ເພື່ອປະຕິບັດຕາມຄຳສັ່ງຂອງນາຍົກລັດຖະມົນຕີ ເລກທີ 15 /ນຍ ເພີ່ມທະວີມາດຕະການສະກັດກັ້ນ ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດ covid-19 ຢ່າງເຂັ້ມງວດ ກໍຄືຄຳສັ່ງແຈ້ງການ ຂອງນະຄອນຫຼວງວຽງຈັນ ແລະ ເມືອງ ວາງອອກຢ່າງເຄັ່ງຄັດ ໃນການປະຕິບັດມາດຕະການປ້ອງກັນ ເພື່ອໃຫ້ທຸກຄົນໃນສັງຄົມເປັນເຈົ້າການເພີ່ມທະວີຄວາມເອົາໃຈໃສ່ຄວບຄຸມ ເພື່ອຕ້ານ ແລະ ສະກັດກັ້ນການແຜ່ລະບາດຂອງເຊື້ອພະຍາດ covid-19 ທີ່ກຳລັງແຜ່ກະຈາຍເປັນວົງກ້ວາງໃນນະຄອນຫຼວງ ວຽງຈັນ ແລະຊຸມຊົນ ຂອງເມືອງຫາດຊາຍຟອງໃນປັດຈຸບັນ ຈຳນວນຜູ້ຕິດເຊື້ອພະຍາດດັ່ງກ່າວ ນັບມື້ແມ່ນເພີ່ມຂື້ນຢ່າງໄວວາ ນັບຕັ້ງແຕ່ໄດ້ມີການລະບາດຂອງເຊື້ອພະຍາດ covid-19 ໃນຮອບສອງ ຈົນຕ້ອງເຮັດໃຫ້ສະຖານທີ່ການບໍລິການຕ່າງໆພາຍໃນເມືອງ ແລະ ນະຄອນຫຼວງ ປິດບໍລິການຊົ່ວຄາວເປັນຈໍານວນຫຼາຍ.
ວັນທີ 24 ເມສາ 2021 ຄະນະສະເພາະກິດ ຄວບຄຸມ ຕ້ານ ແລະ ສະກັດກັ້ນການແຜ່ລະບາດຂອງເຊື້ອພະຍາດ covid-19 ຂັ້ນເມືອງ ນຳໂດຍທ່ານ ຖາວອນ ສີຫາມາຍາ ຮອງເຈົ້າເມືອງຫາດຊາຍຟອງ ໄດ້ນຳພາຄະນະລົງຕິດຕາມຊຸກຍູ້ໃຫ້ກຳລັງໃຈ ແລະ ມອບນ້ຳດື່ມ ເຄື່ອງສຳພາລະບໍລິໂພກຕ່າງໆ ຜ້າປິດປາກ ແລະ ເຈວລ້າງມື ແອວກໍຮໍໃຫ້ກັບກຳລັງອ້າຍນ້ອງປ້ອງກັນ ປກສ ປກຊ ຢູ່ແຕ່ລະຈຸດກວດທີ່ໄດ້ປະຕິບັດໜ້າທີ່ຢູ່ພື້ນຖານບ້ານ ນັບຕັ້ງແຕ່ເຂດທາງເໜືອ ຫາເຂດທາງໃຕ້ຂອງເມືອງຫາດຊາຍຟອງ ແລະ ລຽບຕາມຊາຍແດນແມ່ນ້ຳຂອງ ເພື່ອຄຸມເຂັ້ມການລັກລອບຄົນເຂົ້າເມືອງຜິດກົດໝາຍ ພ້ອມທັງປະຕິບັດມາດຕະການຈຳກັດການແຜ່ເຊື້ອພະຍາດບໍ່ໃຫ້ມີການລະບາດເພີ່ມອີກ ໂດຍໄດ້ຕັ້ງດ່ານຈຸດກວດຄົນເຂົ້າ-ອອກຈຳນວນຫຼາຍຈຸດ ຢູ່ລະຫວ່າງເຂດບ້ານຕໍ່ບ້ານ ແລະ ຊາຍແດນເມືອງຕໍ່ເມືອງ ເພື່ອໃຫ້ເຈົ້າໜ້າທີ່ດ່ານກວດແຕ່ລະຈຸດທົ່ວເມືອງ ທັງໝົດ 20 ຈຸດ ໃຫ້ສືບຕໍ່ເພີ່ມທະວີຄວາມເອົາໃຈໃສ່ຕໍ່ການປະຕິບັດ ຄຳສັ່ງ ເລກທີ 15 /ນຍ ແລະ ຄຳສັ່ງ ແຈ້ງການ ຕ້ານການລະບາດເຊຶ້ອພະຍາດ covid-19 ຂອງນະຄອນຫຼວງ ແລະ ເມືອງ ຢ່າງເຄັ່ງຄັດ ເພື່ອປ້ອງກັນ ຕ້ານ ແລະ ຄວບຄຸມ ຈຳກັດຄົນເຂົ້າ-ອອກ ປິດການສັນຈອນຊົ່ວຄາວທີ່ບໍ່ມີຄວາມຈຳເປັນ ກໍຂໍໃຫ້ຫຼີກລ່ຽງ ເພື່ອຫຼຸດຄວາມ ສ່ຽງໃນການກະຈາຍເຊື້ອພະຍາດໄປໃສ່ຜູ້ອື່ນ ແລະ ຊຸມຊົນ ຍົກເວັ້ນຫາກຈຳເປັນ ຕໍ່ກໍລະນີຫາກພົບບຸກຄົນທີ່ມີການພົວພັນກັບກຸ່ມສ່ຽງທີ່ຕິດເຊື້ອພະຍາດ covid-19 ກໍ່ຂໍໃຫ້ລາຍງານຕໍ່ຂັ້ນເທີງ ແລະ ຄະນະສະເພາະກິດດ່ວນ ເພື່ອໃຫ້ນຳຕົວໄປກວດຫາເຊື້ອພະຍາດ ແລະ ປະຕິບັດການກັກຕົວເອງຕານລະບຽບການ ພ້ອມນັ້ນ ກໍຕ້ອງເປັນເຈົ້າການເອົາໃຈໃສ່ໂຄສະນາ ເຜີຍແຜ່ ແລະ ສຶກສາອົບຮົມໃຫ້ທຸນຄົນຮ່ວມແຮງຮ່ວມໃຈກັນເອົາໃຈໃສ່ປະຕິບັດມາດຕະການປ້ອງກັນ ໂດຍໃສ່ຜ້າປິດປາກທຸກຄັ້ງ ຮັກສາໄລຍະຫ່າງ ໝັ່ນລ້າງມືດ້ວຍເຈວແອວກໍຮໍ ໝັ່ນກວດເຊັກສຸຂະພາບ ຮັກສາອານາໄມເປັນປະຈຳ ຫຼີກລ່ຽງການເຕົ້າໂຮມຄົນຈຳນວນຫຼາຍ ຫາກມີອາການຂ້າງຄຽງສົງໄສ ກໍ່ຄວນໄປພົບແພດໝໍເພື່ອຮັບການຮັກສາດ່ວນຕາມຫຼັກການແພດ ທັງນີ້ກໍ່ເພື່ອເຮັດໃຫ້ເຊື້ອພະຍາດ covid-19 ບໍ່ແຜ່ລະບາດ ແລະ ຢຸດກະຈາຍເຊື້ອພະຍາດເປັນວົງກວ້າງ.
# ຂ່າວ & ພາບ : ໄຊບັນດິດ