ບໍລິສັດ ພູເບ້ຍ ມາຍນິງ ສະໜັບສະໜູນຖັງຂີ້ເຫຍື້ອ 120 ຖັງ ໃຫ້ກະຊວງສາທາລະນະສຸກ ເພື່ອນໍາໃຊ້ເຂົ້າໃນວຽກງານຕ້ານພະຍາດໂຄວິດ-19 ໂດຍພິທີມອບ-ຮັບ ໄດ້ຈັດຂຶ້ນວັນທີ 12 ສິງຫາ 2021 ຢູ່ກະຊວງສາທາລະນະສຸກ ເຊິ່ງມອບໂດຍທ່ານ ຈັນເພັງ ບຸນນະຜົນ ປະທານບໍລິສັດ ພູເບ້ຍ ມາຍນິງ ແລະ ຮັບໂດຍທ່ານ ດຣ ສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກ ມີພະນັກງານກ່ຽວຂ້ອງ ເຂົ້າຮ່ວມ.
ຖັງຂີ້ເຫຍື້ອເຫຼົ່ານີ້ ໄດ້ມາດຕະຖານຕາມຄໍາແນະນໍາຂອງອົງການອະນາໄມໂລກ ສໍາລັບສຸຂະອະນາໄມໃນການກໍາຈັດຂີ້ເຫຍື້ອໃນໄລຍະການແຜ່ລະບາດຂອງພະຍາດໂຄວິດ-19 ເຊິ່ງຈະຖືກນໍາສົ່ງໃຫ້ສູນຈໍາກັດບໍລິເວນ ແລະ ສະຖານທີ່ທາງການແພດຂອງລັດຖະບານທີ່ກໍາລັງຈໍາກັດບໍລິເວນ ແລະ ປິ່ນປົວຄົນເຈັບທີ່ຕິດເຊື້ອພະຍາດໂຄວິດ-19 ຢູ່ແຂວງບໍລິຄໍາໄຊ ຈໍາປາສັກ ຄໍາມ່ວນ ສາລະວັນ ສະຫວັນນະເຂດ ແລະ ນະຄອນຫຼວງວຽງຈັນ.
ນັບຕັ້ງແຕ່ເລີ່ມມີການລະບາດຂອງພະຍາດໂຄວິດ-19 ບໍລິສັດ ພູເບ້ຍ ມາຍນິງ ໄດ້ສືບຕໍ່ຊອກຫາທຸກວິທີທາງທີ່ຈະສາມາດສະໜັບສະໜູນຄວາມພະຍາຍາມຂອງລັດຖະບານລາວ ໃນການຕໍ່ສູ້ກັບການລະບາດຂອງພະຍາດດັ່ງກ່າວ ການສະໜອງຖັງຂີ້ເຫຍື້ອໃນຄັ້ງນີ້ ເປັນອີກຕົວຢ່າງໜຶ່ງຂອງບໍລິສັດ ໃນການຮ່ວມມືກັບລັດຖະບານລາວ ເພື່ອປ້ອງກັນການລະບາດຂອງພະຍາດໂຄວິດ-19 ໃນລາວ.
ທ່ານ ຈັນເພັງ ບຸນນະຜົນ ໄດ້ເນັ້ນກ່ຽວກັບຄວາມມຸ່ງໝັ້ນຢ່າງຕໍ່ເນື່ອງຂອງບໍລິສັດ ໃນການປົກປ້ອງສຸຂະພາບຂອງຄົນລາວ ບໍລິສັດຈະສືບຕໍ່ໃຫ້ການສະໜັບສະໜູນລັດຖະບານລາວ ໃນໄລຍະການລະບາດຂອງພະຍາດໂຄວິດ-19 ສຸຂະພາບ ແລະ ຄວາມປອດໄພຂອງພະນັກງານແພດໝໍຢູ່ດ່ານໜ້າຂອງລາວ ແມ່ນມີຄວາມສໍາຄັນທີ່ສຸດ ການສະໜອງຖັງຂີ້ເຫຍື້ອໃຫ້ເພີ່ມເຕີມເຫຼົ່ານີ້ ຈະເຮັດໃຫ້ຂີ້ເຫຍື້ອທີ່ມີໃນລະຫວ່າງການປິ່ນປົວ ແລະ ກວດວິເຄາະຄົນເຈັບທີ່ຕິດເຊື້ອໂຄວິດ-19 ໄດ້ຮັບການຈັດການ ຈັດເກັບ ແລະ ຂົນໄປເຂດຖິ້ມຂີ້ເຫຍື້ອຕ່າງໆຢ່າງປອດໄພ ເພື່ອຫຼຸດຜ່ອນຄວາມສ່ຽງທີ່ເຊື້ອພະຍາດຈະຕິດໃສ່ຄົນເຈັບ ຫຼື ພະນັກງານແພດໝໍ.
# ຂ່າວ & ພາບ : ສະບາໄພ