ສຳມະນາ ແລະ ການແລກປ່ຽນຫົວໜ່ວຍທຸລະກິດຂອງອົງການທ່ອງທ່ຽວມາເລເຊຍ ເພື່ອສົ່ງເສີມການທ່ອງທ່ຽວເດືອນພິເສດຂອງມາເລເຊຍ ແລະ ການສົ່ງເສີມປີທ່ອງທ່ຽວມາເລເຊຍ 2020 ຈັດຂຶ້ນວັນທີ 4 ກຸມພາ 2020 ຢູ່ໂຮງແຮມແລນມາກ ໂດຍເປັນປະທານຂອງທ່ານ ໂນຣັນ ອູຈັງ ຜູ້ອຳນວຍການພະ ແນກໂຄສະນາສາກົນ (ອາຊຽນ) ອົງການທ່ອງທ່ຽວມາເລເຊຍ ມີຂະແໜງການທ່ອງທ່ຽວ ບັນດາບໍລິສັດ ທ່ອງທ່ຽວ ຄູ່ຮ່ວມທຸລະກິດ ແລະ ສື່ມວນຊົນ ເຂົ້າຮ່ວມ.
ທ່ານ ໂນຣັນ ອູຈັງ ກ່າວວ່າ: ອຸດສາຫະກຳການທ່ອງທ່ຽວໃນປະເທດມາເລເຊຍ ສືບຕໍ່ຂະຫຍາຍຕົວຢ່າງເຂັ້ມແຂງ ເຊິ່ງປີນີ້ເປັນໄລຍະທີ່ສຳຄັນສຳລັບການທ່ອງທ່ຽວຂອງປະເທດເຮົາ ໂດຍຄາດຫວັງຈາກປີທ່ອງທ່ຽວມາເລເຊຍ 2020 ນອກນີ້ ພວກເຮົາຄາດວ່າຈະຕ້ອນຮັບນັກທ່ອງທ່ຽວປະມານ 30 ລ້ານຄົນ ເຂົ້າມາທ່ຽວປະເທດມາເລເຊຍ ສ້າງລາຍຮັບຈາກການທ່ອງທ່ຽວບັນລຸເປົ້າໝາຍເຖິງ 23,6 ຕື້ໂດລາສະຫະລັດ ຫຼື ປະມານ 209.692 ຕື້ກີບ ການຮ່ວມທຸລະກິດຂອງພວກເຮົາຈະຊ່ວຍໃຫ້ປະເທດມາເລເຊຍກາຍເປັນປະເທດຍອດນິຍົມຂອງນັກທ່ອງທ່ຽວຊາວລາວໄດ້ ນັບແຕ່ເດືອນມັງກອນ-ເດືອນກັນຍາ 2019 ນັກທ່ອງທ່ຽວລາວເຂົ້າໄປມາເລເຊຍປະມານ 20.959 ຄົນ ເພີ່ມຂຶ້ນ 13,8% ທຽບໃສປີ 2018 ສຳລັບປີທ່ອງທ່ຽວມາເລເຊຍ 2020 ຄາດວ່າຈະຕ້ອນຮັບນັກທ່ອງທ່ຽວຈາກລາວປະມານ 38.525 ຄົນ.
ກິດຈະກຳສຳລັບປີທ່ອງທ່ຽວມາເລເຊຍ 2020 ມີຫຼາຍກວ່າ 100 ກິດຈະກຳ ທີ່ຈະຈັດຂຶ້ນເຊິ່ງສະ ແດງໃຫ້ເຫັນວັດທະນະທຳ ແລະ ຮີດຄອງປະເພນີຂອງມາເລເຊຍ ເປັນຕົ້ນ ງານເທສະການດອກໄມ້ໃນເມືອງພຸດຕຣາຈາຢາ ເທສະການດົນຕີໂລກຂອງປ່າຝົນ ໃນລັດຊາລະວັກ ເທສະການຕາມລ່າຫາອາຫານທີ່ດີທີ່ສຸດໃນເມືອງກົວລາລຳເປີ ເທສະການແມ່ນ້ຳເມລາກາສາກົນ ງານສະຫຼອງເປີດບ້ານຂອງຫຼາຍເຊື້ອຊາດ ແລະ ອື່ນໆ ເຊິ່ງລາຍລະອຽດເພີ່ມເຕີມສາມາດດາວໂຫຼດໄດ້ທີ່ www.malaysia.travel.