ສໍາເລັດຊໍາລະດອກເບ້ຍພັນທະບັດລັດຖະບານ ລວມມູນຄ່າ 103,93 ຕື້ກີບ ແລະ 874.202,06 ໂດລາ ສຳເລັດຊໍາລະເງິນປັນຜົນຮຸ້ນໃຫ້ບໍລິສັດຈົດທະບຽນ 5 ບໍລິສັດ ລວມມູນຄ່າທັງໝົດ 120,23 ຕື້ກີບ.
ໂອກາດນີ້ ທ່ານ ສອນໄຊ ສິດພະໄຊ ໄດ້ເນັ້ນໃຫ້ຄະນະອໍານວຍການ ຕະຫຼອດຮອດພະນັກງານ ຕລຊລ ຕ້ອງເອົາໃຈໃສ່ວຽກງານວິຊາສະເພາະ ເປັນຕົ້ນຕິດຕາມການຂາຍຮຸ້ນຂອງບໍລິສັດຈົດທະບຽນ ແລະ ການອອກ ຈໍາໜ່າຍພັນທະບັດລັດຖະບານໃນ ຕລຊລ ໃຫ້ໄດ້ຮັບປະສິດທິຜົນສູງ ເອົາໃຈໃສ່ແກ້ໄຂສະພາບຄ່ອງຂອງ ຕລຊລ ໂດຍປະສານສົມທົບກັບ ສຄຄຊ ເອົາໃຈໃສ່ຄຸ້ມຄອງ ແລະ ພັດທະນາລະບົບໄອທີຂອງ ຕລຊລ ໃນປັດຈຸບັນໃຫ້ມີຄວາມຮັບປະກັນການເຄື່ອນໄຫວຕົວຈິງ ແລະ ໃຫ້ມີປະສິດທິພາບສູງຍິ່ງຂຶ້ນ.
# ຂ່າວ – ພາບ : ສົມສະຫວັນ