ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 72 ປີ (20 ມັງກອນ 1949 ຫາ 20 ມັງກອນ 2021) ທີ່ໄດ້ໝູນວຽນມາບັນຈົບຄົບຮອບອີກວາລະໜຶ່ງ ໃນວັນທີ 27 ມັງກອນ 2021 ຄະນະບໍລິຫານງານຊາວໜຸ່ມ ປປລ ນະຄອນຫຼວງວຽງຈັນ ພ້ອມດ້ວຍເລຂາຊາວໜຸ່ມເມືອງ ພະແນກການ ແລະ ໂຮງຮຽນເອກະລາດ ໄດ້ເຂົ້າອວຍພອນ ແລະ ຢ້ຽມຢາມນາຍ ແລະ ພົນທະຫານຢູ່ໃນນະຄອນຫຼວງວຽງຈັນ.
ໃນການຢ້ຽມຢາມຄັ້ງນີ້ ຄະນະຊາວໜຸ່ມກໍໄດ້ມອບເຄື່ອງອຸປະໂພກ-ບໍລິໂພກໃຫ້ແກ່ນາຍ ແລະ ພົນທະຫານ ໃນນະຄອນຫຼວງວຽງຈັນ ເຊິ່ງປະກອບມີ: ກອງຮ້ອຍຊາຍແດນ 241 ປາກຕອນ ເມືອງສັງທອງ ກອງຮ້ອຍຊາຍແດນ 244 ບ້ານພ້າວ ເມືອງປາກງື່ມ ແລະ ຄະນະຊາວໜຸ່ມຮາກຖານກອງບັນຊາການທະຫານນະຄອນຫຼວງວຽງຈັນ.
ສໍາລັບເຄື່ອງທີ່ນໍາມາມອບ ປະກອບມີ: ຕູ້ແຊ່ນໍ້າເຢັນ 5 ໜ່ວຍ ພັດລົມ 10 ໜ່ວຍ ເສື້ອກັນໜາວ 100 ຜືນ ເຂົ້າສານ ໝີ່ສໍາເລັດຮູບ ປາກະປອງ ແຟັບ ກາເຟ ນໍ້າດື່ມ ແລະ ອື່ນໆ ລວມມູນຄ່າ 70 ລ້ານກວ່າກີບ ທັງນີ້ກໍເພື່ອສະແດງຄວາມກະຕັນຍູຮູ້ບຸນຄຸນຕໍ່ກຳລັງກອງທັບປະຊາຊົນລາວ ເຊິ່ງຄະນະຊາວໜຸ່ມປະຊາຊົນ ປະຕິວັດລາວ ມີຕົ້ນກໍາເນີດຈາກກອງລາດຊະວົງໃນສະໄໝຕໍ່ສູ້ກູ້ຊາດແຕ່ລະໄລຍະ ພ້ອມທັງເປັນການປູກຈິດສໍານຶກໃຫ້ຖັນແຖວຊາວໜຸ່ມ ໄດ້ຮັບຮູ້ ແລະ ເຂົ້າໃຈຢ່າງເລີກເຊິ່ງ ເຖິງມູນເຊື້ອວິລະກໍາອັນພິລາດອາດຫານຂອງກອງທັບປະຊາຊົນລາວ ທີ່ໄດ້ເສຍສະຫຼະຊີວິດເລືອດເນື້ອ ເພື່ອຕໍ່ສູ້ປົດປ່ອຍອອກຈາກພວກຈັກກະພັດດລ່າເມືອງຂຶ້ນຕ່າງໆ.
# ຂ່າວ & ພາບ : ວຽງມາ