ພິທີເຊັນສັນຍາສໍາປະທານ ໂຄງການສາຍສົ່ງໄຟຟ້າແຫ່ງຊາດລາວ ລະຫວ່າງລັດຖະບານແຫ່ງ ສປປ ລາວ ກັບ ບໍລິສັດ ສາຍສົ່ງໄຟຟ້າແຫ່ງຊາດລາວ ຈັດຂຶ້ນວັນທີ 11 ມີນາ 2021 ຢູ່ນະຄອນຫຼວງວຽງຈັນ ຕາງໜ້າລັດຖະບານລາວ ລົງນາມໂດຍທ່ານນາງ ຄໍາຈັນ ວົງແສນບູນ ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ຈ່າງ ເຫວີນເຟີງ ຮອງຜູ້ອໍານວຍການໃຫຍ່ ບໍລິສັດ ຕາຂ່າຍໄຟຟ້າພາກໃຕ້ຈີນ ມີທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ທ່ານ ຈຽງ ໄຈ້ຕົງ ເອກອັກຄະລັດຖະທູດຜູ້ມີອຳນາດເຕັມແຫ່ງ ສປ ຈີນ ປະຈຳ ສປປ ລາວ ພ້ອມດ້ວຍບັນດາລັດຖະມົນຕີ ຮອງລັດຖະມົນຕີ ແລະ ພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.
ທ່ານ ຈຽງ ໄຈ້ຕົງ ກ່າວວ່າ: ການສ້າງຕັ້ງບໍລິສັດ ສາຍສົ່ງໄຟຟ້າແຫ່ງຊາດລາວ ຫຼື EDL-T ຈະນໍາໃຊ້ທ່າແຮງຂອງທັງສອງຝ່າຍຢ່າງມີປະສິດທິພາບ ແລະ ປະສິດທິຜົນ ທ່ານຫວັງວ່າທັງສອງຝ່າຍຈະຮ່ວມມືຢ່າງໜັກແໜ້ນ ສົ່ງເສີມວຽກງານຕ່າງໆ ເພື່ອໃຫ້ບໍລິສັດດໍາເນີນງານຢ່າງແທ້ຈິງໂດຍໄວ ຕັ້ງໜ້າພັດທະນາໃຫ້ກາຍເປັນຕົວແບບການຮ່ວມມື ແລະ ມິດຕະພາຍ ລະຫວ່າງ ຈີນ-ລາວ ແລະ ລາວ-ຈີນ ສ້າງຜົນງານໃຫ້ແກ່ປີ 2021 ເຊິ່ງເປັນປີມິດຕະພາບ ຈີນ-ລາວ ປະກອບສ່ວນຢ່າງໃກ້ຊິດເຂົ້າໃນການຮ່ວມສ້າງສາພັດທະນາຄູ່ຮ່ວມຊາຕາກໍາລາວ-ຈີນ ແລະ ຈີນ-ລາວ.
ທ່ານ ຈ່າງ ເຫວີນເຟີງ ກ່າວວ່າ: ໂດຍຕາມຫຼັກການປຶກສາຮ່ວມກັນ ສ້າງສາຮ່ວມກັນ ນໍາໃຊ້ຮ່ວມກັນ ແລະ ນໍ້າໃຈຮ່ວມມືແບບຕ່າງຝ່າຍຕ່າງມີຜົນປະໂຫຍດ ຈະຮ່ວມກັບໄຟຟ້າລາວ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ແລະ ຍົກສູງລະດັບຊີວິດການເປັນຢູ່ຂອງປະຊາຊົນບັນດາເຜົ່າຂອງ ສປປ ລາວ.
ທ່ານນາງ ຄໍາຈັນ ວົງແສນບູນ ກ່າວວ່າ: ລາວ-ຈີນ ແມ່ນສອງປະເທດເພື່ອນມິດຍຸດທະສາດ ທີ່ມີສາຍພົວພັນຮ່ວມກັນມາຍາວນານ ແລະ ທັງເປັນຄູ່ຮ່ວມຊາຕາກຳ ໃນການພັດທະນາເສດຖະກິດ-ສັງຄົມ ລະຫວ່າງສອງປະເທດ (ລາວ-ຈີນ) ເພື່ອຮັບປະກັນການພັດທະນາທຸກດ້ານຂອງທັງສອງປະເທດ ໃຫ້ໄປຕາມທິດຍືນຍົງ ແລະ ມີການຂະຫຍາຍຕົວຢ່າງກ້າວກະໂດດ ເຊິ່ງເຫັນໄດ້ການລົງທຶນຜ່ານມາຂອງ ສປ ຈີນ ແມ່ນມີມູນຄ່າການລົງທຶນສູງກວ່າໝູ່ ໃນບັນດາປະເທດຕ່າງໆ ໂດຍສະເພາະແມ່ນການລົງທຶນໃສ່ບັນດາໂຄງການໃຫຍ່ທີ່ມີລັກສະນະຍຸດທະສາດ ເປັນຕົ້ນແມ່ນໂຄງການກໍ່ສ້າງທາງລົດໄຟ ລາວ-ຈີນ ແລະ ໂຄງການທາງດ່ວນ ແຕ່ນະຄອນຫຼວງວຽງຈັນ ຫາ ບໍ່ເຕັນ ຊາຍແດນ ລາວ-ຈີນ ເພື່ອການເຊື່ອມໂຍງ ແລະ ເຊື່ອມຈອດທາງດ້ານລະບົບຄົມມະນາຄົມຂົນສົ່ງ ແລະ ລະບົບເສດຖະກິດຂອງ ສປປ ລາວ ເຂົ້າຫາ ສປ ຈີນ ແລະ ບັນດາປະເທດອະນຸພາກພື້ນ ແລະ ສາກົນ ເທື່ອລະກ້າວ.
ເຖິງຢ່າງໃດກໍຕາມ ເພື່ອເຮັດໃຫ້ສັນຍາມີຜົນສັກສິດ ພາຍຫຼັງເຊັນສັນຍາແລ້ວ ຂໍໃຫ້ບໍລິສັດຕັ້ງໜ້າສືບຕໍ່ຈັດຕັ້ງປະຕິບັດບັນດາໜ້າວຽກຕ່າງໆທີ່ຍັງຄ້າງ ເປັນຕົ້ນແມ່ນບັນດາເອກະສານຊ້ອນທ້າຍຕ່າງໆໃຫ້ສຳເລັດໂດຍໄວ ແລະ ປະຕິບັດພັນທະຕາມເງື່ອນໄຂຂອງສັນຍາຢ່າງເຄັ່ງຄັດ ພ້ອມທັງເອົາໃຈໃສ່ຕໍ່ບັນຫາທາງດ້ານສິ່ງແວດລ້ອມ ແລະ ສັງຄົມ ເປັນບັນຫາສຳຄັນ ໂດຍປະຕິບັດໃຫ້ສອດຄ່ອງຕາມກົດໝາຍ ແລະ ລະບຽບການຂອງຂະແໜງການທີ່ກ່ຽວຂ້ອງ.
# ຂ່າວ & ພາບ : ສີພອນ ຈັນທະດາລາ