ວັນທີ 5 ກຸມພາ 2021 ທີ່ທໍານຽບປະທານປະເທດ ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ ໄດ້ຕ້ອນຮັບບັນດາທູດປະເທດເພື່ອນມິດເຂົ້າຍື່ນສານຕາຕັ້ງ ເພື່ອດໍາລົງຕໍາແໜ່ງເປັນເອກອັກຄະລັດຖະທູດຄົນໃໝ່ ປະຈໍາ ສປປ ລາວ ແລະ ມອບສານແຕ່ງຕັ້ງໃຫ້ທູດລາວໄປປະຈຳຢູ່່ປະເທດຕ່າງໆ ຕາມລຳດັບດັ່ງນີ້:
ເວລາ 9:00 ໂມງ ທ່ານ ບຸນຍັງ ວໍລະຈິດ ປະທານປະເທດ ໄດ້ຕ້ອນຮັບທ່ານ ອິມ ມູຮົງ ເຂົ້າຍື່ນສານຕາຕັ້ງເພື່ອດໍາລົງຕໍາແໜ່ງເປັນເອກອັກຄະລັດຖະທູດແຫ່ງ ສ ເກົາຫຼີ ປະຈໍາ ສປປ ລາວ ມີສໍານັກງານການທູດຕັ້ງຢູ່ນະຄອນຫຼວງວຽງຈັນ.
ເວລາ 9:30 ໂມງ ທ່ານ ບຸນຍັງ ວໍລະຈິດ ປະທານປະເທດ ໄດ້ຕ້ອນຮັບທ່ານ ເຈດສະດາ ກະຕະເວທິນ ເຂົ້າຍື່ນສານຕາຕັ້ງເພື່ອດໍາລົງຕໍາແໜ່ງເປັນເອກອັກຄະລາຊະທູດແຫ່ງລາຊະອານາຈັກໄທ ປະຈໍາ ສປປ ລາວ ໂດຍມີສຳນັກງານການທູດຕັ້ງຢູ່ນະຄອນຫຼວງວຽງຈັນ.
ເວລາ 10:00 ໂມງ ທ່ານ ບຸນຍັງ ວໍລະຈິດ ປະທານປະເທດ ໄດ້ຕ້ອນຮັບທ່ານ ໂພລ ແຄລີ ເຂົ້າຍື່ນສານຕາຕັ້ງເພື່ອດໍາລົງຕໍາແໜ່ງເປັນເອກອັກຄະລັດຖະທູດແຫ່ງອົດສະຕຣາລີ ປະຈໍາ ສປປ ລາວ ມີສຳນັກງານການທູດຕັ້ງຢູ່ນະຄອນຫຼວງວຽງຈັນ.
ໃນໂອກາດນີ້ ທ່ານ ບຸນຍັງ ວໍລະຈິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ບັນດາທ່ານທູດປະເທດເພື່ອນມິດ ທີ່ໄດ້ຖືກແຕ່ງຕັ້ງມາດໍາລົງຕໍາແໜ່ງເປັນເອກອັກຄະລັດຖະທູດປະຈໍາຢູ່ ສປປ ລາວ ໃນຄັ້ງນີ້ ພ້ອມທັງໄດ້ແຈ້ງສະພາບການພັດທະນາຂອງລາວໃຫ້ແກ່ບັນດາທ່ານທູດໄດ້ຮັບຊາບ ແລະ ຫວັງວ່າ ໃນຕະຫຼອດໄລຍະຂອງການປະຕິບັດໜ້າທີ່ການທູດຢູ່ລາວ ບັນດາທ່ານທູດຈະປະກອບສ່ວນເສີມສ້າງສາຍພົວພັນ ແລະ ການຮ່ວມມືທີ່ມີຢູ່ແລ້ວນັ້ນ ໃຫ້ນັບມື້ຂະຫຍາຍຕົວຍິ່ງຂຶ້ນເລື້ອຍໆ.
ລັດຖະບານລາວຈະໃຫ້ການຮ່ວມມື ແລະ ອໍານວຍຄວາມສະດວກໃຫ້ແກ່ທຸກທ່ານ ໃນການປະຕິບັດໜ້າທີ່ຢູ່ລາວໃຫ້ປະສົບຜົນສໍາເລັດ ເພື່ອເພີ່ມພູນຄູນສ້າງສາຍພົວພັນ ແລະ ການຮ່ວມມືທີ່ມີມາແຕ່ດົນນານໃຫ້ແໜ້ນແຟ້ນຍິ່ງຂຶ້ນ.
ໃນວັນດຽວກັນ ເວລາ 10:30 ໂມງ ທ່ານ ບຸນຍັງ ວໍລະຈິດ ກໍໄດ້ມອບສານແຕ່ງຕັ້ງໃຫ້ທ່ານ ນາງ ວິລະວັນ ເຢ່ຍປໍເຮີ່ (ຫົວໜ້າກົມຄົ້ນຄວ້າ-ສັງລວມ ຄະນະພົວພັນຕ່າງປະເທດສູນກາງພັກ) ເພື່ອໄປດໍາລົງຕໍາແໜ່ງເປັນເອກອັກຄະລັດຖະທູດ ແຫ່ງ ສປປ ລາວ ປະຈຳຣັດເຊຍ ແລະ ທ່ານນາງ ຟອງສະໝຸດ ອັ່ນລາວັນ (ຫົວໜ້າກົມກວດກາ ກະຊວງການຕ່າງປະເທດ ປະທານສະຫະພັນແມ່ຍິງກະຊວງການຕ່າງປະເທດ) ເພື່ອໄປດໍາລົງຕໍາແໜ່ງເປັນເອກອັກຄະລັດຖະທູດແຫ່ງ ສປປ ລາວ ປະຈຳຍີ່ປຸ່ນ.
ທ່ານປະທານປະເທດໄດ້ສະແດງຄວາມຍ້ອງຍໍຊົມເຊີຍຕໍ່ຜູ້ທີ່ຖືກແຕ່ງຕັ້ງໃຫ້ໄປປະຕິບັດໜ້າທີ່ການທູດຢູ່ຕ່າງປະເທດ ແລະ ເນັ້ນໃຫ້ປະຕິບັດໜ້າທີ່ຢ່າງຕັ້ງໜ້າ ເພື່ອປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນການທູດ ກໍຄືການຮ່ວມມືດ້ານອື່ນໆລະຫວ່າງປະເທດໃຫ້ເກີດດອກອອກຜົນ ແລະ ຂະຫຍາຍຕົວຍິ່ງໆຂຶ້ນ.
# ຂ່າວ & ພາບ: ລັດເວລາ