ກອງບັນຊາການທະຫານນະຄອນຫຼວງວຽງຈັນ (ນວ) ຈັດພິທີປ່ອຍປາ ເນື່ອງໃນໂອກາດວັນອະນຸຮັກ ແລະ ຄຸ້ມຄອງສັດນ້ຳ-ສັດປ່າແຫ່ງຊາດ (13 ກໍລະກົດ) ທັງເປັນການລະນຶກວັນຄ້າຍວັນເກີດຂອງປະທານ ສຸພານຸວົງ ຜູ້ນຳທີ່ແສນເຄົາລົບຮັກ ຄົບຮອບ 112 ປີ ຂຶ້ນວັນທີ 13 ກໍລະກົດ 2021 ຢູ່ກອງບັນຊາການດັ່ງກ່າວ ໂດຍມີທ່ານ ພັນເອກ ບຸນເຈີ ຄຳມະວົງ ຫົວໜ້າຫ້ອງພະລາທິການ ກອງບັນຊາການທະຫານ ນວ ມີຄະນະພັກ ອົງການ 5 ຫ້ອງ ພະແນກການ ພະນັກງານ-ນັກຮົບ ເຂົ້າຮ່ວມ.
ທ່ານ ພັນໂທ ທອງບາ ສຸກກະເສີມ ຫົວໜ້າພະແນກຜະລິດ ກອງບັນຊາການທະຫານ ນວ ກ່າວວ່າ: ພວກເຮົາໄດ້ຈັດຕັ້ງປະຕິບັດການປ່ອຍປາຂຶ້ນທຸກໆປີ ໂດຍອີງໃສ່ສະພາບ ແລະ ເງື່ອນໄຂຕົວຈິງ ການຜະລິດລູກປາແມ່ນຜະລິດໄດ້ຕາມຄາດໝາຍທີ່ວາງໄວ້ ໃຫ້ເປັນຮູບປະທຳ ແລະ ເປັນຜົນປະໂຫຍດສ່ວນລວມຂອງກົມກອງ ສະເພາະປີ 2021 ສາມາດຜະລິດລູກປາໄດ້ 135.000 ໂຕ ລາຄາ 120 ກີບ ສະເລ່ຍມູນຄ່າ 16.200.000 ກີບ ໄດ້ຜະລິດເປັນປາຮາມປ່ອຍກ່ອນ 60 ກິໂລ ມູນຄ່າ 600.000 ກີບ ສໍາລັບປາທີ່ນຳມາປ່ອຍໃນຄັ້ງນີ້ລວມມີປາສະລິດ ປານິນ ປາປາກ ປາລາຮູ່ ປາມະນີກ່ານ ແລະ ປານວນຈັນ 300 ກິໂລ ລວມມູນຄ່າ 24.100.100 ກີບ.
ການຈັດຕັ້ງພິທີປ່ອຍປາຄັ້ງນີ້ ເພື່ອສ້າງຄວາມເຂັ້ມແຂງດ້ານວຽກງານລ້ຽງດູທັບ ເພື່ອຕອບສະໜອງຊີ້ນປາແກ້ໄຂຊີວິດການເປັນຢູ່ໃຫ້ນາຍ ແລະ ພົນທະຫານຂອງກົມກອງ ສ້າງເງື່ອນໄຂເພິ່ງຕົນເອງ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ຕາມທ່າແຮງບົ່ມຊ້ອນຂອງກົມກອງ ສ້າງໃຫ້ມີລາຍຮັບ ສາມາດຕອບສະໜອງໄດ້ໃນການດຳລົງຊີວິດປະຈຳວັນ ກົມກອງລວມໝູ່ ທັງເປັນການປູກຈິດສຳນຶກຂອງພະນັກງານ-ນັກຮົບພາຍໃນກົມກອງ ເຫັນໄດ້ຄວາມໝາຍຄວາມສຳຄັນຂອງວັນດັ່ງກ່າວຢ່າງເລິກເຊິ່ງ ເພື່ອພ້ອມກັນປົກປັກຮັກສາອະນຸຮັກສັດນ້ຳ-ສັດປ່າໃຫ້ເພີ່ມຂຶ້ນ ແລະ ມີຄວາມຍືນຍົງ ທັງເປັນການສ້າງຂະບວນການພາຍໃນກົມກອງໃຫ້ມີບັນຍາກາດຟົດຟື້ນຕື່ມອີກ.
# ຂ່າວ & ພາບ: ສະບາໄພ