ທ່ານ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ຖະແຫຼງຂ່າວປະຈໍາວັນກ່ຽວກັບສະພາບການແຜ່ລະບາດຂອງພະຍາດໂຄວິດ-19 ວັນທີ 26 ພຶດສະພາ 2021 ທີ່ກະຊວງສາທາລະນະສຸກວ່າ:
ວັນທີ 25 ພຶດສະພາ 2021 ໄດ້ເກັບຕົວຢ່າງມາກວດວິເຄາະທັງໝົດ 1.767 ຕົວຢ່າງ ໃນນັ້ນ ກວດພົບຜູ້ຕິດເຊື້ອໃໝ່ 5 ກໍລະນີ ໃນນີ້ ນະຄອນຫຼວງວຽງຈັນ 3 ຄົນ ເປັນຜູ້ສຳຜັດໃກ້ຊິດກັບຜູ້ຕິດເຊື້ອເກົ່າທີ່ຕິດເຊື້ອໃນຊຸມຊົນ ຄື:
- ເພດຍິງ ອາຍຸ 33 ປີ ບ້ານຮ່ອງໄກແກ້ວ ເມືອງຈັນທະບູລີ
- ເພດຊາຍ ອາຍຸ 45 ປີ ບ້ານຮ່ອງໄກແກ້ວ ເມືອງຈັນທະບູລີ
- ແລະ ເພດຍິງ ອາຍຸ 17 ປີ ບ້ານອາມອນ ເມືອງໄຊເສດຖາ
- ສ່ວນອີກ 2 ຄົນ ຢູ່ແຂວງສະຫວັນນະເຂດ ເປັນກໍລະນີນໍາເຂົ້າ ເຊິ່ງກວດພົບເຊື້ອໃນແຮງງານລາວທີ່ກັບຄືນປະເທດຖືກກົດໝາຍ
ສ່ວນວຽກງານການປິ່ນປົວ ແມ່ນມີຜູ້ປິ່ນປົວຫາຍດີທັງໝົດ 1.261 ຄົນ ໃນນີ້ປິ່ນປົວດີໃໝ່ 81 ຄົນ ແລະ ຍັງຕິດຕາມປິ່ນປົວທົ່ວປະເທດທັງໝົດ 620 ຄົນ.
ສໍາລັບສະຖານທີ່ສ່ຽງ ທີ່ຜູ້ຕິດເຊື້ອໄດ້ເດີນທາງໄປທີ່ໄດ້ຖະແຫຼງຂ່າວວັນທີ 25 ພຶດສະພາ
- ມີໂຮງຮຽນປະຖົມສົມບູນຫົວຊຽງ (ວັນທີ 21/5/21)
- ຕະຫຼາດຫົວຂົວ ຕະຫຼາດໂນນຄໍ້ ຕະຫຼາດໂອຊິນ ຕະຫຼາດໂພນຕ້ອງ ແຄັມສ້າງທາງລົດໄຟ ບ້ານດົງຫຼວງ ເມືອງນາຊາຍທອງ ຕະຫຼາດອົດຊີ (ວັນທີ 17/5/21)
- ບໍລິສັດຮຸ່ງອາລຸນ ສາຂາສີໄຄ (ວັນທີ 23/5/21)
- ຫ້ອງແຖວບ້ານໂພນສີນວນ (ຮ່ອມທະນາຄານລາວກໍ່ສ້າງ) ແລະ Lady clinic ບ້ານສີດຳດວນ (ວັນທີ 23/5/21)
. # ຂ່າວ & ພາບ : ຂັນທະວີ