ວັນທີ 9 ເມສາ 2020 ທີ່ ກະຊວງການຕ່າງປະເທດ, ນະຄອນຫຼວງວຽງຈັນ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມທາງໄກ ສະພາປະສານງານອາຊຽນ ຄັ້ງທີ 25 (25th Meeting of the ASEAN Coordinating Council – ACC) ພາຍໃຕ້ການເປັນປະທານຂອງຫວຽດນາມ ໃນຖານະປະທານໝູນວຽນອາຊຽນ ປີ 2020 ໂດຍມີການເຂົ້າຮ່ວມຂອງບັນດາລັດຖະມົນຕີຕ່າງປະເທດອາຊຽນ ແລະ ເລຂາທິການໃຫຍ່ອາຊຽນ.
ກອງປະຊຸມໄດ້ຮັບຊາບ ແລະ ຕີລາຄາສູງ ຕໍ່ຄວາມພະຍາຍາມຂອງແຕ່ລະປະເທດສະມາຊິກອາຊຽນ ກໍຄືອາຊຽນໂດຍລວມ ໃນການປ້ອງກັນ, ຄວບຄຸມ ແລະ ຮັບມືກັບພະຍາດອັກເສບປອດ ຈາກເຊື້ອຈຸລະໂລກສາຍພັນໃຫມ່ ຫຼື ໂຄວິດ-19, ເຊິ່ງສະແດງອອກໃນຜົນສຳເລັດຂອງກອງປະຊຸມສະໄໝພິເສດ ສະພາປະສານງານອາຊຽນ ກ່ຽວກັບພະຍາດໂຄວິດ-19 ດັ່ງກ່າວ ທີ່ຈັດຂຶ້ນໃນເດືອນກຸມພາຜ່ານມາ ຢູ່ ສປ ລາວ ກໍຄື ກອງປະຊຸມທາງໄກໜ່ວຍງານວິຊາການຂອງສະພາປະສານງານອາຊຽນ ວ່າດ້ວຍການຊ່ວຍເຫຼືອສຸກເສີນດ້ານສາທາລະນະສຸກຄັ້ງທຳອິດ ໃນທ້າຍເດືອນມີນາ ລວມທັງບັນດາກອງປະຊຸມທາງໄກຂອງຂະແໜງການກ່ຽວຂ້ອງ ທັງລະດັບລັດຖະມົນຕີ ແລະ ລະດັບວິຊາການ ອັນໄດ້ປະກອບສ່ວນສຳຄັນ ເຂົ້າໃນການຮັດແໜ້ນຄວາມພະຍາຍາມລວມຂອງອາຊຽນ ໃນການຮັບມືກັບພະຍາດດັ່ງກ່າວ.
ພ້ອມນີ້, ກອງປະຊຸມຍັງໄດ້ຮັບຊາບການລາຍງານ ສະພາບການແຜ່ລະບາດຂອງພະຍາດໂຄວິດ-19 ຢູ່ແຕ່ລະປະເທດສະມາຊິກອາຊຽນ ລວມທັງຢູ່ ສປປ ລາວ ເຮົາ ແລະ ໄດ້ປຶກສາຫາລື, ແລກປ່ຽນບົດຮຽນ ແລະ ປະສົບການຮ່ວມກັນ ໃນການສະກັດກັ້ນ, ຄວບຄຸມ ແລະ ຈຳກັດການແຜ່ລະບາດຂອງພະຍາດໂຄວິດ-19. ພິເສດ, ໄດ້ເປັນເອກະພາບກັນສືບຕໍ່ເສີມຂະຫຍາຍການຮ່ວມມືພາຍໃນອາຊຽນ, ອາຊຽນກັບຄູ່ເຈລະຈາ ແລະ ຄູ່ຮ່ວມມື ລວມທັງກັບອົງການຈັດຕັ້ງສາກົນ ໂດຍສະເພາະອົງການອະນາໄມໂລກ ໂດຍຜ່ານບັນດາກົນໄກຮ່ວມມືອາຊຽນທີ່ມີຢູ່. ນອກນັ້ນ, ກໍຢືນຢັນສືບຕໍ່ຮັດແໜ້ນການຮ່ວມມື ເພື່ອຮັບປະກັນສະຖຽນລະພາບທາງດ້ານເສດຖະກິດຂອງພາກພື້ນ ໂດຍສະເພາະໃຫ້ສາມາດຮັກສາໄດ້ການສະໜອງແບບຕ່ອງໂສ້ ດ້ານການຄົມມະນາຄົມຂົນສົ່ງ, ການບໍລິການ ແລະ ການສະໜອງສິນຄ້າອຸປະໂພກ-ບໍລິໂພກ, ຢາປົວພະຍາດ ແລະ ອຸປະກອນການແພດທີ່ຈຳເປັນ.
ພ້ອມກັນນີ້, ກອງປະຊຸມຍັງໄດ້ປຶກສາຫາລື ເພື່ອກະກຽມໃຫ້ແກ່ກອງປະຊຸມສຸດຍອດສະໄໝພິເສດຂອງຜູ້ນຳອາຊຽນ ແລະ ກອງປະຊຸມສຸດຍອດສະໄໝພິເສດຜູ້ນຳອາຊຽນບວກສາມ ກ່ຽວກັບພະຍາດໂຄວິດ-19, ຊຶ່ງຈະຈັດຂຶ້ນໃນມໍ່ໆນີ້.