ກອງປະຊຸມສະຫຼຸບວຽກງານແຜນການ ແລະ ການລົງທຶນທົ່ວປະເທດ ປະຈຳປີ 2020 ແລະ ທິດທາງປີ 2021 ຈັດຂຶ້ນວັນທີ 4 ກຸມພາ 2021 ຢູ່ກະຊວງແຜນການ ແລະ ການລົງທຶນ (ກຜທ) ໂດຍເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ (ກຜທ) ມີຮອງລັດຖະມົນຕີ ຮອງປະທານອົງການທຽບເທົ່າ ເຈົ້າແຂວງ ຮອງເຈົ້າແຂວງ ຮອງເຈົ້າຄອງນະຄອນຫຼວງວຽງຈັນ ຫົວໜ້າ ຮອງຫົວໜ້າກົມ ຫົວໜ້າພະແນກແຜນການ ແລະ ການລົງທຶນທົ່ວປະເທດ ແລະ ພະນັກງານຫຼັກແຫຼ່ງອ້ອມຂ້າງກະຊວງເຂົ້າຮ່ວມ.
ທ່ານ ກິແກ້ວ ຈັນທະບູຣີ ຮອງລັດຖະມົນຕີກະຊວງແຜນການ ແລະ ການລົງທຶນ ໄດ້ສະຫຼຸບຕີລາຄາແຜນການປີ 2020 ແລະ ທິດທາງແຜນການ 5 ປີ ຄັ້ງທີ IX (2016-2020) ແລະ ທິດທາງແຜນການ 5 ປີຄັ້ງທີ IX (2021-2025) ໃຫ້ຮູ້ກ່ຽວກັບສະພາບ ການຈັດຕັ້ງປະຕິບັດວຽກງານທີ່ພົ້ນເດັ່ນຂອງລັດຖະບານໃນໄລຍະ 5 ປີຜ່ານມາ ແລະ ຕີລາຄາການຈັດຕັ້ງປະຕິບັດວຽກງານຂອງລັດຖະບານໃນປີ 2020 ສຳລັບທິດທາງຕໍ່ໜ້າ ເພື່ອເສີມສ້າງການຜະລິດ ແລະ ບໍລິການພາຍໃນປະເທດ ແຕ່ຍ້ອນສະພາບຄວາມຫຍຸ້ງຍາກຂອງເສດຖະກິດມະຫາພາກທີ່ສະສົມ ເປັນຕົ້ນແມ່ນບັນຫາໜີ້ສິນພາຍໃນ ແລະ ຕ່າງປະເທດ ການຂາດດູນການຄ້າ ຖານລາຍຮັບບໍ່ແນ່ນອນ ເຮັດໃຫ້ອັດຕາການຂະຫຍາຍຕົວຂອງເສດຖະກິດ (GDP) ຢູ່ໃນລະດັບ 3,3% (ແຜນດັດແກ້ 3,3-3,6%) ມູນຄ່າຕາມລາຄາໃນປີ ປະມານ 173.138 ຕື້ກີບ ສະເລ່ຍຕໍ່ຫົວຄົນ ຈະສາມາດບັນລຸໄດ້ 2.664 ໂດລາສະຫະລັດ ການລົງທຶນຂອງລັດໃນໄລຍະ 9 ເດືອນ ສາມາດຈັດຕັ້ງປະຕິບັດວຽກ ແລະ ຢັ້ງຢືນ ເພື່ອສະເໜີຂໍຊໍາລະຈາກຂະແໜງ ແຜນການ 4.360 ໂຄງການ ເປັນທຶນ 1.608,90 ຕື້ກີບ ເທົ່າກັບ 46,27% ຂອງແຜນດັດແກ້ (ແຜນດັດແກ້ 3.477,33 ຕື້ກີບ) ສາມາດຊໍາລະຕົວຈິງໄດ້ 1.299 ຕື້ກີບ ເທົ່າກັບ 37,35% ຂອງແຜນດັດແກ້ ໃນປີ 2020 ໄດ້ມີການເລື່ອນຈ່າຍໂຄງການລົງທຶນຂອງລັດ ຈໍານວນ 700 ຕື້ກີບ ເພື່ອຈ່າຍໃນປີ 2021.
ໄດ້ຫັນການເກັບລາຍຮັບ-ຄຸ້ມຄອງລາຍຈ່າຍ ໄປສູ່ລະບົບທັນສະໄໝຫຼາຍຂຶ້ນ ຄຽງຄູ່ກັບການປັບປຸບການຈັດຕັ້ງ ເຂັ້ມງວດ ການປະຕິບັດກົດໝາຍ ແລະ ລະບຽບການຕ່າງໆ ເພື່ອສະກັດກັ້ນການຮົ່ວໄຫຼຂອງງົບປະມານ ແລະ ການລະເມີດວິໄນການເງິນ ແຕ່ເນື່ອງຈາກການລະບາດຂອງພະຍາດໂຄວິດ-19 ໄດ້ສົ່ງຜົນໃຫ້ການເກັບລາຍຮັບບໍ່ສາມາດບັນລຸໄດ້ຕາມແຜນທີ່ວາງໄວ້.
ສຳລັບທິດທາງໃນຕໍ່ໜ້າ ປີ 2021 ເປັນປີເລີ່ມຕົ້ນຂອງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025) ເຊິ່ງເປົ້າໝາຍ ແລະ ທິດທາງຕົ້ນຕໍຂອງການພັດທະນາເສດຖະກິດ-ສັງຄົມ ຍັງແມ່ນການສືບຕໍ່ເຮັດໃຫ້ປະເທດມີສະຖຽນລະພາບທາງດ້ານການເມືອງ ສັງຄົມມີຄວາມເປັນລະບຽບຮຽບຮ້ອຍ ເສດຖະກິດໃຫ້ກັບຄືນສູ່ສະພາບປົກກະຕິໂດຍໄວ ແລະ ສືບຕໍ່ຂະຫຍາຍຕົວຫັນສູ່ຄຸນນະພາບ ຈຸດສຸມ ຍືນຍົງ ແລະ ໄປຕາມທິດສີຂຽວ ເພື່ອນໍາພາປະເທດຊາດຫຼຸດພົ້ນອອກຈາກສະຖານະພາບຄວາມດ້ອຍພັດທະນາ ແລະ ກ້າວສູ່ເປັນປະເທດລາຍຮັບປານກາງສູງໃນປີ 2030.
# ຂ່າວ & ພາບ: ອຸເປຂາ