ລັດຖະມົນຕີຢ້ຽມຢາມໂຄງການທ່າບົກທ່ານາແລ້ງ

ວັນທີ 23 ກໍລະກົດ 2021 ທີ່ສໍານັກງານໃຫຍ່ບໍລິສັດ ວຽງຈັນໂລຊິດສະຕິກພາກ ຈໍາກັດ ໄດ້ມີພິທີຕ້ອນຮັບການມາຢ້ຽມຢາມເພື່ອຊຸກຍູ້ການກະກຽມຄວາມພ້ອມໃຫ້ແກ່ໂຄງການທ່າບົກທ່ານາແລ້ງ ແລະ ເຂດໂລຊິດສະຕິກນະຄອນຫຼວງວຽງຈັນຂອງທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະ ເທດ ພ້ອມຄະນະຖືກຕ້ອນຮັບໂດຍທ່ານ ຈັນທອນ ສິດທິໄຊ ປະທານບໍລິສັດ ວຽງຈັນໂລຊິດສະຕິກພາກ ຈຳກັດ ທ່ານ ອາລຸນແກ້ວ ກິດຕິຄຸນ ປະທານກໍາມະການຍຸດທະສາດ ແລະ ການວາງແຜນບໍລິສັດ ພີທີແອວໂຮນດິ້ງ ຈໍາກັດ ທ່ານ ສີລາ ວຽງແກ້ວ ຮອງປະທານກຳມະການບໍລິຫານການຄ້າ ແລະ ລະບຽບການບໍລິສັດ ພີທີແອວໂຮນດິ້ງ ຈໍາກັດ ພ້ອມດ້ວຍພະນັກງານຫຼັກແຫຼ່ງບໍລິສັດ.

ໃນການມາຢ້ຽມຢາມໂຄງການທ່າບົກທ່ານາແລ້ງ ແລະ ເຂດໂລຊິດສະຕິກນະຄອນຫຼວງວຽງຈັນທີ່ຕັ້ງຢູ່ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນຂອງບໍລິສັດ ວຽງຈັນໂລຊິດສະຕິກພາກ ຈຳກັດຄັ້ງນີ້ທ່ານລັດຖະມົນຕີກະຊວງການຕ່າງປະເທດ ພ້ອມຄະນະໄດ້ຮັບຟັງການລາຍງານສະພາບຄວາມເປັນມາ ແລະ ການລົງທຶນພັດທະນາໂຄງການຂອງບໍລິສັດ ເນື່ອງຈາກປະເທດລາວເປັນປະເທດທີ່ບໍ່ມີຊາຍແດນຕິດກັບທະເລ ແລະ ໂຄງການນີ້ຈະເປັນໂຄງການໜຶ່ງໃນການພັດທະນາເສດຖະກິດຂອງລາວໃນອະ ນາຄົດເນື່ອງຈາກທ່າບົກທ່ານາແລ້ງ ແລະ ເຂດໂລຊິດສະຕິກເປັນຈຸດບໍລິການການຂົນສົ່ງເຊື່ອມຕໍ່ລະ ຫວ່າງປະເທດໃນພາກພື້ນ ປັດຈຸບັນການກໍ່ສ້າງໂຄງການຂອງບໍລິສັດສຳເລັດ 80% ເປັນຕົ້ນກຳລັງເລັ່ງກໍ່ສ້າງພື້ນຖານໂຄງລ່າງເພື່ອຮອງຮັບການພັດທະນາໂຄງການຕໍ່ໄປເປັນຕົ້ນສ້າງເສັ້ນທາງ ເດີ່ນ ປະຕູໂຂງ ອາ ຄານ ແລະ ອື່ນໆທີ່ເປັນສິ່ງອຳນວຍຄວາມສະດວກຕ່າງໆໃນການດຳເນີນໂຄງການແມ່ນມີຄວາມຄືບ ໜ້າໃກ້ຈະສຳເລັດ ແລະ ຄາດວ່າຈະສຳເລັດຕາມແຜນການທີ່ວາງໄວ້.

ໂອກາດນີ້ທ່ານລັດຖະມົນຕີໄດ້ສະແດງຄວາມຍ້ອງຍໍຊົມເຊີຍມາຍັງຄະນະບໍລິຫານ ແລະ ພະນັກງານບໍລິສັດທີ່ເປັນນັກທຸລະກິດລາວຜູ້ເຮັດແທ້ທຳຈິງ ຂ້າພະເຈົ້າໄດ້ມາເຫັນໂຄງການຕົວຈິງແລ້ວມີຄວາມພາກ ພູມໃຈທີ່ໂຄງການນີ້ໄດ້ເກີດຂຶ້ນ ແລະ ໃນອະນາຄົດຈະສາມາດຕອບສະໜອງຄວາມມຸ້ງໝາກປາດຖະໜາຂອງພັກ-ລັດຖະບານດ້ານການພັດທະນາພື້ນຖານໂຄງລ່າງໃຫ້ມີຄວາມຈະເລີນ ມີລະບົບການຂົນສົ່ງທີ່ທັນສະໄໝເຊື່ອມຕໍ່ກັບຫຼາຍປະເທດຈະເຮັດໃຫ້ປະເທດລາວເຮົາມີລາຍຮັບເພີ່ມຂຶ້ນຈາກການເກັບຄ່າບໍລິການຕ່າງໆທີ່ປິ່ນອ້ອມ.