ພາຍໃຕ້ຊື່ບົດປະຈຳວັນນີ້ ພວກເຮົາພາກັນໄປເບິ່ງບົດຮຽນຂອງ ສປ ຈີນ ເພື່ອຄຸ້ມຄອງໄວໜຸ່ມ ແລະ ເດັກຈາກປາກົດການຫຍໍ້ທໍ້ທີ່ມາກັບສື່ສັງຄົມອອນລາຍ ແລ້ວມາປິດທ້າຍກັບເລື່ອງທາງການຫວຽດນາມ ອອກມາດຕະການຫ້າມຈຳໜ່າຍເບຍໃຫ້ເດັກອາຍຸຕ່ຳກວ່າ 18 ປີ.
ທີ່ ສປ ຈີນ: ສະຖິຕິພົນລະເມືອງຈີນຊີ້ອອກວ່າ ປະຊາກອນໜຸ່ມທີ່ມີອາຍຸຕ່ຳກວ່າ 18 ປີ ໃນ ສປ ຈີນ ນັ້ນມີສູງເຖິງ 175 ລ້ານຄົນ ແລະ ຄົນໃນໄວນີ້ທີ່ນຳໃຊ້ອິນເຕີເນັດນັ້ນມີຈຳນວນ 169 ລ້ານຄົນ ດັ່ງນັ້ນ ຈຶ່ງບໍ່ເປັນເລື່ອງແປກທີ່ທາງການຈີນຕ້ອງມີກົດໝາຍຄຸ້ມຄອງຄົນໄວນີ້ຈາກສື່ສັງຄົມອອນລາຍ ຂ່າວໃນເດືອນຕຸລາ 2020 ໃຫ້ຮູ້ວ່າ ສະພາປະຊາຊົນແຫ່ງຊາດຈີນ ໄດ້ຮັບຮອງເອົາກົດໝາຍສະບັບປັບປຸງວ່າດ້ວຍການຄຸ້ມຄອງໄວໜຸ່ມທີ່ມີອາຍຸຕ່ຳກວ່າ 18 ປີ ໃນການໃຊ້ສື່ສັງຄົມອອນລາຍ ຊຶ່ງຈະມີຜົນບັງຄັບໃຊ້ຕົວຈິງ ນັບແຕ່ວັນທີ 1 ມິຖຸນາ 2021 ເປັນຕົ້ນໄປ ກົດໝາຍສະບັບນີ້ໄດ້ກຳນົດຫ້າມຜູ້ໃຫ້ບໍລິການ ແລະ ເຈົ້າຂອງຜະລິດຕະພັນສື່ອອນລາຍນຳສະເໜີຜະລິດຕະພັນທີ່ມີເນື້ອໃນເບື່ອເມົາເດັກ ຜູ້ໃຫ້ການບໍລິ ການຜະລິດຕະພັນປະເພດເກມ ຮູບພາບວີດີໂອ-ສຽງ ສື່ສັງຄົມອອນລາຍຈະຕ້ອງກຳນົດເວລາ ແລະ ຄ່າໃຊ້ຈ່າຍໃນການຫຼິ້ນ (ເກມ) ຫຼື ການໃຊ້ບໍລິການສຳລັບໄວໜຸ່ມຕ້ອງມີມາດຕະການສະກັດກັ້ນເນື້ອໃນທີ່ມີລັກ ສະນະຢອກລໍ້ສຽດສີ ປ້ອຍດ່າໃນສື່ສັງຄົມອອນລາຍທີ່ພາໃຫ້ເດັກມີຄວາມກົດດັນ ຫຼື ເຄັ່ງຄຽດທາງອາລົມ ພໍ່ແມ່ ຫຼື ຜູ້ປົກຄອງເດັກທີ່ໄດ້ຮັບຜົນກະທົບຈາກເນື້ອໃນດັ່ງກ່າວ ມີສິດແຈ້ງ ແລະ ທວງໃຫ້ຜູ້ບໍລິການລຶບ ຫຼື ປິດຂໍ້ມູນດັ່ງກ່າວເພື່ອບໍ່ໃຫ້ເດັກເຂົ້າເບິ່ງໄດ້ ນອກຈາກກົດໝາຍຄຸ້ມຄອງໄວໜຸ່ມຈາກສື່ສັງຄົມອອນລາຍແລ້ວ ທາງການຈີນຍັງໄດ້ປັບປຸງກົດໝາຍຕ້ານການລ່ວງລະເມີດສິດ ແລະ ການທາລຸນເດັກໂດຍໄດ້ກຳນົດໃຫ້ໂຮງຮຽນນັບແຕ່ຂັ້ນອະນຸບານຂຶ້ນໄປ ຕ້ອງໄດ້ລາຍງານຂໍ້ມູນກ່ຽວກັບການລ່ວງລະເມີດ ສິດ ແລະ ການ ທາລຸນເດັກໃຫ້ໜ່ວຍງານດ້ານຄວາມປອດໄພ ສາທາລະນະ ແລະ ອົງການ ການສຶກສາໂດຍທັນທີ.
ທີ່ ສສ ຫວຽດນາມ: ມີຂ່າວຈາກຫວຽດນາມ ໃນທ້າຍເດືອນກັນຍາ 2020 ວ່າ: ລັດຖະບານຫວຽດ ນາມ ໄດ້ເຄັ່ງມາດຕະການດ້ວຍການສັ່ງຫ້າມຈຳໜ່າຍເບຍໃຫ້ໄວໜຸ່ມທີ່ມີອາຍຸຕ່ຳກວ່າ 18 ປີ ຄຳສັ່ງນີ້ເລີ່ມມີຜົນສັກສິດນັບແຕ່ວັນທີ 15 ເດືອນຕຸລາ 2020 ເປັນຕົ້ນມາ ໃນເມື່ອກ່ອນທາງການຫວຽດນາມ ກໍເຄີຍອອກບົດລົງໂທດຜູ້ທີ່ຈຳໜ່າຍເຄື່ອງດື່ມທີ່ມີທາດເຫຼົ້າໃຫ້ເດັກອາຍຸຕ່ຳກວ່າ 18 ປີ ແຕ່ໄດ້ມີຂໍ້ຍົກເວັ້ນສຳລັບເຄື່ອງດື່ມປະເພດເບຍ ຊຶ່ງປະຕິບັດກັນມາແຕ່ປີ 2013 ພາຍໃຕ້ຄຳສັ່ງໃໝ່ນີ້ແມ່ນເດັດຂາດ ຫ້າມຈຳໜ່າຍເບຍໃຫ້ຜູ້ທີ່ມີອາຍຸຕ່ຳກວ່າ 18 ປີ ຖ້າໃຜລະເມີດຈະຖືກປັບໃໝເປັນເງິນແຕ່ 5 ແສນ-1 ລ້ານດົງ (ປະມານ 2-4 ແສນກີບ) ຄຳສັ່ງໄດ້ກຳນົດໃຫ້ບັນດາຮ້ານຄ້າ ກໍຄື ບ່ອນຈຳໜ່າຍເບຍໃນທົ່ວປະເທດ ຕ້ອງຕິດຂໍ້ຄວາມແຈ້ງເຕືອນຫ້າມຈຳໜ່າຍເບຍໃຫ້ຜູ້ທີ່ມີອາຍຸຕ່ຳກວ່າ 18 ປີ ເຈົ້າຂອງບ່ອນຂາຍເບຍມີໜ້າທີ່ຮັບ ຜິດຊອບກວດກາອາຍຸຂອງລູກຄ້າ ໃນກໍລະນີທີ່ມີຄວາມສົງໄສວ່າລູກຄ້າອາດມີອາຍຸຕ່ຳກວ່າ 18 ປີ ໃນປີ 2020 ຫວຽດນາມ ໄດ້ປະກາດໃຊ້ກົດໝາຍວ່າດ້ວຍການຫຼຸດຜ່ອນຜົນກະທົບ ທີ່ເປັນອັນຕະລາຍຈາກທາດເຫຼົ້າ ແລະ ຄຳສັ່ງຫ້າມຈຳໜ່າຍເບຍໃຫ້ໄວໜຸ່ມອາຍຸຕ່ຳກວ່າ 18 ປີ ນີ້ກໍເປັນສ່ວນໜຶ່ງຂອງການປະຕິບັດກົດໝາຍດັ່ງກ່າວ ໃຫ້ມີຜົນສັກສິດ.