ການປ່ຽນແປງດ້ານເຕັກໂນໂລຊີ ແລະ ສັງຄົມ ເຮັດໃຫ້ປັດຈຸບັນການເຂົ້າເຖິງສະຖານທີ່ບໍລິການດ້ານສຸຂະພາບແສນຫຍຸ້ງຍາກ ໃນຮູບແບບເດີມໆປ່ຽນໄປ ເມື່ອຫຼ້າສຸດ ສະຫະລັດອາເມຣິກາ ພັດທະນາສະຖານພະຍາບານຮູບແບບໃໝ່ ທີ່ເປັນສູນລວມຂອງເຕັກໂນໂລຊີ ແລະ ການແພດມາບັນຈົບກັນ ແລະ ກຳລັງໄດ້ຮັບຄວາມນິຍົມ ຢ່າງສູງຕາມເຂດເມືອງຕ່າງໆໃນສະຫະລັດ.
ທ່ານ ເນດ ຟາວິນີ (Nate Favini) ຫົວໜ້າຝ່າຍການແພດ ທີ່ Forward ກ່າວວ່າ ເມື່ອຜູ້ໃຊ້ບໍລິການທຸກຄົນມາເຖິງສະຖານພະຍາບານແຫ່ງນີ້ ຈະຕ້ອງລົງທະບຽນ ໂດຍໃຊ້ iPad ເຊິ່ງສາມາດເຮັດໄດ້ງ່າຍໆ ພຽງແຕ່ເລືອກຕົວອັກສອນຊື່ຫຍໍ້ຂອງຕົນເທິງໜ້າຈໍເທົ່ານັ້ນ.
ນອກຈາກສິ່ງຕ່າງໆທີ່ທັນສະໄໝ ເຊັ່ນ: ການລົງທະບຽນ ແລະ ການນັດກວດສຸຂະພາບຜ່ານແອັບພລິເຄຊັນແລ້ວ ຍັງມີການແບ່ງປັນຂໍ້ມູນຈາກອຸປະກອນສວມໃສ່ທີ່ກວດວັດອັດຕາການເຕັ້ນຂອງຫົວໃຈ ແລະ ຮູບແບບການນອນຫຼັບ ສົ່ງໂດຍກົງໄປໃຫ້ແພດທີ່ນີ້ອີກດ້ວຍ.
ຫຼັງຈາກທີ່ຄົນເຈັບລົງຊື່ເມື່ອມາເຖິງແລ້ວ ຈາກນັ້ນ ກໍຈະຕ້ອງເຂົ້າຮັບການສະແກນຕັ້ງແຕ່ຫົວຈົນເຖິງປາຍຕີນແບບສະໄໝໃໝ່ ໂດຍບໍ່ມີອັນໃດມາປັກແທງຕາມຮ່າງກາຍເໝືອນແຕ່ກ່ອນ ໂດຍທີ່ເຈົ້າໜ້າທີ່ຂອງ Forward ຈະນັ່ງງຽບໆຢູ່ທີ່ໂຕະໃນບໍລິເວນໃກ້ຄຽງ ໃນກໍລະນີທີ່ຄົນເຈັບຕ້ອງການຄວາມຊ່ວຍເຫຼືອເທົ່ານັ້ນ.
ທ່ານ ເນດ ຟາວິນີ ກ່າວວ່າ ເຄື່ອງສະແກນຮ່າງກາຍດັ່ງກ່າວ ເປັນອຸປະກອນທີ່ໜ້າງຶດຫຼາຍ ໂດຍສະຖານພະຍາບານ Forward ໄດ້ສ້າງອຸປະກອນນີ້ຂຶ້ນມາ ໂດຍໃຊ້ເຊັນເຊີຈຳນວນໜຶ່ງລວມໄວ້ໃນອຸປະກອນຊິ້ນດຽວ ເພື່ອທີ່ຈະສາມາດໃຫ້ຂໍ້ມູນທີ່ເປັນປະໂຫຍດກ່ຽວກັບສຸຂະພາບຂອງຜູ້ໃຊ້ບໍລິການໄດ້.
ອຸປະກອນດັ່ງກ່າວ ມີກ້ອງຄວາມລະອຽດສູງທັງ 24 ຕົວນີ້ ເຮັດໜ້າທີ່ສະແກນໄປຕາມຮ່າງກາຍ ເພື່ອໃຫ້ເຊັນເຊີສາມາດກວດວັດສ່ວນສູງ ນ້ຳໜັກ ອັດຕາສ່ວນຮອບກົ້ນຕໍ່ຮອບແອວ ລະດັບອົກຊິແຊນໃນເລືອດ ແລະ ອັດຕາການເຕັ້ນຂອງຫົວໃຈ ຂໍ້ມູນທັງໝົດນີ້ ຈະຖືກຮວບຮວມເອົາໄວ້ໃນບ່ອນດຽວ ໂດຍທີ່ຜູ້ໃຊ້ບໍລິການບໍ່ຈຳເປັນຕ້ອງມີປະຕິສຳພັນກັບຄົນອື່ນໆເລີຍ.
ຫົວໜ້າຝ່າຍການແພດທີ່ Forward ກ່າວຕໍ່ໄປອີກວ່າ ຫຼັງຈາກທີ່ສະແກນຮ່າງກາຍແລ້ວ ຄົນເຈັບກໍສາມາດເຂົ້າໄປຍັງຫ້ອງກວດໄດ້ເລີຍໂດຍທີ່ບໍ່ຕ້ອງລໍຖ້າ ນອກຈາກນີ້ ບົດສົນທະນາທີ່ສຳຄັນໆລະຫວ່າງຄົນເຈັບກັບທ່ານໝໍ ຈະຖືກສະແດງຢູ່ເທິງໜ້າຈໍສຳຜັດຂະໜາດໃຫຍ່ໂດຍອັດຕະໂນມັດດ້ວຍ.
ຄົນເຈັບ ຫຼື ຜູ້ໃຊ້ບໍລິການ ຈະຕ້ອງຈ່າຍຄ່າບໍລິການເດືອນລະ 149 ໂດລາສະຫະລັດສຳລັບຄ່າບໍລິການທຸກຢ່າງ ບໍ່ວ່າຈະເປັນການພົບແພດໄດ້ບໍ່ຈຳກັດຈຳນວນຄັ້ງ ການໃຊ້ບໍລິການ Telemedicine ຜ່ານແອັບພລິເຄຊັນ ເຊິ່ງຊ່ວຍໃຫ້ສາມາດຕິດຕໍ່ຜູ້ໃຫ້ບໍລິການໄດ້ຕະຫຼອດ 24 ຊົ່ວໂມງ ລວມເຖິງປົກຄຸມຄ່າຢາບາງຊະນິດດ້ວຍ.
ການເຂົ້າຮັບການກວດຄັ້ງທຳອິດ ຫຼື ທີ່ເອີ້ນວ່າ ການກວດຂັ້ນພື້ນຖານ ຈະມີການກວດເລືອດທີ່ໄດ້ຜົນກວດພາຍໃນເວລາປະມານ 20 ນາທີ ແລະ ຍັງມີການກວດຄວາມຜິດປົກກະຕິທາງພັນທຸກຳ ເຊິ່ງເປັນການໃຊ້ຫຼັກຖານທາງວິທະຍາສາດສະໄໝໃໝ່ ເພື່ອຊີ້ວ່າທ່ານມີຄວາມສ່ຽງທີ່ຈະເປັນພະຍາດໃດແດ່ໃນອະນາຄົດດ້ວຍ.