ຊໍາຊຸງ (SAMSUNG) ເປິດຕົວສະມາດໂຟນຮຸ່ນໃໝ່ Galaxy S21 ພ້ອມກັນ 3 ຮຸ່ນ ໃນງານເປີດຕົວເມື່ອວັນພະຫັດທີ່ຜ່ານມາ ເຊີດຊູສັກກະຍະພາບຂອງສະມາດໂຟນທີ່ກ້າວໜ້າຂຶ້ນ ທັງໜ້າຈໍໃຫຍ່ຂຶ້ນ ກ້ອງຄົມແຈ້ງຖ່ານສາກທົນທານຍາວນານ ຂະນະທີ່ປັບຫຼຸດລາຄາລົງມາ ເພື່ອຊ່ວຍເຫຼືອຜູ້ຄົນທົ່ວໂລກທີ່ໄດ້ຮັບຄວາມເດືອດຮ້ອນດ້ານເສດຖະກິດຈາກວິກິດໂຄວິດ ຕາມລາຍງານຂອງ Associated Press.
ສະມາດໂຟນຮຸ່ນໃໝ່ Galaxy S21 ທັງ 3 ຮຸ່ນນີ້ ລາຄາຫຼດຕ່ຳລົງກວ່າປີກ່ອນ 7-20% ຈາກທີ່ຕົ້ນທຶນການຜະລິດສະມາດໂຟນທີ່ຮອງຮັບລະບົບເຄືອຂ່າຍ 5G ມີລາຄາຫຼຸດລົງໃນໄລຍະທີ່ຜ່ານມາ ແລະ ຄວາມຕັ້ງໃຈຂອງຊໍາຊຸງ ໃນການຜະລິດສະມາດໂຟນທີ່ລາຄາເຂົ້າເຖິງໄດ້ໃນທຸກກຸ່ມລູກຄ້າ.
ໂດຍ Galaxy S21 ລາຄາເລີ່ມຕົ້ນທີ່ 800 ໂດລາສະຫະລັດ (7.469.496 ກີບ) ຫຼຸດລົງປະມານ 20% ຈາກຮຸ່ນໃໝ່ທີ່ຈຳໜ່າຍໃນປີກ່ອນ ສ່ວນຮຸ່ນກາງ Galaxy S21 Plus ລາຄາ 1.000 ໂດລາສະຫະລັດ (9.341.840 ກີບ) ຫຼຸດລົງ 17% ຈາກຮຸ່ນ S20 ໃນລະດັບເທົ່າກັນ ແລະ Galaxy S21 Ultra ເຊິ່ງຈະເປັນສະມາດໂຟນຕະກູນ S ຮຸ່ນທໍາອິດທີ່ສາມາດໃຊ້ປາກກາ Samsung pen ເຊິ່ງໃຊ້ກັບ Galaxy Note ໄດ້ ຈຳໜ່າຍໃນລາຄາ 1.300 ໂດລາສະຫະລັດ (12.144.392 ກີບ) ຫຼຸດລົງ 100 ໂດລາ ຈາກຮຸ່ນ S20 ທີ່ເປິດຕົວປີກ່ອນ ແລະ ພ້ອມຈຳໜ່າຍວັນທີ 29 ມັງກອນນີ້.
ບໍ່ເທົ່າໃດປີມານີ້ ຜູ້ຜະລິດສະມາດໂຟນ ຕ່າງປັບຫຼຸດລາຄາສະມາດໂຟນຮຸ່ນໃໝ່ໃຫ້ຜູ້ບໍລິໂພກເຂົ້າເຖິງໄດ້ ກ່ອນໜ້ານີ້ ແອັບເປິລ ເປີດຕົວໄອໂຟນຮຸນໃໝ່ສະມາດໂຟນໃນຫຼາຍລະດັບລາຄາ ແລະ ຊໍາຊຸງເປັນຍີ່ຫໍ້ຫຼ້າສຸດທີ່ຕາມກະແສນີ້ ຈາກທີ່ຍອດຂາຍ Galaxy S20 ທີ່ເປີດຕົວເມື່ອປີກ່ອນຫຼຸດລົງເຖິງ 29% ເຮັດໃຫ້ຊໍາຊຸງຫຼົ່ນຈາກບັນລັງຍອດຂາຍສະມາດໂຟນຫຼາຍທີ່ສຸດໃນໂລກໄປໄລຍະໜຶ່ງ.