ວັນທີ 16 ກໍລະກົດ 2021 ສປປ ລາວ ໄດ້ຮັບການຈັດສົ່ງວັກຊີນກັນພະຍາດໂຄວິດ-19 ຄັ້ງໃໝ່ ເຊິ່ງແມ່ນການບໍລິຈາກຂອງສະຫະລັດອາເມຣິກາ ໂດຍຜ່ານ COVAX Facility ເຊິ່ງແມ່ນການຮ່ວມມືກັນລະຫວ່າງອົງການພັນທະມິດຮ່ວມມືດ້ານນະວັດຕະກໍາເພື່ອຮັບມືກັບພະຍາດລະບາດ (CEPI) ອົງການກາວີ ເຊິ່ງເປັນພັນທະມິດວັກຊີນ ແລະ ອົງການອະນາໄມໂລກ (WHO) ໂດຍມີອົງການອຸຍນິເຊັບເປັນຄູ່ຮ່ວມງານສຳຄັນໃນການຈັດສົ່ງ ໃນນັ້ນ ປະກອບມີວັກຊີນ Johnson & Johnson/Janssen (J&J/Janssen) 1.008.000 ໂດສ໌ ອັນນີ້ແມ່ນສ່ວນໜຶ່ງຂອງການປະກອບສ່ວນຂອງສະຫະລັດອາເມຣິກາ ຕໍ່ຄວາມພະຍາຍາມຂອງທົ່ວໂລກ ທີ່ພວມດຳເນີນການຢ່າງຕໍ່ເນື່ອງ ເພື່ອຢຸດຕິການລະບາດຂອງພະຍາດ ແລະ ເປັນການສະໜັບສະໜູນເປົ້າໝາຍຂອງ ສປປ ລາວ ທີ່ຈະສັກວັກຊີນກັນພະຍາດໃຫ້ໄດ້ 50% ຂອງປະຊາກອນໃນທ້າຍປີ 2021 ນີ້.
ຈາກການໄດ້ຮັບວັກຊີນຈຳນວນ 1.008.000 ໂດສ໌ ເຊິ່ງເປັນການຊ່ວຍເຫຼືອໂດຍກົງຈາກປະຊາຊົນອາເມຣິກາໃຫ້ແກ່ ສປປ ລາວ ຈະເຮັດໃຫ້ ລັດຖະບານລາວ ສາມາດຕອບສະໜອງການປ້ອງກັນການຕິດເຊື້ອໄວຣັສໃຫ້ແກ່ປະຊາຊົນ 1 ລ້ານກວ່າຄົນ ຫຼື 14% ຂອງປະຊາກອນທັງໝົດ.
# ຂ່າວ & ພາບ : ຂັນທະວີ