ມີຄວາມຜິດຍ້ອນການລະເມີດ ລະບຽບການຄຸ້ມຄອງວັດຖຸໄວໄຟ ທາດເບື່ອ

ສິ່ງທີ່ຜູ້ຂຽນຍົກມານີ້ ມັນເກີດຂຶ້ນແລ້ວ ແລະ ເກີດຂຶ້ນຕົວຈິງ ພ້ອມກັນນັ້ນ ມັນກໍ່ສ້າງຄວາມເສຍຫາຍຕົວຈິງໃຫ້ແກ່ ຊີວິດ ສຸຂະພາບ ຂອງມະນຸດ ລວມທັງຊັບສິນທີ່ເປັນຂອງລັດ ແລະ ສ່ວນຕົວຂອງພົນລະເມືອງຜູ້ຊຶ່ງຢູ່ໃນເຫດການທີ່ຊາຍແດນ ແຂວງສະຫວັນນະເຂດ ໃນໄລຍະທ້າຍ ຂອງປີກາຍມານີ້ ໄຟໄດ້ລຸກລາມ ຄວັນດຳມືດ ເຜົາຜານຮ່າງກາຍ ສຽງເນືອງນັນ ແລະ ແຊວຮ້ອງຈາກຜູ້ທີ່ເຫັນເຫດການຊ່າງໜ້າເວດທະນາ ຍ້ອນຄວາມລະເຫຼີງຂອງມະນຸດ ຍ້ອນການຂາດຄວາມລະມັດ ລະວັງ ຍ້ອນການລະເມີດລະບຽບການໃນການຄຸ້ມຄອງວັດຖຸໄວໄຟ ທາດເບື່ອນັ້ນເອງ.

ບໍ່ແມ່ນວ່າເຫດເກີດແລ້ວຈຶ່ງຫາທາງປ້ອງກັນ ແຕ່ຄວາມຜິດຂອງບຸກຄົນ ຂອງລວມໝູ່ທີ່ເກີດຂຶ້ນ ຍ້ອນການລະເມີດລະບຽບການໃນການຄຸ້ມຄອງວັດຖຸໄວໄຟ ທາດເບື່ອນີ້ ມັນໄດ້ຖືກກຳນົດໄວ້ຢຸ່ໃນປະມວນກົດໝາຍອາຍາແລ້ວກ່ອນໜ້ານີ້.

ການກະທຳຜິດໄດ້ຖືກກຳນົດໄວ້ຢູ່ໃນມາດຕາ 179 ເນື້ອໃນຂອງມາດຕານີ້ໄດ້ກຳນົດວ່າ ບຸກຄົນໃດຫາກໄດ້ລະເມີດລະບຽບການກ່ຽວກັບການຄຸ້ມຄອງການຜະລິດ ການເກັບຮັກສາ ການຂົນສົ່ງ ການນຳໃຊ້ ຫຼື ການຄ້າຂາຍ ວັດຖຸໄວໄຟ ທາດເບື່ອ ທີ່ສ້າງຄວາມເສຍຫາຍຢ່າງຫຼວງຫຼາຍ ຈະຖືກລົງໂທດຕັດອິດສະຫຼະພາບ ແຕ່ 3 ເດືອນ ຫາ 1 ປີ ແລະ ຈະຖືກປັບໃໝແຕ່ 1.000.000 ຫາ 10.000.000 ກີບ.

ໃນກໍລະນີການກະທຳຜິດ ຫາກພາໃຫ້ເກີດອຸບັດເຫດ ຊຶ່ງພາໃຫ້ມີຄົນໄດ້ຮັບບາດເຈັບ ຈະຖືກລົງໂທດຕັດອິດສະຫຼະພາບ ແຕ່ 6 ເດືອນ ຫາ 3 ປີ ແລະ ຈະຖືກປັບໃໝແຕ່ 2.000.000 ຫາ 15.000.000 ກີບ.

ໃນກໍລະນີການກະທຳຜິດ ຫາກພາໃຫ້ມີຄົນໄດ້ຮັບບາດເຈັບສາຫັດ ເສຍອົງຄະ ຫຼື ພິການ ຈະຖືກລົງໂທດຕັດອິດສະຫຼະພາບ ແຕ່ 1 ເດືອນ ຫາ 4 ປີ ແລະ ຈະຖືກປັບໃໝແຕ່ 3.000.000 ຫາ 20.000.000 ກີບ.

ໃນກໍລະນີການກະທຳຜິດ ຫາກພາໃຫ້ມີຄົນເສຍຊີວິດ ຈະຖືກລົງໂທດຕັດອິດສະຫຼະພາບ ແຕ່ 2 ປີ ຫາ 5 ປີ ແລະ ຈະຖືກປັບໃໝແຕ່ 4.000.000 ຫາ 35.000.000 ກີບ.

ໃນກໍລະນີການກະທຳຜິດ ຫາກພາໃຫ້ມີຄົນຊີວິດແຕ່ 2 ຄົນຂຶ້ນໄປ ຈະຖືກລົງໂທດຕັດອິດສະຫຼະພາບ ແຕ່ 5 ເດືອນ ຫາ 10 ປີ ແລະ ຈະຖືກປັບໃໝແຕ່ 5.000.000 ຫາ 50.000.000 ກີບ.

ນີ້ແມ່ນມາດຕະການທາງອາຍາ ທີ່ຈະ ລົງໃສ່ຜູ້ກະທຳຜິດທີ່ໄດ້ລະເມີດລະບຽບການກ່ຽວກັບການຄຸ້ມຄອງວັດຖຸໄວໄຟ, ທາດເບື່ອ ແຕ່ຖ້າຫາກຜູ້ລະເມີດລະບຽບການດັ່ງກ່າວຫາກເສຍຊີວິດຈະເອົາໃຜມາລົງໂທດ? ກໍແນ່ນອນ ຖ້າຫາກການລະເມີດລະບຽບການດັ່ງກ່າວ ມັນກ່ຽວຂ້ອງກັບຫຼາຍຄົນ ນອກຈາກຜູ້ເສຍຊີວິດທີ່ບໍ່ໄດ້ຮັບໂທດແລ້ວ ກໍຕ້ອງນຳເອົາຜູ້ທີ່ກ່ຽວຂ້ອງນັ້ນ ມາລົງໂທດຕາມກົດໝາຍ ດັ່ງນັ້ນ ໃຜກໍຕາມ ກໍຕ້ອງຫຼີກເວັ້ນຜົນປະໂຫຍດໃດທີ່ໄດ້ມາຍ້ອນການລະເມີດກົດໝາຍ ແລະ ລະບຽບການທີ່ລັດວາງອອກ ເພາະບໍ່ມື້ໃດກໍມື້ໜຶ່ງມັນຕ້ອງເກີດຄວາມເສຍຫາຍຂຶ້ນຢ່າງແນ່ນອນ ຍ້ອນການລະເມີດລະບຽບການນັ້ນ.

ໂດຍ: ໄມ້ງັດ