ພິທີມອບ-ຮັບໜ້າທີ່ລັດຖະມົນຕີກະຊວງສຶກສາທິການ ແລະ ກີລາ (ສສກ) ຈັດຂຶ້ນວັນທີ 1 ເມສາ 2021 ຢູ່ຄະນະກໍາມະການໂອແລມປິກແຫ່ງຊາດລາວ ລະຫວ່າງທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງ ສສກ (ຜູ້ເກົ່າ) ແລະ ທ່ານ ຮສ ປອ ພຸດ ສິມມາລາວົງ ກຳມະການສູນກາງພັກ ລັດຖະມົນຕີກະຊວງ ສສກ (ຜູ້ໃໝ່) ໂດຍມີທ່ານ ສຈ ປອ ກິແກ້ວ ໄຂຄຳພິທູນ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີແຫ່ງ ສປປ ລາວ ມີບັນດາທ່ານຮອງລັດຖະມົນຕີ ຫົວໜ້າຫ້ອງການ ຫົວໜ້າກົມ ຮອງກົມ ຜູ້ອຳນວຍການສະຖາບັນ ສຳນັກພິມ ສູນ ແລະ ຕາງໜ້າຈາກມະຫາວິທະຍາໄລ ເຂົ້າຮ່ວມ.
ໂອກາດນີ້ ທ່ານນາງ ແສງເດືອນ ຫຼ້າຈັນທະບູນ ກ່າວວ່າ: ຕະຫຼອດໄລຍະ 5 ປີ ທີ່ຜ່ານມາ ຂ້າພະເຈົ້າພ້ອມດ້ວຍໝູ່ຄະນະ ແລະ ເພື່ອນຮ່ວມງານຂັ້ນຕ່າງໆ ໄດ້ພ້ອມກັນຄົ້ນຄວ້າ ແລະ ເສີມຂະຫຍາຍແນວທາງນະໂຍບາຍຂອງພັກ ໄດ້ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກກະຊວງ ກໍຄືແຜນພັດທະນາຂະແໜງການສຶກສາ ແລະ ກີລາ ຄັ້ງທີ VIII ເຊິ່ງມີຜົນສຳເລັດ ພ້ອມດ້ວຍຂໍ້ຄົງຄ້າງຈຳນວນໜຶ່ງ ທີ່ໄດ້ມີການປະເມີນແຕ່ລະປີ ພ້ອມທັງຖອດຖອນບົດຮຽນ 5 ປີ ໂດຍລວມ ມີຜົນສຳເລັດສູງພໍສົມຄວນ ສຳລັບສິ່ງທີ່ຍັງຄົງຄ້າງ ບໍ່ທັນສຳເລັດ ແມ່ນໄດ້ມີການຕີລາຄາ ແລະ ໄດ້ກຳນົດເຖິງວິທີແກ້ໄຂໄວ້ໃນແຜນພັດທະນາຂະແໜງການສຶກສາ ແລະ ກີລາ ໃນ 5 ປີ ຄັ້ງທີ IX (2021-2025) ຂ້ອນຂ້າງຈະແຈ້ງຕາມທີ່ໄດ້ຕົກລົງເປັນມະຕິ ໃນກອງປະຊຸມຜູ້ບໍລິຫານການສຶກສາ ແລະ ກີລາ ເພື່ອໃຫ້ຄະນະນຳຂອງກະຊວງຊຸດໃໝ່ ໄດ້ນຳໄປຜັນຂະຫຍາຍເຂົ້າສູ່ຕົວຈິງ.
ຜົນສຳເລັດໃນໄລຍະຜ່ານມາ ແມ່ນຍ້ອນຄວາມເອົາໃຈໃສ່ຂອງກົມການເມືອງສູນກາງພັກ ແລະ ລັດຖະບານ ທີ່ໄດ້ໃຫ້ການຊີ້ນຳຢ່າງໃກ້ຊິດ ແລະ ແທດເຖິງໃນການພັດທະນາຊັບພະຍາກອນມະນຸດ ສົມທົບກັບຄວາມສາມັກຄີພາຍໃນ ແລະ ການປະກອບສ່ວນຮ່ວມມືຂອງຄະນະນຳກະຊວງ ຜູ້ບໍລິຫານການສຶກສາ ແລະ ກີລາທຸກຂັ້ນ ຕະຫຼອດຮອດຄູອາຈານໝົດທຸກຄົນໃນທົ່ວປະເທດ.
ທ່ານ ຮສ ປອ ພຸດ ສິມມາລາວົງ ກ່າວວ່າ: ເພື່ອປະຕິບັດໜ້າທີ່ການເມືອງຂອງຕົນ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ກໍຄືການຈັດຕັ້ງຜັນຂະຫຍາຍມະຕິກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ແລະ ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກກະຊວງໃຫ້ປາກົດຜົນເປັນຈິງ ຂ້າພະເຈົ້າຂໍປະຕິຍານຕົນວ່າ ຈະສືບຕໍ່ສຸມທຸກເຫື່ອແຮງ ແລະ ຄວາມຮູ້ຄວາມສາມາດຂອງຕົນຮ່ວມກັບໜູ່ຄະນະ ໃນການປະຕິບັດໜ້າທີ່ການເມືອງທີ່ພັກ-ລັດ ກໍຄືປະຊາຊົນລາວບັນດາເຜົ່າ ທີ່ໄດ້ມອບໝາຍໃຫ້ໃນການພັດທະນາການສຶກສາ-ກີລາ ແລະ ການພັດທະນາຊັບພະຍາກອນມະນຸດຂອງ ສປປ ລາວ ໃຫ້ມີຜົນສຳເລັດຕາມຄາດໝາຍທີ່ວາງໄວ້ ຈະສືບຕໍ່ສຶກສາອົບຮົມສະມາຊິກພັກ ຜູ້ບໍລິຫານການສຶກສາ ແລະ ກີລາ ແລະ ຄູອາຈານ ໃນຂອບເຂດທົ່ວປະເທດ ໃຫ້ປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ ມີຈັນຍາບັນ-ຈັນຍາທຳ ປະຕິບັດໜ້າທີ່ຮັບໃຊ້ປະຊາຊົນດ້ວຍຄວາມບໍລິສຸດສັດຊື່ ແລະ ຮັບຜິດຊອບສູງ ຈະສືບຕໍ່ຮັດແໜ້ນຄວາມສາມັກຄີຢູ່ພາຍໃນ ແລະ ພາຍນອກໃຫ້ເຂັ້ມແຂງ ໂດຍສະເພາະ ສືບຕໍ່ພົວພັນກັບບັນດາປະເທດເພື່ອນມິດຍຸດທະສາດ ບັນດາອົງການຈັດຕັ້ງສາກົນ ເພື່ອຍາດແຍ່ງທຶນຮອນມາຈັດຕັ້ງປະຕິບັດວຽກຈຸດສຸມຂອງກະຊວງໃນໄລຍະ 5 ປີຕໍ່ໜ້າ ຈະສືບຕໍ່ຮໍ່າຮຽນເອົາແບບແຜນການດຳລົງຊີວິດ ແລະ ພາລະກິດທີ່ໄດ້ຮັບການມອບໝາຍຂອງທ່ານນາງ ແສງເດືອນ ຫຼ້າຈັນທະບູນ ໃຫ້ເປັນຮູບປະທຳ ເຂົ້າໃນຊີວິດພຶດຕິກຳຕົວຈິງ.
ຂະນະທີ່ ທ່ານ ສຈ ປອ ກິແກ້ວ ໄຂຄຳພິທູນ ກ່າວວ່າ: ຕະຫຼອດໄລຍະ 5 ປີຜ່ານມາ ພາຍໃຕ້ການຊີ້ນຳ-ນຳພາຂອງທ່ານນາງ ແສງເດືອນ ຫຼ້າຈັນທະບູນ ເລຂາຄະນະພັກ ລັດຖະມົນຕີກະຊວງ ສສກ ທີ່ໄດ້ສູ້ຊົນອົດທົນຜ່ານຜ່າຄວາມຫຍຸ້ງຍາກຕ່າງໆ ສ້າງໄດ້ຄວາມເປັນເອກະພາບກັນໃນລະດັບສູງ ຄະນະພັກເປັນຫຼັກແຫຼ່ງ ເປັນຄັນທຸງ ເປັນແກ່ນສານໃນການນຳພາ ແລະ ເຕົ້າໂຮມຄວາມສາມັກຄີ ຖັນແຖວພະນັກງານ ແລະ ສະມາຊິກພັກ ພ້ອມກັນຈັດຕັ້ງປະຕິບັດໜ້າທີ່ວຽກງານທີ່ພັກ ແລະ ລັດຖະບານ ມອບໝາຍໃຫ້ ເຮັດໃຫ້ວຽກງານການສຶກສາ ແລະ ກີລາ ໄດ້ມີການຫັນປ່ຽນທີ່ຕັ້ງໜ້າ ສາມາດຍາດໄດ້ຜົນສຳເລັດທີ່ສຳຄັນໃນຫຼາຍດ້ານ.
ນອກນີ້ ທ່ານຍັງໄດ້ຮຽກຮ້ອງໃຫ້ເອົາໃຈໃສ່ບາງບັນຫາ ເຊັ່ນ: ພ້ອມກັນສືບຕໍ່ນຳພາພະນັກງານ ແລະ ສະມາຊິກພັກໃນທົ່ວກະຊວງ ຕັ້ງໜ້າແຂ່ງຂັນກັນສ້າງຂະບວນການດ້ານຕ່າງໆໃຫ້ມີການຫັນປ່ຽນຢ່າງແຂງແຮງ ເລິກເຊິ່ງ ແລະ ຮອບດ້ານ ເພື່ອພ້ອມກັນຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກກະຊວງ ສສກ ກໍຄືແຜນພັດທະນາເສດຖະກິດ-ສັງຄົມ ຂອງກະຊວງໄດ້ວາງອອກໃຫ້ປາກົດຜົນເປັນຈິງ ເອົາໃຈໃສ່ເປັນເຈົ້າການ ແລະ ປະສານສົມທົບກັບທຸກພາກສ່ວນກ່ຽວຂ້ອງ ເພື່ອໃນການປົກປັກຮັກສາຄວາມສະຫງົບພາຍໃນ ແລະ ພາຍນອກ ເປັນຕົ້ນແມ່ນໃນຂົງເຂດການສຶກສາ ແລະ ກິີລາ ສືບຕໍ່ປົກປັກຮັກສາມູນເຊື້ອອັນດີງາມຂອງກະຊວງພວກສະຫາຍ ໂດຍສະເພາະມູນເຊື້ອຄວາມສາມັກຄີເປັນເອກະພາບລະດັບສູງພາຍໃນຄະນະພັກ-ຄະນະນຳ ສືບຕໍ່ເປັນຫຼັກເປັນແຫຼ່ງ ເປັນຄັນທຸງ ແລະ ເປັນແກນນຳ ໃນການເຕົ້າໂຮມຄວາມສາມັກຄີໃນຖັນແຖວພະນັກງານສະມາຊິກພັກ.
ປັບປຸງຄວາມຮູ້ທາງດ້ານວິຊາການ ແລະ ທັກສະດ້ານການສິດສອນຂອງຄູສອນຊັັ້ນປະຖົມສຶກສາ ໂດຍໃຫ້ບູລິມະສິດໃນການຈັດສັນຊັບພະຍາກອນທີ່ມີ ໃສ່ວຽກງານປະຖົມສຶກສາ ສະໜອງການສຶກສາຫຼັງຂັັ້ນພື້ນຖານທີຶ່ມີຄຸນນະພາບ ໂດຍສະເພາະໃນຊັັ້ນມັດທະຍົມສຶກສາຕອນປາຍ ອາຊີວະສຶກສາ ແລະ ການສຶກສາຊັັ້ນສູງ ເພືຶ່ອປະກອບສ່ວນເຂົ້າ ແລະ ສະໜັບສະໜູນບັນດາບູລິມະສິດຂອງແຜນພັດທະນາເສດຖະກິດ-ສັງຄົມແຫ່ງຊາດ ສ້າງຄວາມເຂັ້ມແຂງໃຫ້ແກ່ຜູ້ບໍລິຫານການສຶກສາ ແລະ ກີລາໃນທຸກລະດັບ ເພືຶ່ອປັບປຸງປະສິດທິພາບ ປະສິດທິຜົນ ສຸມໃສ່ຫຼຸດຜ່ອນຄວາມແຕກໂຕນກັນໃນການພັດທະນາການສຶກສາ ແລະ ກີລາ ໃນຕົວເມືອງ ແລະ ຊົນນະບົດ ສືບຕໍໍ່ກໍໍ່ສ້າງ ແລະ ພັດທະນາບຸກຄະລາກອນການກີລາ-ກາຍຍະກຳ ໃຫ້ມີຄຸນະພາບ ແລະ ສາມາດແຂ່ງຂັນກັບພາກພື້ນ ແລະ ສາກົນໄດ້ເທືຶ່ອລະກ້າວ.
# ຂ່າວ & ພາບ: ສີພອນ