ໃນໄລຍະ 5 ປີຜ່ານມາ ເສດຖະກິດແຫ່ງຊາດສືບຕໍ່ຂະຫຍາຍຕົວຢ່າງຕໍ່ເນື່ອງ ເຊິ່ງສະເລ່ຍ ຄາດວ່າຈະຢູ່ໃນລະດັບ 5,8% ຕໍ່ປີ ແລະ ໃນປີ 2020 ຄາດວ່າຈະຂະຫຍາຍຕົວປະມານ 3,3% ເຊິ່ງປັດໄຈຫຼັກແມ່ນມາຈາກການເຕີບໃຫຍ່ຂອງຂະແໜງອຸດສາຫະກຳ ທີ່ຂະຫຍາຍຕົວສະເລ່ຍຢູ່ໃນລະດັບ 9,1% ເຊິ່ງຂະແໜງການທີ່ພົ້ນເດັ່ນແມ່ນໄຟຟ້າ ແລະ ການກໍ່ສ້າງ.
ແຕ່ເຫັນວ່າອັດຕາການຂະຫຍາຍຕົວມີທ່າອ່ຽງຫຼຸດລົງຢ່າງຕໍ່ເນື່ອງ ແລະ ຫຼຸດແຜນການວາງໄວ້ ໃນນີ້ ຂະແໜງກະສິກໍາຂະຫຍາຍຕົວສະເລ່ຍ 2,1% ອຸດສາຫະກໍາຂະຫຍາຍຕົວສະເລ່ຍ 9,1% ການບໍລິການຂະຫຍາຍຕົວສະເລ່ຍ 4,8% ແລະ ພາສີອາກອນຂະຫຍາຍສະເລ່ຍ 5,2%.
ສະຫາຍ ທອງລຸນ ສີສຸລິດ ສົມມະການກົມການເມືອງສູນກາງພັກ ນາຍົກລັດຖະມົນຕີ ກ່າວໃນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນ ປະຕິວັດລາວ ວ່າ: ປັດໄຈທີ່ຊຸກຍູ້ການຂະຫຍາຍຕົວເສດຖະກິດສ່ວນໃຫຍ່ ມາຈາກຂະແໜງການອຸດສາຫະກໍາ ໂດຍສະເພາະໃນຂະແໜງພະລັງງານໄຟຟ້າ ແລະ ການກໍ່ສ້າງ ສໍາລັບຂະແໜງບໍລິການການຂາຍຍົກ-ຂາຍຍ່ອຍ ການເງິນ ແລະ ປະກັນໄພ ມີການຂະຫຍາຍຕົວດີ ແຕ່ການປະກອບສ່ວນຕໍ່ເສດຖະກິດບໍ່ສູງ.
ສາເຫດຕົ້ນຕໍທີ່ອັດຕາການຂະຫຍາຍຕົວຂອງເສດຖະກິດຊ້າລົງ ແລະ ບໍ່ບັນລຸແຜນການວາງໄວ້ ຍ້ອນການຂະຫຍາຍຕົວຂອງຂະແໜງ ກະສິກໍາມີທ່າອ່ຽງຫຼຸດລົງ ແລະ ຖືກຜົນກະທົບຈາກໄພທໍາມະຊາດ ຂະແຫນງບໍ່ແຮ່ ແລະ ການຂຸດຄົ້ນມີທ່າອ່ຽງຫຼຸດລົງຈົນຕິດລົບ ນັບແຕ່ໄລຍະປີ 2017-2019 ແລະ ການຂະຫຍາຍຕົວຂອງອຸດສາຫະກໍາປຸງແຕ່ງຍັງຊັກຊ້າ.
ຂະນະດຽວກັນ ການຂະຫຍາຍຕົວຂອງຂະແຫນງບໍລິການກໍມີທ່າອຽງຫຼຸດລົງ ໂດຍສະເພາະແມ່ນການບໍລິການທີ່ພັກອາໄສ ແລະ ຮ້ານອາຫານທີ່ຕິດພັນກັບການທ່ອງທ່ຽວ ນອກຈາກນັ້ນ ການຂະຫຍາຍຕົວເສດຖະກິດແມ່ນຫຼຸດລົງຕາມກະແສລວມຂອງເສດຖະກິດພາກພື້ນ ແລະ ສາກົນທີ່ມີທ່າອ່ຽງຫຼຸດລົງ ໂດຍສະເພາະ ບັນດາປະເທດຄູ່ຄ້າທີ່ສໍາຄັນ ແລະ ສາເຫດຕໍ່ມາແມ່ນຜົນກະທົບຈາກໄພພິບັດທໍາມະຊາດ ນໍ້າຖ້ວມ ແລະ ການລະບາດພະຍາດໂຄວິດ-19.
ປັດໄຈສໍາຄັນອີກອັນໜຶ່ງ ແມ່ນການຫັນມາອາໄສການຜະລິດ ແລະ ການສົ່ງອອກສິນຄ້ານອກຂະແໜງຊັບພະຍາກອນທໍາມະຊາດຫຼາຍຂຶ້ນ ໂດຍການຫຼຸດຜ່ອນການຂຸດຄົ້ນແຮ່ທາດ ແລະ ການສົ່ງອອກໄມ້ ຫັນມາສົ່ງເສີມການຜະລິດອຸດສາຫະກໍາປຸງແຕ່ງກະສິກໍາ ຊິ້ນສ່ວນເຄື່ອງເອເລັກໂຕຣນິກ ເຄື່ອງໄຟຟ້າ ແລະ ການບໍລິການທີ່ຕິດພັນກັບການທ່ອງທ່ຽວຫຼາຍຂຶ້ນ ຄຽງຄູ່ກັນນັ້ນ ລັດຖະບານໄດ້ເຂັ້ມງວດການປະຕິບັດລະບຽບກົດໝາຍ ເປັນຕົ້ນ: ເຂັ້ມງວດການສົ່ງອອກໄມ້ເຖື່ອນ ເຊິ່ງເຮັດໃຫ້ເສດຖະກິດຂອງລາວມີການຂະຫຍາຍຕົວຊ້າລົງ ເລັກນ້ອຍ ແຕ່ເປັນການເຕີບໂຕທີ່ມີຄຸນນະພາບຫຼາຍຂຶ້ນ ແລະ ເປັນການຫັນເຂົ້າສູ່ຖານການຜະລິດຈິງ ເພື່ອສ້າງພື້ນຖານທີ່ໜັກແໜ້ນໃຫ້ແກ່ການເຕີບໂຕໃນຕໍ່ໜ້າ
ຢ່າງໃດກໍຕາມ ພາຍໃຕ້ການຊີ້ນໍາຢ່າງໃກ້ຊິດຂອງລັດຖະບານ ບວກກັບຄວາມບຸກບືນສູງຂອງບັນດາຂະແໜງການ ອໍານາດການປົກຄອງທ້ອງຖິ່ນ ແລະ ຂອງປະຊາຊົນ ບວກກັບການສະໜັບສະໜູນຂອງບັນດາປະເທດເພື່ອນມິດຍຸດທະສາດ ແລະ ຄູ່ຮ່ວມພັດທະນາ ໄດ້ເຮັດໃຫ້ການພັດທະນາເສດຖະກິດ-ສັງຄົມ ເຖິງຈະປະເຊີນກັບຄວາມຫຍຸ້ງຍາກຕ່າງໆອັນໜັກໜ່ວງກໍຕາມ ແຕ່ກໍຍັງສາມາດປະຄອງຕົວ ແລະ ຜ່ານບັນດາຄວາມຫຍຸ້ງຍາກໃນລະດັບດີສົມຄວນ ຮັບປະກັນການຜະລິດ ແລະ ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນ.
ບັນດາໂຄງການລົງທຶນຂະໜາດໃຫຍ່ໃນຫຼາຍຂົງເຂດ ຍັງສືບຕໍ່ໄດ້ຮັບການຈັດຕັ້ງປະຕິບັດ ເປັນຕົ້ນ: ໂຄງການກໍ່ສ້າງທາງລົດໄຟລາວ-ຈີນ ໂຄງການກໍ່ສ້າງທາງດ່ວນນະຄອນຫຼວງວຽງຈັນ-ວັງວຽງ ທີ່ໄດ້ເປີດໃຫ້ບໍລິການໃນທ້າຍປີຜ່ານມາ ໂຄງການພະລັງງານ-ບໍ່ແຮ່ ໂຄງການພັດທະນາເຂດເສດຖະກິດພິເສດ ແລະ ໂຄງການພັດທະນາການທ່ອງທ່ຽວ.
ຜົນສໍາເລັດອັນພົ້ນເດັ່ນ ແມ່ນພວກເຮົາສາມາດບັນລຸຄາດໝາຍທີ່ສໍາຄັນ ໃນການນໍາພາປະເທດຊາດຫລຸດພົ້ນອອກຈາກສະຖານະພາບດ້ອຍພັດທະນາ ສັງຄົມມີຄວາມສະຫງົບ ມີສະຖຽນລະພາບຢ່າງໜັກແໜ້ນ ແລະ ອັດຕາຄວາມທຸກຍາກມີທ່າອ່ຽງຫຼຸດລົງ.
# ຂ່າວ & ພາບ : ສຸລິໂຍ