ທ່ານ ດຣ ບຸນນາໄລ ສີຫາກຸນ ຫົວໜ້າຫ້ອງການສາທາລະນະສຸກ ເມືອງຫາດຊາຍຟອງ ນະຄອນຫຼວງວຽງຈັນ ໄດ້ໃຫ້ສຳພາດ ກ່ຽວກັບການສັກຢາວັກຊິນປ້ອງກັນພະຍາດໂຄວິດ-19 ໃນຮອບທີ 3 ໃຫ້ກັບພໍ່ແມ່ປະຊົນພາຍໃນເມືອງ ໃນວັນທີ 12 ສິງຫາ 2021 ຢູ່ທີ່ໂຮງໝໍຫາດຊາຍຟອງ ເຊີ່ງໄດ້ເລີ່ມຈັດຕັ້ງປະຕິບັດແຕ່ວັນທີ 9-20 ສິງຫາ 2021 ມາຮອດປັດຈຸບັນແມ່ນສັກໄດ້ເກືອບ 10.000 ຄົນ ການຈັດຕັ້ງປະຕິບັດ ແມ່ນໄດ້ຈັດເປັນສອງລະບົບ ຄື: ໃຫ້ຜູ້ທີ່ຕ້ອງການຮັບວັກຊິນໄດ້ລົງທະບຽນຜ່ານອຳນາດການປົກຄອງແຕ່ລະບ້ານຂອງຕົນ ແລະ ສາມາດລົງທະບຽນຜ່ານທາງອອນລາຍກໍໄດ້ ເຊີ່ງມີຄວາມສະດວກສະບາຍ ເພື່ອໃຫ້ທຸກຄົນສາມາດເຂົ້າເຖິງການບໍລິການໄດ້ງ່າຍຂື້ນ ນອກນັ້ນ ຍັງຊ່ວຍຫຼຸດຜ່ອນຄວາມແອອັດ ແລະ ບໍ່ສ່ຽງຕໍ່ການຕິດເຊື້ອ.
ສຳລັບວັກຊິນທີ່ສັກໃນຮອບ 3 ປະກອບມີ 3 ຊະນິດ ໄດ້ແກ່: ຈອນສັນ ແອນ ຈອນສັນ ແອສຕຣາເຊເນກາ ແລະ ຊີໂນຟາມ ການຈັດຕັ້ງປະຕິບັດ ມາຮອດວັນທີ 12 ສິງຫາ 2021 ສາມາດສັກວັນຊິນ ຈອນສັນ ແອນ ຈອນສັນ ໄດ້ 3.137 ຄົນ ແອສຕ້ຣາເຊເນກາ ເຂັມທີ 1 ສັກໄດ້ 3.723 ຄົນ ແລະ ເຂັມທີ 2 ໄດ້ 1.232 ຄົນ ສ່ວນຊີໂນຟາມ ແມ່ນເປີດສັກແຕ່ເຂັມ 2 ເພື່ອເກັບເລັມຄືນຜູ້ທີ່ຍັງບໍ່ທັນໄດ້ສັກ ແມ່ນໄດ້ 260 ຄົນ.
ພາຍຫຼັງສັກວັກຊິນຮອບທີ 3 ສຳເລັດຕາມກຳນົດ ຮອດວັນທີ 20 ສິງຫາ 2021 ທາງໂຮງໝໍເມືອງຫາດຊາຍຟອງ ກໍ່ຈະໄດ້ສືບຕໍ່ ເປີດລົງທະບຽນຢູ່ຂັ້ນບ້ານ ແລະ ທາງອອນລາຍ ເພື່ອສັກວັກຊິນໃນຮອບຕໍ່ໄປ ໃຫ້ຄົບທັງ 60 ບ້ານ ທັງນີ້ກໍ່ເພື່ອຍົກອັດຕາການສັກວັກຊິນປ້ອງກັນໂຄວິດ-19 ໃພໍ່ແມ່ປະຊາຊົນຢູ່ເມືອງຫາດຊາຍຟອງ ໃຫ້ສູງກວ່າ 50% ຂອງປະຊາກອນພາຍໃນເມືອງ ແລະ ເພື່ອຊ່ວຍຫຼຸດຜ່ອນຈາກການຕິດເຊຶ້ອພະຍາດໂຄວິດ-19 ໃນຊຸມຊົນໃຫ້ໄດ້ຫຼາຍເທົ່າທີ່ຈະຫຼາຍໄດ້.
# ຂ່າວ-ພາບ : ນັກຂ່າວຫ້ອງການ ຖວທ ເມືອງຫາດຊາຍຟອງ