ວັນທີ 17 ສິງຫາ 2021 ທີ່ສໍານັກງານໃຫຍ່ບໍລິສັດ ວຽງຈັນໂລຈິສຕິກພາກ ຈໍາກັດ ທີ່ຕັ້ງຢູ່ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ ໄດ້ມີພິທີຕ້ອນຮັບການມາຢ້ຽມຢາມໂຄງການທ່າບົກທ່ານາແລ້ງ ແລະ ເຂດໂລຈິສຕິກນະຄອນຫຼວງວຽງຈັນ ຂອງທ່ານ ອິມ ມູຮົງ ເອກອັກຄະລັດຖະທູດ ສ ເກົາຫຼີ ປະຈຳລາວ ພ້ອມຄະນະ ຖືກຕ້ອນຮັບໂດຍທ່ານ ອາລຸນແກ້ວ ກິດຕິຄຸນ ປະທານກໍາມະການຍຸດທະສາດ ແລະ ການວາງແຜນ ບໍລິສັດ ພີທີແອວໂຮນດິ້ງ ຈໍາກັດ ທ່ານ ສີລາ ວຽງແກ້ວ ຮອງປະທານກຳມະການບໍລິຫານການຄ້າ ແລະ ລະບຽບການບໍລິສັດ ພີທີແອວໂຮນດິ້ງ ຈໍາກັດ ພ້ອມພະນັກງານຫຼັກແຫຼ່ງບໍລິສັດ ວຽງຈັນໂລຈິສຕິກພາກ ຈໍາກັດ.
ໃນພິທີ ທ່ານ ອາລຸນແກ້ວ ກິດຕິຄຸນ ໄດ້ກ່າວສະແດງຄວາມຍິນດີຕ້ອນຮັບທ່ານທູດພ້ອມຄະນະທີ່ມາຢ້ຽມຢາມ ເບິ່ງຄວາມຄືບໜ້າການພັດທະນາໂຄງການທ່າບົກທ່ານາແລ້ງ ແລະ ເຂດໂລຈິສຕິກນະຄອນຫຼວງວຽງຈັນ ພ້ອມທັງລາຍງານຫຍໍ້ກ່ຽວກັບ 4 ໂຄງການໃຫຍ່ຂອງບໍລິສັດ ວຽງຈັນໂລຈິສຕິກພາກ ທີ່ໄດ້ຮັບການສໍາປະທານນໍາລັດຖະບານລາວຄື:
- ໂຄງການທ່າບົກທ່ານາແລ້ງ ແລະ ເຂດໂລຈິສຕິກນະຄອນຫຼວງວຽງຈັນ
- ໂຄງການທ່າເຮືອຫວຸ້ງອ່າງ ສສ ຫວຽດນາມ
- ໂຄງການເສັ້ນທາງລົດໄຟລາວ-ຫວຽດນາມ
- ໂຄງການສ້າງໂຮງງານຜະລິດໄຟຟ້າດ້ວຍຖ່ານຫີນ 2000 MV ທີ່ແຂວງຄໍາມ່ວນ
ພ້ອມທັງຍົກໃຫ້ເຫັນການພັດທະນາໂຄງການມາຮອດປັດຈຸບັນ ເປັນຕົ້ນ ເຂດພັດທະນາການສົ່ງເສີມການຄ້າ ຄວາມຄືບໜ້າຂອງໂຄງການຈຸດເຊື່ອມຕໍ່ຂົວມິດຕະພາບລາວ-ໄທແຫ່ງທີ 1 ໂຄງການຂົວຂ້າມທາງລົດໄຟຂົວທີ 1 ໂຄງການປະຕູໂຂງທ່າບົກທ່ານາແລ້ງ ໂຄງການກໍ່ສ້າງຫ້ອງການ VLP ໂຄງການກໍ່ສ້າງເຂດຕຶກຫ້ອງການ ໂຄງການກໍ່ສ້າງເຂດສາງສິນຄ້າ ໂຄງການກໍ່ສ້າງຂົວຂ້າມທາງລົດຄອນເທັນເນີ ການຈັດກອງປະຊຸມ ຈັດສຳມະນາ ເຊັນສັນຍາ ການລົງມາຢ້ຽມຢາມໂຄງການຂອງຄະນະຜູ້ແທນການນຳຂັ້ນສູງຂອງລາວ ຄະນະຜູ້ແທນທູດ ແລະ ອົງການຈັດຕັ້ງສາກົນປະຈຳລາວ ໃນໄລຍະຜ່ານມາ ແລະ ຍົກໃຫ້ເຫັນຜົນປະໂຫຍດທີ່ລັດຖະບານລາວຈະໄດ້ຮັບຈາກປະເທດທີ່ບໍ່ມີຊາຍແດນຕິດຈອດກັບທະເລແຕ່ໃຫ້ມີການເຊື່ອມຈອດໂດຍທາງ ແລະ ອື່ນໆ.
ການລົງມາຢ້ຽມຢາມໂຄງການຂອງທ່ານທູດພ້ອມຄະນະຄັ້ງນີ້ ໄດ້ຮັບການຮັບຟັງການລາຍງານສະພາບຄວາມເປັນມາ ແລະ ຄວາມຄືບໜ້າຂອງການພັດທະນາໂຄງການ ໂດຍສະເພາະການພັດທະນາໂຄງການທ່າບົກທ່ານາແລ້ງທີ່ມີຄວາມຄືບໜ້າຫຼາຍກວ່າ 80% ແລະ ຈະສຳເລັດທ້າຍປີນີ້ ພ້ອມນີ້ ຄະນະຍັງໄດ້ໄປຢ້ຽມຢາມສະຖານທີ່ກໍ່ສ້າງໂຄງການ ເຊິ່ງການຢ້ຽມຢາມຄັ້ງນີ້ ທ່ານທູດໄດ້ສະແດງຄວາມຂອບໃຈມາຍັງບໍລິສັດທີ່ໃຫ້ການຕ້ອນຮັບຢ່າງອົບອຸ່ນ ແລະ ພ້ອມທີ່ຈະສະໜັບສະໜູນຊຸກຍູ້ສົ່ງເສີມໃຫ້ໂຄງການມີຜົນສຳເລັດ.
ຂ່າວ-ພາບ : ສົມສະຫວັນ