ພິທີມອບ-ຮັບໂຄງການຊົນລະປະທານອ່າງເກັບນໍ້ານໍ້າແກບ ເມືອງຊະນະຄາມ ແຂວງວຽງຈັນ ລະຫວ່າງບໍລິສັດ ແພງພອນກໍ່ສ້າງ ຂົວທາງ ແລະ ຊົນລະປະທານ ຈຳກັດຜູ້ດຽວ ກັບກົມຊົນລະປະທານ ກະຊວງກະສິກຳ ແລະ ປ່າໄມ້ ແລະ ພະແນກກະສິກຳ ແລະ ປ່າໄມ້ແຂວງວຽງຈັນ ຈັດຂຶ້ນວັນທີ 13 ສິງຫາ 2021 ກ່າວມອບໂດຍທ່ານນາງ ແພງພອນ ຂັນທະຍົງທອງ ປະທານບໍລິສັດ ແພງພອນກໍ່ສ້າງ ຂົວທາງ ແລະ ຊົນລະປະທານ ຈຳກັດຜູ້ດຽວ ແລະ ກ່າວຮັບໂດຍທ່ານນາງ ບຸນທຽນ ວົງໄກສອນ ຮອງຫົວໜ້າກົມຊົນລະປະທານ ຈາກນັ້ນ ໄດ້ມອບຕໍ່ໃຫ້ພະແນກກະສິກຳ ແລະ ປ່າໄມ້ແຂວງວຽງຈັນ ແລະ ຫ້ອງການກະສິກຳ ແລະ ປ່າໄມ້ເມືອງຊະນະຄາມ ເປັນຜູ້ຄຸ້ມຄອງນໍາໃຊ້ຕໍ່ໄປໃຫ້ເກີດປະໂຫຍດສູງສຸດ ມີທ່ານ ສະໝານ ວິເສດຍະພົງ ເຈົ້າເມືອງຊະນະຄາມ ຕາງໜ້າກົມກ່ຽວຂ້ອງກະຊວງການເງິນ ກະຊວງແຜນການ ແລະ ການລົງທຶນ ອຳນາດການປົກຄອງບ້ານ ແລະ ປະຊາຊົນເຂົ້າຮ່ວມ.
ໂຄງການກໍ່ສ້າງຊົນລະປະທານອ່າງເກັບນໍ້ານໍ້າແກບ ຕັ້ງຢູ່ບ້ານນາແກບ ເມືອງຊະນະຄາມ ແຂວງວຽງຈັນ ຈຸດຫົວງານຕັ້ງຫ່າງຈາກບ້ານນາແກບ 2,2 ກິໂລແມັດ ຫ່າງຈາກຕົວເມືອງຊະນະຄາມປະມານ 37,5 ກິໂລແມັດ ໂດຍແມ່ນກົມຊົນລະປະທານເປັນເຈົ້າຂອງໂຄງການ ບໍລິສັດ ແພງພອນກໍ່ສ້າງ ຂົວທາງ ແລະ ຊົນລະປະທານ ຈຳກັດຜູ້ດຽວ ເປັນຜູ້ຮັບເໝົາກໍ່ສ້າງ ແລະ ບໍລິສັດ ວັນຈະເລີນຊັບ ວິສະວະກຳທີ່ປຶກສາ ຈຳກັດ ເປັນທີ່ປຶກສາ ໂຄງການມີມູນຄ່າທັງໝົດ 86,22 ຕື້ກີບ ໂດຍແມ່ນງົບປະມານຂອງລັດ ເລີ່ມກໍ່ສ້າງວັນທີ 3 ພະຈິກ 2017 ແລະ ສຳເລັດວັນທີ 12 ສິງຫາ 2021 ສຳເລັດກ່ອນແຜນການ 1 ປີ ໂຄງການມີຫົວງານເປັນເຂື່ອນດິນສູງ 23 ແມັດ ກວ້າງ 8 ແມັດ ແລະ ຍາວ 185,20 ແມັດ ບໍລິມາດນໍ້າໃນອ່າງນໍ້າຕາຍ 292.227 ແມັດກ້ອນ ບໍລິມາດນໍ້າໃຊ້ 2.079.822 ແມັດກ້ອນ ບໍລິມາດນໍ້າປົກກະຕິ 2.375.367 ແມັດກ້ອນ ແລະ ບໍລິມາດນໍ້ານອງສູງ 2.569.475 ແມັດກ້ອນ ມີຄອງເໝືອງ 5 ເສັ້ນ ມີຄວາມຍາວທັງໝົດ 14,97 ກິໂລແມັດ ເຊິ່ງໂຄງການດັ່ງກ່າວ ເປັນໂຄງການໜຶ່ງທີ່ນອນຢູ່ໃນເຂດພູພຽງ ມີເນື້ອທີ່ທັງໝົດ 530 ເຮັກຕາ ແລະ ເນື້ອທີ່ປູກພືດລະດູແລ້ງ 120 ເຮັກຕາ ລັກສະນະຂອງເນື້ອທີ່ນາມີຄວາມຄ້ອຍລຽບໄປຕາມສາຍນໍ້າແກບ ແລະ ສາຍນໍ້າມີ້ຈຶ່ງມີຄວາມເໝາະສົມໃນການສົ່ງນໍ້າໄຫຼເອງ ຈຸດປະສົງ ແລະ ເປົ້າໝາຍຂອງໂຄງການເພື່ອຮັບປະກັນໃນການສະໜອງນໍ້າໃຫ້ແກ່ການປູກຝັງ-ລ້ຽງສັດໃນເຂດພື້ນທີ່ໂຄງການໃຫ້ໄດ້ເຮັດການຜະລິດກະສິກຳໄດ້ທັງສອງລະດູຄື:ລະດູແລ້ງ ແລະ ລະດູຝົນ ໂດຍສະເພາະແມ່ນເຂດພື້ນທີ່ 3 ບ້ານຄື: ບ້ານນາແກບ ບ້ານນາກາງ ແລະ ບ້ານນາມອຍ ປະກອບມີ 636 ຫຼັງຄາເຮືອນ ເພື່ອຊອກຫາທາງອອກໃນການຈັດສັນອາຊີບຄົງທີ່ໃຫ້ປະຊາຊົນເຂດໂຄງການ ໃນການບໍລິຫານຄຸ້ມຄອງຊັບພະຍາກອນນໍ້າແບບປະສົມປະສານ ແລະ ເພື່ອໃຫ້ປະຊາຊົນຜູ້ທີ່ຈະໄດ້ຮັບຜົນປະໂຫຍດຈາກໂຄງການມີທາງເລືອກໃໝ່ ແລະ ມີສ່ວນຮ່ວມໃນການວາງແຜນພັດທະນາ ແລະ ປັບປຸງຊີວິດການເປັນຢູ່ໃຫ້ມີຄວາມໝັ້ນຄົງ ນອກນີ້ ໂຄງການຍັງລົບລ້າງຄວາມທຸກຍາກຂອງປະຊາຊົນໃນຂົງເຂດທີ່ນອນໃນເຂດໂຄງການໃຫ້ຫຼຸດພົ້ນອອກຈາກບ້ານທຸກຍາກຂອງເມືອງຊະນະຄາມ ສ້າງພື້ນຖານເສດຖະກິດຂອງປະຊາຊົນບັນດາເຜົ່າໃນເຂດໂຄງການໃຫ້ເຂັ້ມແຂງ ເພີ່ມເນື້ອທີ່ການຜະລິດ ຍົກສູງສະມັດຕະພາບການຜະລິດເຂົ້ານາແຊງໃຫ້ໄດ້ 4,5 ໂຕຄນຕໍ່ເຮັກຕາ ແລະ ນາປີໃຫ້ໄດ້ 4 ໂຕນຕໍ່ເຮັກຕາ ສົ່ງເສີມການປູກພືດ ແລະ ລ້ຽງສັດເປັນສິນຄ້າຂອບເຂດເມືອງຊະນະຄາມໃນອະນາຄົດ ແລະ ຈັດຕັ້ງກຸ່ມການຜະລິດ ກຸ່ມຜູ້ນຳໃຊ້ນໍ້າຂອງປະຊາຊົນໃນເຂດໂຄງການໃຫ້ມີຄວາມເຂັ້ມແຂງ.
ໃນໂອກາດດັ່ງກ່າວນີ້ ອຳນາດການປົກຄອງ ແລະ ປະຊາຊົນ 3 ບ້ານທີ່ໄດ້ຮັບຜົນປະໂຫຍດຈາກໂຄງການ ຍັງໄດ້ຈັດພິທີບາສີສູ່ຂວັນຕາມປະເພນີໃຫ້ປະທານບໍລິສັດແພງພອນກໍ່ສ້າງ ຂົວທາງ ແລະ ຊົນລະປະທານ ຈຳກັດຜູ້ດຽວ ພ້ອມແຂກທີ່ເຂົ້າຮ່ວມງານ ເພື່ອສະແດງຄວາມຮູ້ບຸນຄຸນຕໍ່ພັກ-ລັດ ແລະ ບໍລິສັດຜູ້ຮັບເໝົາກໍ່ສ້າງໂຄງການທີ່ມີຕໍ່ປະຊາຊົນຕື່ມອີກ.
ຂ່າວ-ພາບ : ສົມສະຫວັນ