ພິທີມອບ-ຮັບໜ້າທີ່ລະຫວ່າງທ່ານ ກິແກ້ວ ໄຂຄຳພິທູນ ເລຂາຄະນະພັກ ລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ຜູ້ເກົ່າ ແລະ ທ່ານນາງ ສວນສະຫວັນ ວິຍະເກດ ເລຂາຄະນະພັກ ລັດຖະມົນຕີກະຊວງ ຖວທ ຜູ້ໃໝ່ ຈັດຂຶ້ນວັນທີ 7 ເມສາ 2021 ຢູ່ຫໍວັດທະນະທຳແຫ່ງຊາດ ນະຄອນຫຼວງວຽງຈັນ ມີທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ ນາຍົກລັດຖະມົນຕີ ຄະນະນຳກະຊວງ ແລະ ພະນັກງານຫຼັກແຫຼ່ງເຂົ້າຮ່ວມ.
ໃນພິທີ ທ່ານນາງ ບຸດສະດີ ທະນະເມືອງ ກໍາມະການສູນກາງພັກ ຕາງໜ້າຄະນະຈັດຕັ້ງສູນກາງພັກ ໄດ້ຂຶ້ນຜ່ານຄຳສັ່ງວ່າດ້ວຍການຍົກຍ້າຍພະນັກງານການນຳຂັ້ນສູງໄປຮັບໜ້າທີ່ໃໝ່ ຜ່ານມະຕິຕົກລົງຂອງກົມການເມືອງສູນກາງພັກ ວ່າດ້ວຍການແຕ່ງຕັ້ງເລຂາຄະນະພັກກະຊວງ ຖວທ ແລະ ຜ່ານລັດຖະດຳລັດຂອງປະທານປະເທດ ວ່າດ້ວຍການແຕ່ງຕັ້ງລັດຖະມົນຕີກະຊວງ ຖວທ ໂດຍໄດ້ໂຍກຍ້າຍທ່ານ ກິແກ້ວ ໄຂຄຳພິທູນ ກຳມະການກົມການເມືອງສູນກາງພັກ ເລຂາຄະນະພັກ ລັດຖະມົນຕີກະຊວງ ຖວທ ໄປຮັບໜ້າທີ່ໃໝ່ເປັນຮອງນາຍົກລັດຖະມົນຕີ ແລະ ໂຍກຍ້າຍທ່ານນາງ ສວນສະຫວັນ ວິຍະເກດ ກຳມະການສູນກາງພັກ ເລຂາທິການສະພາແຫ່ງຊາດ ຊຸດທີ VIII ມາຮັບໜ້າທີ່ໃໝ່ເປັນເລຂາຄະນະພັກ ລັດຖະມົນຕີກະຊວງ ຖວທ.
ໂອກາດນີ້ ທ່ານ ພັນຄຳ ວິພາວັນ ໄດ້ໂອ້ລົມໃຫ້ທິດຊີ້ນຳຕໍ່ທ່ານລັດຖະມົນຕີຜູ້ໃໝ່ ກໍຄືພະນັກງານຫຼັກແຫຼ່ງທົ່ວກະຊວງ ຖວທ ໃຫ້ເອົາໃຈໃສ່ບາງບັນຫາດັ່ງນີ້: ໃຫ້ບັນດາການນຳທຸກຂັ້ນ ຕ້ອງເປັນເອກະພາບສູງນຳຂັ້ນເທິງ ແລະ ປະຕິບັດຕາມໃຫ້ຖືກບົນພື້ນຖານນັ້ນເປັນເຈົ້າການເຮັດວຽກງານສຶກສາອົບຮົມນຳພາແນວຄິດຂອງສະມາຊິກພັກ ພະນັກງານຫຼັກແຫຼ່ງ ແລະ ພະນັກງານ-ລັດຖະກອນທົ່ວກະຊວງ ເພື່ອໃຫ້ທຸກຄົນເຂົ້າໃຈຖືກ ແລະ ຮັບຮູ້ຢ່າງທົ່ວເຖິງກ່ຽວກັບປ່ຽນແປງດັ່ງກ່າວ ຕ້ອງເດັດດ່ຽວສະກັດກັ້ນບໍ່ໃຫ້ມີການສວຍໂອກາດ ເພື່ອໃສ່ຮ້າຍປ້າຍສີທັບຖົມໂຈມຕີກັນໃນທາງບໍ່ດີ ອັນໃດເປັນຜົນສຳເລັດທີ່ພ້ອມກັນຍາດມາໄດ້ໃນການນຳພາຈັດຕັ້ງປະຕິບັດຜ່ານມາ ກໍໃຫ້ຍ້ອງຍໍ ພ້ອມກັນປົກປັກຮັກສາ ແລະ ເສີມຂະຫຍາຍໃຫ້ດີຂຶ້ນເລື້ອຍໆ ອັນໃດຍັງອ່ອນ ແລະ ຄົງຄ້າງຕ້ອງ ພ້ອມກັນເດັດດ່ຽວດັດແປງແກ້ໄຂໃຫ້ຕົກໄປ ເພື່ອພ້ອມກັນສືບຕໍ່ນຳພາພະນັກງານ ແລະ ສະມາຊິກພັກໃນຄວາມຮັບຜິດຊອບຂອງກະຊວງ ຕັ້ງໜ້າແຂ່ງຂັນກັນສ້າງຂະບວນການດ້ານຕ່າງໆ ກໍ່ໃຫ້ເກີດມີການຫັນປ່ຽນຢ່າງແຂງແຮງ ເລິກເຊິ່ງ ແລະ ຮອບດ້ານ ເພື່ອພ້ອມກັນຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງ ຖວທ ໃຫ້ປາກົດຜົນເປັນຈີງ ເອົາໃຈໃສ່ເປັນເຈົ້າການ ແລະ ປະສານສົມທົບກັບທຸກພາກສ່ວນກ່ຽວຂ້ອງ ໃນການປົກປັກຮັກສາຄວາມສະຫງົບພາຍໃນ ແລະ ພາຍນອກ ເປັນຕົ້ນໃນຂົງເຂດ ຖວທ ສືບຕໍ່ເອົາໃຈໃສ່ໃສ່ຕ້ານ ແລະ ສະກັດກັ້ນທຸກກົນອຸບາຍ ເລ່ຫຼ່ຽມ ແລະ ຖ້ອຍທຳນອງໃສ່ຮ້າຍປ້າຍສີ ປ່ັນປ່ວນ ແບ່ງແຍກພາຍໃນຄະນະນຳ ກໍຄືພາຍໃນຄະນະພັກ ຂອງພວກສັດຕູ ແລະ ກຸ່ມຄົນບໍ່ດີທີ່ຫວັງມ້າງເພທຳລາຍພວກເຮົາຕະຫຼອດເວລາ ສືບຕໍ່ປົກປັກຮັກສາມູນເຊື້ອອັນດີງາມ ໂດຍສະເພາະມູນເຊື້ອຄວາມສາມັກຄີເປັນເອກະພາບລະດັບສູງພາຍໃນຄະນະພັກ-ຄະນະນຳ ໃຫ້ສືບຕໍ່ເປັນຫຼັກເປັນແຫຼ່ງ ເປັນຄັນທຸງ ແລະ ເປັນແກນນຳໃນການເຕົ້າໂຮມຄວາມສາມັກຄີໃນຖັນແຖວພະນັກງານ ສະມາຊິກພັກ ພ້ອມນັ້ນ ທຸກຄົນຕ້ອງໄດ້ຊ່ວຍ ແລະ ໃຫ້ການຮ່ວມມືສະໜັບສະໜູນທ່ານນາງ ສວນສະຫວັນ ວິຍະເກດ ທີ່ຈະເປັນໃຈກາງນຳພາ-ຊີ້ນຳຮັບຜິດຊອບຕໍ່ໜ້າທີ່ການເມືອງອັນສູງສົ່ງ ໃນນາມເປັນເລຂາຄະນະພັກກະຊວງ ກໍຄືລັດຖະມົນຕີກະຊວງ ຖວທ ຜູ້ໃໝ່ ສິ່ງສຳຄັນ ຕ້ອງເອົາໃຈໃສ່ປັບປຸງ ແລະ ປະຕິບັດລະບອບແບບແຜນວິທີເຮັດວຽກທີ່ມີວິທະຍາສາດ ປະຕິບັດລະບອບປະຊຸມປືກສາຫາລືສ່ອງແສງລາຍງານພາຍຄະນະພັກ-ຄະນະນຳເປັນປົກກະຕິ ເພື່ອສືບຕໍ່ນຳພາພະນັກງານສະມາຊິກພັກ ຈັດຕັ້ງປະຕິບັດໜ້າທີ່ວຽກງານໃນຂົງເຂດສື່ມວນຊົນ ວຽກງານວັດທະນະທຳ ແລະ ວຽກງານທ່ອງທ່ຽວໃຫ້ນັບມື້ໄດ້ຮັບຜົນສຳເລັດດີຂຶ້ນເລື້ອຍໆ.
# ຂ່າວ & ພາບ: ລັດເວລາ