ວັນທີ 17 ເມສາ 2020 ທີ່ສູນປະຕິບັດງານຄະນະສະເພາະກິດ ຄວບຄຸມພະຍາດອັກເສບປອດຈາກເຊື້ອຈຸລະໂຮກສາຍພັນໃໝ່ (COVID-19) ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ທັງເປັນຜູ້ປະຈຳການຄະນະສະເພາະກິດໃຫ້ຮູ້ວ່າ: ການເຝົ້າລະວັງ COVID-19 ຢູ່ ສປປ ລາວ ຮອດ 17 ໂມງແລງຂອງວັນທີ 16 ເມສາ 2020 ມີຈຳນວນຜູ້ເດີນທາງເຂົ້າມາທັງໝົດ 1.110 ຄົນ ຜູ້ເດີນທາງຜ່ານດ່ານລາວ-ໄທ ທັງໝົດ 395 ຄົນ ໃນນັ້ນ ມີແຮງງານລາວທີ່ກັບມາແຕ່ໄທ 5 ຄົນ ເຫຼືອນັ້ນແມ່ນພະນັກງານຂັບລົດບັນທຸກຂົນສິນຄ້າ ຜ່ານດ່ານລາວ-ຈີນ ທັງໝົດ 240 ຄົນ ທັງໝົດແມ່ນພະນັກງານຂັບລົດບັນທຸກຂົນສິນຄ້າ ຜ່ານດ່ານລາວ-ຫວຽດ ທັງໝົດ 475 ຄົນ ທັງໝົດແມ່ນພະນັກງານຂັບລົດບັນທຸກຂົນສິນຄ້າ ແລະ ຜູ້ເດີນທາງຜ່ານສະໜາມບິນ 00 ຄົນ ໃນທຸກດ່ານແມ່ນໄດ້ກວດວັດອຸນຫະພູມຮ່າງກາຍ ແລະ ບໍ່ມີຄົນເປັນໄຂ້.
ສະເພາະວັນທີ 16 ເມສາ 2020 ໄດ້ເກັບຕົວຢ່າງມາກວດທັງໝົດ 10 ຄົນ ໃນນີ້ ມີນະຄອນຫຼວງວຽງຈັນ 8 ຄົນ ແລະ ສະຫວັນນະເຂດ 2 ຄົນ ເຊິ່ງແມ່ນແຮງງານລາວທີ່ກັບມາແຕ່ໄທ ຜົນກວດທັງໝົດ 10 ກໍລະນີ ບໍ່ພົບເຊື້ອ ໝາຍວ່າໃນວັນທີ 16 ເມສາ 2020 ບໍ່ມີກໍລະນີໃໝ່.
ນັບແຕ່ເດືອນມັງກອນ ຮອດວັນທີ 16 ເມສາ 2020 ໄດ້ເກັບຕົວຢ່າງມາກວດທັງໝົດ ມີ 1.291 ຄົນ ກວດພົບເຊື້ອທັງໝົດ 19 ຄົນ (05 ມື້ແລ້ວທີ່ບໍ່ມີຜູ້ຕິດເຊື້ອ) ຈຳນວນຜູ້ສຳຜັດໃກ້ຊິດທັງໝົດທີ່ໄດ້ຕິດຕາມແຕ່ວັນທີ 9 ມີນາ – 16 ເມສາ 2020 ມີທັງໝົດ 313 ຄົນ ໝົດກຳນົດຕິດຕາມທັງໝົດ 260 ຄົນ ຍັງສືບຕໍ່ຕິດຕາມທັງໝົດ 53 ຄົນ ໃນນີ້ ຢູ່ນະຄອນຫຼວງວຽງຈັນ 27 ຄົນ (ໃນນັ້ນ 14 ຄົນ ແມ່ນຕິດຕາມຢູ່ບ້ານ ແລະ ອີກ 13 ຄົນແມ່ນຕິດຕາມຢູ່ໂຮງໝໍ 103) ແຂວງ ໄຊສົມບູນ 26 ຄົນ (ທັງໝົດຕິດຕາມຢູ່ແຄັມພູຄຳ)
ສຳລັບການຕິດຕາມສະຖານທີ່ຈຳກັດບໍລິເວນ ແລະ ຜູ້ຈຳກັດບໍລິເວນຢູ່ເຮືອນໃນທົ່ວປະເທດ ເລີ່ມແຕ່ວັນທີ 20 ມີນາ 2020 ມີແຮງງານລາວຈຳນວນຫຼວງຫຼາຍຈາກປະເທດໄທໄດ້ກັບເຂົ້າມາລາວຕາມຈຸດຜ່ານແດນຕ່າງໆ ມີທັງໝົດ 113.404 ຄົນ ອຳນາດການປົກຄອງໄດ້ມີການຈັດກຽມສະຖານທີ່ຈຳກັດບໍລິເວນໃນແຕ່ລະເມືອງ ກຸ່ມບ້ານທົ່ວປະເທດ ມີ 2.142 ສູນ ເຊິ່ງຮອງຮັບແຮງງານທັງໝົດ 68.534 ຄົນ ແລະ ໄດ້ຈຳກັດບໍລິເວນຕົນເອງຢູ່ເຮືອນ 44.870 ຄົນ ມາຮອດວັນທີ 16 ເມສາ 2020 ທົ່ວປະເທດຍັງມີ 1.483 ສູນ ມີຜູ້ຈຳກັດບໍລິເວນຢູ່ສູນ 41.105 ຄົນ ຈຳກັດບໍລິເວນຢູ່ເຮືອນ 14.298 ຄົນ ເກັບຕົວຢ່າງມາກວດວິເຄາະຫາເຊື້ອ ມີທັງໝົດ 119 ຄົນ ທັງໝົດບໍ່ພົບເຊື້ອ.
ປັດຈຸບັນ ຍັງມີຜູ້ຕິດເຊື້ອນອນຢູ່ໂຮງໝໍ 17 ຄົນ ໃນນີ້ຈຳນວນ 3 ຄົນຢູ່ໂຮງໝໍແຂວງຫຼວງພະບາງ ເຫັນວ່າມີອາການຄົງຕົວຂັ້ນເບົາບາງ ຍັງຕິດຕາມການກວດຫາເຊື້ອເພື່ອຢັ້ງຢືນ ແລະ ຈຳນວນ 14 ຄົນຢູ່ໂຮງໝໍມິດຕະພາບ ທັງໝົດເຫັນວ່າມີອາການເບົາບາງ ແລະ ຍັງຕິດຕາມການກວດຫາເຊື້ອເພື່ອຢັ້ງຢືນ ເຖິງວ່າສະພາບການຕິດເຊື້ອຢູ່ປະເທດຂອງເຮົາໄດ້ເວັ້ນໄລຍະຫ່າງມາໄດ້ 5 ວັນແລ້ວ ຜູ້ຕິດເຊື້ອປິ່ນປົວຢູ່ໂຮງໝໍກໍໄດ້ອອກໂຮງໝໍ 2 ຄົນແລ້ວ ແຕ່ຄະນະສະເພາະກິດຈະບໍ່ໄດ້ລົດລະການເຝົ້າລະວັງ ຕິດຕາມຄົ້ນຫາຜູ້ສົງໄສທີ່ຈະຕິດເຊື້ອ ເພື່ອມາກວດວິເຄາະ ຢັ້ງຢືນພະຍາດໃຫ້ໄດ້ໄວ ແລະ ປິ່ນປົວຢ່າງທັນການ.