ສູນວິເຄາະ ແລະ ລະບາດວິທະຍາ ໄດ້ອອກມາໃຫ້ຄວາມຈະຈ້າງແຈ້ງຕໍ່ການກວດວິເຄາະຫາເຊື້ອພະຍາດ COVID-19 ນັ້ນ ທຸກຄົນແມ່ນມີສິດເທົ່າທຽມກັນ ໃນການເຂົ້າກວດຫາເຊື້ອພະຍາດດັ່ງກ່າວໂດຍບໍ່ເສຍຄ່າ ແຕ່ຕ້ອງມີອາການເຂົ້າກັບເງື່ອນໄຂດັ່ງຕໍ່ໄປນີ້.
ທ່ານ ດຣ ພອນປະດິດ ສັງໄຊຍະລາດ ຫົວໜ້າສູນວິເຄາະ ແລະ ລະບາດວິທະຍາ ກະຊວງສາທາລະນະສຸກໄດ້ກ່າວວ່າ: ທຸກຄົນທີ່ມີໄຂ້ຫຼາຍກວ່າ 37,5 ອົງສາ ຫຼື ມີປະຫວັດເປັນໄຂ້ ຫຼືວ່າມີອາການໄອ ອາການທາງລະບົບຫາຍໃຈ ບວກກັບເງື່ອນໄຂໃດໜຶ່ງ ກ່ອນໜ້າ 14 ວັນນັ້ນ ແມ່ນມີປະຫວັດໃກ້ຊິດກັບກໍລະນີຢັ້ງຢືນ COVID-19 ຫຼືວ່າປະຫວັດສຳຜັດກັບຜູ້ທີ່ມີອາການໄຂ້ ໄອ ຫຼື ຜູ້ທີ່ມີອາການທາງລະບົບຫາຍໃຈ ມີປະຫວັດເດີນທາງມາແຕ່ຕ່າງປະເທດ ຖ້າບຸກຄົນໃດຖ້າເຂົ້າກັບເງື່ອນໄຂດັ່ງກ່າວນີ້ ກໍສາມາດເຂົ້າມາກວດຢູ່ໂຮງໝໍໂດຍບໍ່ໄດ້ເສຍຄ່າ ນອກຈາກນັ້ນ ສຳລັບຜູ້ຕິດເຊື້ອພະຍາດ COVID-19 ແມ່ນບໍ່ໄດ້ເສຍຄ່າໃນການປິ່ນປົວເຊັ່ນກັນ ນອກຈາກນັ້ນ ທຸກໆຄົນທີ່ຢູ່ຕ່າງແຂວງ ຖ້າມີອາການຕາມເງື່ອນໄຂທີ່ກ່າວມາ ແມ່ນສາມາດເຂົ້າມາກວດຫາເຊື້ອພະຍາດ COVID-19 ໄດ້ຢູ່ໂຮງໝໍແຂວງ ເຊິ່ງປັດຈຸບັນ ໂຮງໝໍແຂວງທີ່ສາມາດກວດຫາເຊື້ອພະຍາດນີ້ໄດ້ ປະກອບມີ ແຂວງຈຳປາສັກ ຫຼວງພະບາງ ແລະ ຫຼວງນ້ຳທາ ແລະ ປັດຈຸບັນນີ້ ແມ່ນພະຍາຍາມຂະຫຍາຍເຄື່ອງກວດໃຫ້ມີຄວາມສາມາດກວດໄດ້ໃນທຸກໆແຂວງ ແລະ ໃນໄວໆນີ້ ຈະຂະຫຍາຍຈຸດກວດພາກເໜືອ (ແຂວງອຸດົມໄຊ) ແລະ ພາກໃຕ້ (ຈຳປາສັກ) ເພື່ອຮອງຮັບການສົ່ງຕົວຢ່າງກວດສຳລັບແຂວງພາກໃຕ້ ແລະ ພາກເໜືອ.
ທ່ານ ດຣ ພອນປະດິດ ສັງໄຊຍະລາດ ໄດ້ກ່າວຕື່ມວ່າ: ຜູ້ທີ່ມີປະຫວັດພົວພັນກັບຜູ້ຕິດເຊື້ອ ແລະ ໃກ້ຊິດກັບຜູ້ຕິດເຊື້ອ ຄວນເຄັ່ງຄັດໃນການຈຳກັດຕົນເອງເພື່ອບໍ່ໃຫ້ພະຍາດນີ້ໄປຕິດໃສ່ຜູ້ທີ່ທ່ານຮັກ ເພື່ອເຮັດໃຫ້ຜູ້ທີ່ໃກ້ຊິດຂອງທ່ານປອດໄພ. ສຳລັບບຸກຄົນທີ່ສຳຜັດໃກ້ຊິດກັບຜູ້ຕິດເຊື້ອນັ້ນ ທາງທີມງານຂອງພວກເຮົາແມ່ນໄດ້ມີເບີຕິດຕໍ່ ແລະ ໄດ້ແນະນຳ ຕິດຕາມເປັນປະຈຳຢູ່ ແລະ ປັດຈຸບັນ ລັດຖະບານໄດ້ມີມາດຕະການປິດເມືອງ ເຊິ່ງມາດຕະການນີ້ແມ່ນຈະຊ່ວຍຢັບຢັ້ງຜູ້ທີ່ມີຄວາມສ່ຽງຕິດເຊື້ອບໍ່ສາມາດອອກໄປນອກ ຖ້າວ່າມາດຕະການນີ້ໄດ້ຮັບການປະຕິບັດຢ່າງເຄັ່ງຄັດ ອຳນາດການປົກຄອງປະຕິບັດຢ່າງເຄັ່ງຄັດ ກໍຈະຊ່ວຍຫຼຸດຜ່ອນການຕິດເຊື້ອ ເຊິ່ງອຳນາດການປົກຄອງຊ່ວຍເບີ່ງຕິດຕາມເປັນຕົ້ນແມ່ນຜູ້ທີ່ມີຄວາມສ່ຽງ ແລະ ຜູ້ທີ່ມີຄວາມສ່ຽງກໍຕ້ອງເປັນເຈົ້າການ ມີຄວາມຈຳກັດບໍລິເວນຕົນເອງ ແລະ ຮັບຜິດຊອບຕໍ່ສັງຄົມ ນັ້ນກໍເພື່ອຈຳກັດ ແລະ ຫຼຸດຜ່ອນການຕິດເຊື້ອ ຖ້າທ່ານໃດພົບກໍລະນີສົງໄສ ແລະ ຕ້ອງການຄຳປຶກສາສາມາດໂທເຂົ້າເບີ 165 ແລະ 166 ໄດ້.