ວັນທີ 31 ມີນາ 2021 ທີ່ໂຮງແຮງດອນຈັນ ນະຄອນຫຼວງວຽງຈັນ ສະມາຄົມເພື່ອພັດທະນາແມ່ຍິງ ແລະ ການສຶກສາກົດໝາຍ ຈັດກອງປະຊຸມໃຫ່ຍສະໄໝສາມັນ ຄັ້ງທີ 3 ຂຶ້ນ ໂດຍການເປັນປະທານຂອງທ່ານນາງ ຜ່ອງສີ ປັນຍານຸວົງ ປະທານສະມາຄົມ ມີຄະນະບໍລິຫານ-ສະມາຊິກສະມາຄົມ ຕາງໜ້າຈາກກະຊວງ ພະແນກການ ສະຫະພັນແມ່ຍິງ ບັນດາຜູ້ໃຫ້ທຶນ ຄູ່ຮ່ວມງານທັງພາກລັດ ອົງການຈັດຕັ້ງທາງສັງຄົມທີ່ກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ ແມ່ນເພື່ອເປັນການທົບທວນຄືນຜົນງານ ແລະ ລາຍງານຜົນການຈັດຕັ້ງປະຕິບັດກິດຈະກຳໃນໄລຍະ 5 ປີທີ່ຜ່ານມາ (2016-2020) ພ້ອມທັງແຜນການໃນຕໍ່ໜ້າ ໃຫ້ແກ່ບັນດາສະມາຊິກຂອງສະມາຄົມ ຄູ່ຮ່ວມງານທັງພາກລັດ ແລະ ອົງການຈັດຕັ້ງທາງສັງຄົມ ໃຫ້ຮັບຮູ້ເຖິງຜົນງານຂອງສະມາຄົມທີ່ໄດ້ປະຕິບັດສຳເລັດໃນໄລຍະຜ່ານມາ ແລະ ເພື່ອເປັນການປ່ອນບັດເລືອກຕັ້ງຄະນະບໍລິຫານງານສະມາຄົມຊຸດທີ 3 ສະມາຄົມເພື່ອພັດທະນາແມ່ຍິງ ແລະ ການສຶກສາກົດໝາຍ ແມ່ນອົງການຈັດຕັ້ງທາງສັງຄົມທີ່ບໍ່ຫວັງຜົນກຳໄລ ໂດຍໄດ້ຮັບການອະນຸຍາດສ້າງຕັ້ງຈາກກະຊວງພາຍໃນປີ 2012 ແລະ ມີຈຸດມຸ່ງໝາຍສົ່ງເສີມຄວາມສະເໝີພາບຍິງ-ຊາຍ ສິດທິແມ່ຍິງ ເຜີຍແຜ່ກົດໝາຍທີ່ພົວພັນກັບແມ່ຍິງ ຕ້ານການໃຊ້ຄວາມຮຸນແຮງຕໍ່ກັບແມ່ຍິງ ແລະ ເດັກ ຕ້ານການຄ້າມະນຸດ ການເຄື່ອນຍ້າຍແຮງງານທີ່ປອດໄພ ສ້າງຄວາມເຂັ້ມແຂງໃຫ້ກັບຄະນະແກ້ໄຂຂໍ້ຂັດແຍ່ງຂັ້ນບ້ານ ແລະ ສົ່ງເສີມໃຫ້ແມ່ຍິງສາມາດເຂົ້າເຖິງຂະບວນການຍຸຕິທຳໃນ ສປປ ລາວ ໂດຍຜ່ານຫ້ອງໃຫ້ຄຳປຶກສາ ແລະ ຊ່ວຍເຫຼືອທາງດ້ານກົດໝາຍຂອງສະມາຄົມ ເຊິ່ງກິດຈະກໍາຫຼັກຂອງສະມາຄົມທີ່ຈັດຕັ້ງປະຕິບັດຢູ່ ແມ່ນເພື່ອສົ່ງເສີມຄວາມສະເໝີພາບລະຫວ່າງຍິງ-ຊາຍ ສິດທິແມ່ຍິງ ຕ້ານການໃຊ້ຄວາມຮຸນແຮງຕໍ່ກັບແມ່ຍິງ ແລະ ເດັກ ແລະ ສົ່ງເສີມໃຫ້ແມ່ຍິງທີ່ດ້ອຍໂອກາດ ໄດ້ເຂົ້າເຖິງຂະບວນການຍຸຕິທຳໃຫ້ນັບມື້ຫຼາຍຂຶ້ນ ເພື່ອໃຫ້ບັນລຸຕາມວິໄສທັດຂອງສະມາຄົມ ຄື: “ສັງຄົມທີ່ມີຄວາມສະເໝີພາບຍິງ-ຊາຍ ລວມເຖິງການມີໂອກາດເທົ່າທຽມກັນ ມີສ່ວນຮ່ວມໃນການຕັດສິນບັນຫາ ແລະ ເຂົ້າເຖິງລະບົບຍຸຕິທຳ.
ກອງປະຊຸມ ຍັງໄດ້ມີການປຶກສາຫາລື ສົນທະນາແລກປ່ຽນຄວາມຄິດເຫັນກ່ຽວກັບຂໍ້ພົ້ນເດັ່ນ ບັນຫາສິ່ງທ້າທາຍ ແລະ ຜົນໄດ້ຮັບຂອງການຈັດຕັ້ງປະຕິບັດກິດຈະກຳໃນໄລຍະ 5 ປີ ທີ່ຜ່ານມາ ຢູ່ໃນພື້ນທີ່ເປົ້າໝາຍໂຄງການຂອງສະມາຄົມ ແລະ ໃນຕອນທ້າຍຂອງກອງປະຊຸມ ຍັງໄດ້ມີການປ່ອນບັດເລືອກຕັ້ງຄະນະບໍລິຫານງານສະມາຄົມຊຸດທີ 3 ອີກດ້ວຍ.
# ຂ່າວ & ພາບ: ວຽງມາ