ວັນທີ 7 ກໍລະກົດ 2021 ຫ້ອງການກະສິກຳ ແລະ ປ່າໄມ້ເມືອງຫາດຊາຍຟອງ ຮ່ວມກັບພະແນກກະສິກຳ-ປ່າໄມ້ ນະຄອນຫຼວງວຽງຈັນ (ນວ) ແລະ ບໍລິສັດກົນຈັກເພື່ອການກະເສດ ໄດ້ສາທິດວິທີການປັກດຳເຂົ້ານາປີດ້ວຍເຄື່ອງຈັກ ໃຫ້ກັບຂະບວນການປູກເຂົ້າຕາມທິດຫັນເປັນທັນສະໄໝ ເພື່ອຊ່ວຍໃນການຫຼຸດຜ່ອນແຮງງານຊາວນາໃຫ້ໄດ້ 10% ຕໍ່ປີ ປະຢັດຕົ້ນທຶນ ສ້າງຄວາມສະດວກສະບາຍໃຫ້ແກ່ຊາວກະສິກອນຜູ້ຜະລິດ ແລະ ສາມາດປະຍັດເວລາ ເຮັດໃຫ້ການປູກເຂົ້ານາປີ 2021 ທ່ວງທັນຕາມລະດູການ ໂດຍແນໃສ່ເປັນການຕອບສະໜອງທາງດ້ານການຜະລິດເປັນສິນຄ້າ ຮັບປະກັນທາງດ້ານສະບຽງອາຫານ ເຮັດໃຫ້ຄອບຄົວກຸ້ມກິນ ສ້າງລາຍຮັບໃຫ້ຫຼາຍຂື້ນ ແລະ ມີຄວາມເຂັ້ມແຂງທາງດ້ານເສດຖະກິດທີ່ດີຍີ່ງຂຶ້ນເລື້ອຍໆ ຈັດຂື້ນທີ່ສູນຜະລິດແນວພັນເຂົ້າ ບ້ານໜອງແຫ້ວ ມີທ່ານ ຫຼ້າສາຍ ນວນທາສິງ ຫົວໜ້າພະແນກກະສິກຳ ແລະ ປ່າໄມ້ ນວ ທ່ານ ຖາວອນ ສີຫາມາຍາ ຮອງເຈົ້າເມືອງຫາດຊາຍຟອງ ພ້ອມດ້ວຍຫົວໜ້າສູນຜະລິດແນວພັນເຂົ້າໜອງແຫ້ວ ຄະນະວິຊາການ ບໍລິສັດ ແລະ ຊາວກະສິກອນເຂົ້າຮ່ວມ
ທ່ານ ສຸລິນ ອິນທາທິລາດ ຫົວໜ້າຫ້ອງການກະສິກຳ ແລະ ປ່າໄມ້ ເມືອງຫາດຊາຍຟອງ ໄດ້ກ່າວວ່າ: ການຜະລິດເຂົ້ານາແຊງສົກປີ 2020-2021 ປະຕິບັດໄດ້ 3.700 ເຮັກຕາ ສຳເລັດຕາມແຜນການ ສະມັດຕະພາບໄດ້ 5,12 ໂຕນຕໍ່ເຮັກຕາ ຜົນຜະລິດ 18.944 ໂຕນ ໃນນັ້ນ ເນື້ອທີ່ປັກດຳດ້ວຍກົນຈັກ 500 ເຮັກຕາ ສ່ວນການປູກເຂົ້ານາປີ 2021 ມີເນື້ອທີ່ແຜນການຜະລິດທັງໝົດ 6.050 ເຮັກຕາ ຄາດຄະເນສະມັດຕະພາບໃຫ້ໄດ້ 4,53 ໂຕນຕໍ່ເຮັກຕາ ຄາດຄະເນຜົນຜະລິດ 27.407 ໂຕນ ແຜນການຕົກກ້າ 484 ໂຕນ ເນື້ອທີ່ຈຸດສຸມ 500 ເຮັກຕາ ແຜນການປັກດຳດ້ວຍກົນຈັກ 300 ເຮັກຕາ ແລະ ແຜນການຕົກກ້າປັກດຳດ້ວຍກົນຈັກ 19,5 ໂຕນ ປັດຈຸບັນ ການຜະລິດເຂົ້ານາປີຕົກກ້າສຳເລັດ ນາຫວ່ານປະຕິບັດໄດ້ 3.110 ເຮັກຕາ ນາດຳທົ່ວໄປ 985 ເຮັກຕາ ດຳດ້ວຍກົນຈັກ 80 ເຮັກຕາ ແລະ ນາຢອດ 60 ເຮັກຕາ ລວມເນື້ອທີ່ທັງໝົດ 4.235 ເຮັກຕາ.
# ພາບ – ຂ່າວ: ສົມສະຫວັນ