ໂດຍເຫັນໄດ້ຄວາມສຳຄັນຂອງຂະແໜງການສຶກສາ ໃນການສ້າງບຸຄະລາກອນໃຫ້ມີຄວາມຮູ້ຄວາມສາມາດເພື່ອຮັບໃຊ້ປະເທດຊາດບ້ານເມືອງ ໂດຍສະເພາະ ເຂດການສຶກສາຊົນນະບົດຫ່າງໄກສອກຫຼີກ ໃຫ້ມີເຄື່ອງອຸປະກອບຮັບໃຊ້ວຽກງານການສຶກສາ ດັ່ງນັ້ນ ບໍລິສັດ ລັດວິສາຫະກິດຫວຍພັດທະນາ ກະຊວງການເງິນ ໄດ້ປະກອບສ່ວນສະໜັບສະໜູນຄອມພິວເຕີຕັ້ງໂຕະ ແລະ ເຄື່ອງພິມໃຫ້ຫ້ອງການສຶກສາທິການ ແລະ ກີລາເມືອງພູຄູນ 1 ຊຸດ ແລະ ໂຮງຮຽນປະຖົມສຶກສາຄູນຜາເງິນ 1 ຊຸດ ເມືອງພູຄູນ ແຂວງຫຼວງພະບາງ ລວມມູນຄ່າທັງໝົດ 12.780.000 ກີບ.
ພິທີມອບ ຈັດຂຶ້ນວັນທີ 11 ສິງຫາ 2021 ທີ່ສໍານັກງານໃຫຍ່ບໍລິສັດລັດວິສາຫະກິດຫວຍພັດທະນາ ບ້ານທົ່ງຂັນຄຳ ເມືອງຈັນທະບູລີ ນະຄອນຫຼວງວຽງຈັນ ກ່າວມອບໂດຍທ່ານນາງ ແກ້ວຄູນມີ ກົມມະເມືອງ ຮອງຜູ້ອຳນວຍການບໍລິສັດ ລັດວິສາຫະກິດຫວຍພັດທະນາ ແລະ ຮັບໂດຍທ່ານ ລຽບ ມະນີຈັນ ຕາງໜ້າຫ້ອງການສຶກສາທິການ ແລະ ກີລາເມືອງພູຄູນ ມີພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ໂອກາດນີ້ ທ່ານ ລຽບ ມະນີຈັນ ໄດ້ສະແດງຄວາມຂອບໃຈມາຍັງມາຄະນະອຳນວຍການ ກໍຄືບໍລິສັດ ລັດວິສາຫະກິດຫວຍພັດທະນາ ທີ່ເຫັນໄດ້ຄວາມສຳຄັນວຽກງານການສຶກສາເຂດຊົນນະບົດ ທີ່ໄດ້ປະກອບສ່ວນຊ່ວຍເຫຼືອເຄື່ອງອຸປະກອນທີ່ຈຳເປັນເພື່ອຮັບໃຊ້ເຂົ້າໃນວຽກງານບໍລິຫານພາຍໃນຫ້ອງການສຶກສາເມືອງ ແລະ ວຽກງານບໍລິຫານພາຍໃນໂຮງຮຽນຄັ້ງນີ້ ແລະ ຫວັງຢ່າງຍິ່ງວ່າ ໃນໂອກາດໜ້າ ຈະໄດ້ຮັບການຊ່ວຍເຫຼືອຈາກບໍລິສັດຕື່ມອີກ ເພື່ອພ້ອມກັນພັດທະນາວຽກງານການສຶກສາຢູ່ເຂດຊົນນະບົດໃຫ້ເທົ່າທຽມກັບຕົວເມືອງ ແລະ ພາກພື້ນໃນອະນາຄົດຂ້າງໜ້າ.
ຂ່າວ-ພາບ : ສົມສະຫວັນ