ເພື່ອຕອບສະໜອງການລ້ຽງປາ ຜະລິດສະບຽງອາຫານເພື່ອເພີ່ງຕົນເອງ ກຸ້ມຕົນເອງ ໃຫ້ມີຢູ່ມີກິນ ອີກທັງເປັນການຊຸກຍູ້ສົ່ງເສີມ ແລະ ອະນຸຮັກສັດນ້ຳ-ສັດປ່າໃຫ້ມີຄວາມອຸດົມສົມບູນ ຍືນຍົງ ໃນວັນປ່ອຍປາແຫ່ງຊາດ 13 ກໍລະກົດ
ດັ່ງນັ້ນ ວັນທີ 30 ມິຖຸນາ 2021 ກອງບັນຊາການ ປກສ ເມືອງຫາດຊາຍຟອງ ນະຄອນຫຼວງວຽງຈັນ ຈຶ່ງຈັດພິທີປ່ອຍປາ ລົງສູ່ໜອງລວມ ທີ່ຄ້າຍຄຸມຂັງ ເຊີ່ງຈຳນວນປາທີ່ນຳມາປ່ອຍ ແມ່ນປາປາກ ຈຳນວນ 5 ພັນໂຕ ເຊີ່ງການເຂົ້າຮ່ວມພິທີປ່ອຍປາ ໂດຍມີທ່ານ ບຸນເພັງ ສີນະວົງພອນ ເຈົ້າເມືອງຫາດຊາຍຟອງ ມີຮອງເຈົ້າເມືອງ ຫົວໜ້າກອງບັຊາການ ປກສ ເມືອງ ພາກສ່ວນກ່ຽວຂ້ອງ ແລະ ນັກທຸລະກິດເຂົ້າຮ່ວມ
ທ່ານ ພັທ ແສງທອງ ເກຶ້ອບຸນລ່ຳ ຫົວໜ້າກອງບັຊາການ ປກສ ເມືອງຫາດຊາຍຟອງ ໄດ້ກ່າວວ່າ ເພື່ອຕອບສະໜອງວັນປ່ອຍປາ ແລະ ວັນອະນຸຮັກສັດນ້ຳ-ສັດປ່າແຫ່ງຊາດທີ່ຈະມາເຖິງ ຕາມກົດໝາຍທີ່ກຳນົດໄວ້ໃນວັນທີ 13 ກໍລະກົດ ເຊີ່ງເຫັນໄດ້ວ່າ ປາ ແລະ ສັດນ້ຳອື່ນ ແມ່ນມີຄວາມສຳຄັນລະດັບຕົ້ນຕໍ ຕໍ່ການດຳລົງຊີວິດປະຈຳວັນຂອງປະຊາຊົນບັນດາເຜົ່າ ເວົ້າລວມເວົ້າສະເພາະ ກໍຄືກອງບັນຊາການ ປກສ ເມືອງຫາດຊາຍຟອງພວກເຮົາ ກໍ່ເຫັນໄດ້ຄວາມສຳຄັນ ເພື່ອເພີ່ມພູນໃນການຜະລິດສະບຽງອາຫານໃຫ້ເພິ່ງຕົ້ນເອງ ກຸ້ມຕົນເອງ ມີຢູ່ມີກິນ ຕາມແນວທາງນະໂຍບາຍຂອງພັກ-ລັດຖະບານ ໂດຍຈຸດສຸມກໍ່ແມ່ນການປູກ ການລ້ຽງ ຜະລິດໃຫ້ຫຼາຍ ແລະ ສາມາດຂາຍເປັນສິນຄ້າ ແລະ ກໍອີງໃສ່ສະພາບໃນປັດຈຸບັນນີ້ ດິນຟ້າອາກາດມີການປ່ຽນແປງ ແຫຼ່ງນ້ຳທຳມະຊາດຫ້ວຍໜອງຄອງບືງນັບມື້ກໍຫຼຸດບົກແຫ້ງລົງ ຈຳນວນປາ ແລະ ສັດນ້ຳອື່ນໆກໍ່ຈະສູນຫາຍຫຼຸດໜ້ອຍວົງເຊັ່ນກັນ
ສະນັ້ນ ການລ້ຽງປາ ກໍ່ແມ່ນວຽກງານໜື່ງທີ່ນອນຢູ່ໃນແຜນການເພື່ອພັດທະນາເສດຖະກິດ-ສັງຄົມຂອງເມືອງຫາດຊາຍຟອງວາງອອກ ເພື່ອຊຸກຍູ້ຕາມເງື່ອນໄຂໃຫ້ມີການທຳການຜະລິດເປັນສິນຄ້າ ແລະ ເພື່ອອະນຸຮັກຮັກສາ ສົ່ງເສີມແນວພັນຂອງປາໃຫ້ຍືນຍົງຕະຫຼອດໄປ ແລະ ທີ່ສຳຄັນ ແມ່ນຢຸດການຫາປາທີ່ບໍ່ຖືກຕ້ອງ ເຊີ່ງຈະເຮັດໃຫ້ປານັ້ນບໍ່ຂະຫຍາຍພັນ ແລະ ກໍ່ຈະ ສູນຫາຍໄປແບບຖາວອນ.
# ຂ່າວ & ພາບ: ສົມສະຫວັນ