ເມື່ອຂໍ້ຕົກລົງສຽງເນືອງນັນຖືກທ້າທາຍ ຈະແກ້ຢ່າງໃດ ?

ຄໍ​ລຳ​ພວກ​ເຮົາ​ໄດ້​ນຳ​ສະ­ເໜີ ບັນ­ຫາ​ນີ້​ມາ​ສອງ ບົດ​ແລ້ວ…ໂດຍ​ບົດ​ທຳ​ອິດ ແມ່ນ​ພາຍ​ໃຕ້​ຫົວ­ຂໍ້ ນະ­ຄອນ­ຫຼວງ ມີ​ລະ­ບຽບ​ການ​ຄວບ​ຄຸມ​ສຽງ​ເນືອງ ນັນ ສະ­ບັບ​ລົງ​ວັນ​ທີ 9 ຕຸ­ລາ 2020 ເຊິ່ງ​ເລົ່າ ເລື່ອງ​ການ​ຈູດ​ໝາກ​ກະ­ໂພກ​ໃນ​ຄ່ຳ​ຄືນ​ວັນ​ສຸກ ທີ 2 ຕຸ­ລາ 2020 (ບຸນ​ອອກ​ພັນ​ສາ)…ຕໍ່​ມາ​ບົດ​ທີ ສອງ​ໃນ​ຫົວ­ຂໍ້ ການ​ຄວບ​ຄຸມ​ສຽງ​ເນືອງ​ນັນ ຍັງ​ບໍ່​ໄດ້ ຮັບ​ການ​ປະ­ຕິ­ບັດ ສະ­ບັບ​ລົງ​ວັນ​ທີ 4 ພະ­ຈິກ 2020 ໂດຍ​ກ່າວ​ເຖິງ​ການ​ເປີດ​ສຽງ​ດັງ​ຖ້ວມ​ບ້ານ​ຖ້ວມເມືອງ ຈາກ​ເຄື່ອງ​ສຽງ​ລົດ​ທີ່​ແລ່ນ​ຕາມ​ຖະ­ໜົນ ແລະ ການ​ຕັ້ງ​ວົງ​ດື່ມ­ນ້ຳ​ເມົາ​ເປີດ​ເພງ​ດັງ​ຈົນ​ຊອດ​ແຈ້ງ…ລວມ​ເຖິງ​ງານ​ດອງ-ງານ​ບຸນ​ກາງ­ແຈ້ງ.

ເຫດ­ການ​ຈະ​ຍົກ​ຂຶ້ນ​ມາ​ໃນ​ບົດ​ນີ້ ແມ່ນ​ການ​ລະ ເມີດ ຫຼື ວ່າ​ທ້າ​ທາຍ​ຂໍ້​ຕົກ­ລົງ​ຢ່າງ​ໂຈ່ງ​ແຈ້ງ.

ສຳ­ລັບ​ຂໍ້​ຕົກ­ລົງ​ວ່າ​ດ້ວຍ​ການ​ຄວບ​ຄຸມ​ສຽງ ເນືອງ​ນັນ​ຢູ່​ນະ­ຄອນ­ຫຼວງ​ວຽງ​ຈັນ ແມ່ນ​ສະ­ບັບ​ລົງ ວັນ​ທີ 29 ກັນ­ຍາ 2020 ເລກ​ທີ 620/ຈ​ນວ.

ຫາກ​ນັບ​ແຕ່​ມື້​ຂໍ້​ຕົກ­ລົງ​ມາ​ເຖິງ​ມື້​ທີ່​ຂໍ້​ຕົກ­ລົງ​ຖືກ ທ້າ​ທາຍ​ຢ່າງ​ໜັກ ຄື​ຄືນ​ວັນ​ທີ 31 ທັນ­ວາ 2020 ແລ້ວ​ເວ­ລາ​ກໍ​ບໍ່​ພໍ​ທໍ່​ໃດ ? ຫຼາຍ​ຄົນ​ຄົງ​ຈື່​ເຫດ­ການ​ດັ່ງ­ກ່າວ​ໃນ​ຄືນ​ນັ້ນ ເພາະ​ເຫດ­ການ​ຜ່ານ​ມາ​ສົດໆ ຮ້ອນໆ.

ຜູ້​ຂຽນ​ຂໍ​ຍົກ​ເອົາ​ບາງ​ມາດ­ຕາ​ທີ່​ເຫັນ​ວ່າ ຄວນ​ໄດ້​ເຄັ່ງ​ເຂົ້າ​ຕື່ມ ເຊັ່ນ:

ມາດ­ຕາ 27 ມາດ​ຕະ­ການ​ຕໍ່​ຜູ້​ລະ­ເມີດ

– ບຸກ­ຄົນ ນິ­ຕິ­ບຸກ­ຄົນ ແລະ ການ­ຈັດ­ຕັ້ງ​ທີ່​ລະ ເມີດ​ມາດ​ຕະ­ການ​ຄວບ​ຄຸມ​ສຽງ​ເນືອງ​ນັນ​ຕາມ​ຂໍ້​ຕົກ­ລົງ​ສະ­ບັບ​ນີ້ ຈະ​ຖືກ​ສຶກ​ສາ​ອົບ­ຮົມ ກ່າວ​ເຕືອນ ປັບ​ໃໝ ຍົກ­ເລີກ​ກິດ­ຈະ­ການ ຫຼື ດຳ­ເນີນ​ຄະ­ດີ​ຕາມ​ກົດ­ໝາຍ​ຕາມ​ກໍ­ລະ­ນີ​ໜັກ ຫຼື ເບົາ.

– ພະ­ນັກ­ງານ ເຈົ້າ​ໜ້າ­ທີ່ ທີ່​ໄດ້​ຮັບ​ການ​ມອບ​ໝາຍ​ໄດ້​ລະ­ເມີດ​ຂໍ້​ຫ້າມ ຂາດ​ຄວາມ​ຮັບ­ຜິດ­ຊອບ​ຕໍ່­ໜ້າ​ທີ່ ທີ່​ໄດ້​ຮັບ​ການ​ມອບ​ໝາຍ ຫຼື ກະ­ທຳ​ເກີນ​ເຫດ ຈະ ຖືກ​ສຶກ​ສາ​ອົບ­ຮົມ ກ່າວ​ເຕືອນ ຫຼື ລົງ​ວິ­ໄນ ຕາມ​ທີ່​ໄດ້​ກຳ­ນົດ​ໄວ້​ໃນ​ກົດ­ໝາຍ​ວ່າ​ດ້ວຍ​ພະ­ນັກ­ງານ-ລັດ­ຖະ­ກອນ.

ມາດ­ຕາ 29 ການ­ຈັດ­ຕັ້ງ​ປະ­ຕິ­ບັດ

29.1: ມອບ​ໃຫ້​ກອງ​ບັນ­ຊາ​ການ​ປ້ອງ​ກັນ​ຄວາມ ສະ­ຫງົບ ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ນະ­ຄອນ­ຫຼວງ​ວຽງ​ຈັນ ແລະ ພາກ­ສ່ວນ​ກ່ຽວ­ຂ້ອງ​ເປັນ ເຈົ້າ​ການ​ປະ­ສານ​ສົມ­ທົບ​ກັນ ຈັດ​ຕັ້ງ​ຜັນ​ຂະ­ຫຍາຍ ຂໍ້​ຕົກ­ລົງ​ສະ­ບັບ​ນີ້ ຢ່າງ​ມີ​ປະ​ສິດ­ທິ​ຜົນ.

29.2: ພະ­ແນກ­ການ ອົງ­ການ​ທຽບ​ເທົ່າ ພະ​ແນກ​ຂັ້ນ​ນະ­ຄອນ­ຫຼວງ​ວຽງ​ຈັນ ອົງ­ການ​ປົກ­ຄອງ ເມືອງ ອົງ­ການ​ປົກ­ຄອງ​ບ້ານ ບຸກ­ຄົນ ນິ­ຕິ­ບຸກ­ຄົນ ອົງ​ການ­ຈັດ­ຕັ້ງ​ພາຍ​ໃນ ແລະ ຕ່າງ­ປະ­ເທດ ຢູ່​ນະ ຄອນ​ຫຼວງ​ວຽງ​ຈັນ ທີ່​ກ່ຽວ­ຂ້ອງ ຈົ່ງ​ຮັບ​ຮູ້ ແລະ ຈັດ​ຕັ້ງ​ປະ­ຕິ­ບັດ​ຂໍ້​ຕົກ­ລົງ​ສະ­ບັບ​ນີ້​ຢ່າງ​ເຂັ້ມ​ງວດ

ພຽງ​ແຕ່​ຍົກ​ສອງ​ມາດ­ຕາ ກໍ​ຮູ້​ໂລດ​ວ່າ ໜ້າ­ທີ່​ຈະ ປະ­ຕິ­ບັດ​ຕໍ່​ການ​ທ້າ​ທາຍ​ຂໍ້​ຕົກ­ລົງ​ດັ່ງ­ກ່າວ ມີ​ພາກ­ສ່ວນ​ໃດ​ແດ່?.

ຢ່າ​ລືມ​ວ່າ ປີ​ໃໝ່​ຂອງ​ພີ່­ນ້ອງ​ຫວຽດ­ນາມ ແລະ ຈີນ ຕ່າງ​ດ້າວ​ຢູ່​ນະ­ຄອນ­ຫຼວງ​ວຽງ​ຈັນ ກໍ​ຈະ​ມາ ເຖິງ​ໃນ​ບໍ່​ຊ້າ​ນີ້ (ວັນ​ທີ 12-14 ກຸມ­ພາ 2021) ສະ­ນັ້ນ ຄືນ​ວັນ​ທີ 11 ກຸມ­ພາ ຂໍ້​ຕົກ­ລົງ​ນີ້ ຫາກ​ບໍ່​ອຸ່ນ​ຄືນ ແລະ ຈັດ​ຕັ້ງ​ປະ­ຕິ­ບັດ​ແລ້ວ ຄິດ​ວ່າ​ຈະ​ຖືກ​ທ້າ ທາຍ​ອີກ​ຄັ້ງ ກໍ​ເປັນ​ໄດ້.

ມີ​ການ​ສັງ­ເກດ​ວ່າ ຢູ່​ນະ­ຄອນ­ຫຼວງ​ເຮົາ ມີ​ຫຼາຍ​ແຈ້ງ​ການ ຂໍ້​ຕົກ­ລົງ ບໍ່​ຄ່ອຍ​ຖືກ​ຈັດ​ຕັ້ງ​ປະ­ຕິ­ບັດ​ຢ່າງ ເຂັ້ມ​ງວດ…ສະ­ນັ້ນ ກ້າວ​ສູ່​ປີ 2021 ຄວນ​ໄດ້​ທົບ ທວນ­ຄືນ​ວ່າ ເຮົາ​ຈະ​ເຂັ້ມ​ງວດ ຫຼື ຈະ​ແກ້​ຢ່າງ­ໃດ ? ເພື່ອ​ອະ­ທິ­ບາຍ​ໃຫ້​ສັງ­ຄົມ​ເຂົ້າ­ໃຈ.

ຂໍ​ຮຽກ­ຮ້ອງ​ໃຫ້​ການ­ຈັດ­ຕັ້ງ​ກ່ຽວ­ຂ້ອງ​ຫັນ​ກຽວ ເຂົ້າ​ຕື່ມ.

ໂດຍ: ແນວ​ລາວ

error: Content is protected !!