ໃນ 1 ປີ ນວ ສາມາດມ້າງຄະດີ ແລະ ກຸ່ມແກ້ງມົ້ວສຸມຢາເສບຕິດໄດ້ 900 ກວ່າເລື່ອງ ຢຶດຂອງກາງຢາບ້າໄດ້ 1 ລ້ານກວ່າເມັດ ພ້ອມທັງເຮໂລອິນ ກັນຊາ ແລະ ອາວຸດ ພ້ອມສຸມໃສ່ແກ້ໄຂຢ່າງຈິງຈັງ ເຊິ່ງບັນຫາຢາເສບຕິດ ເປັນບັນຫາໜຶ່ງທີ່ໂລກໃຫ້ຄວາມສົນໃຈໃນການປ້ອງກັນ ສະກັດກັ້ນ ແລະ ປາບປາມ ສຳລັບລາວເຮົາ ກໍຄື ນວ ບັນຫາເສບຕິດແມ່ນເປັນໄພຂົ່ມຂູ່ ຄຸກຄາມເຖິງຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ ເປັນໄພອັນຕະລາຍເຖິງຊິວິດ ສຸຂະພາບຂອງພົນລະເມືອງ ເຊິ່ງເປັນສາເຫດພາໃຫ້ເກີດມີບັນຫາອາດຊະຍາກຳ ປາກົດການຫຍໍ້ທໍ້ໃນສັງຄົມ.
ຕໍ່ບັນຫານີ້ ທ່ານ ພັນເອກ ຈັນຫອມ ແກ້ວສຸລະໄຊ ຮອງຫົວໜ້າກອງບັນຊາການ ປກສ ນວ ກໍ່ໄດ້ຊີ້ແຈງໃນການແກ້ໄຂບັນຫາຢາເສບຕິດຢູ່ ນວ ໃນ 1 ປີວ່າ: ໃນປີ 2020 ປກສ ນວ ໄດ້ມີຄວາມພະຍາຍາມປະຕິບັດຕາມພາລະບົດບາດຂອງຕົນ ໂດຍສົມທົບກັບບັນດາຂະແໜງການທີ່ກ່ຽວຂ້ອງ ອຳນາດການປົກຄອງຂັ້ນເມືອງ ບ້ານ ແລະ ບັນດາກົມວິຊາສະເພາະຂອງກະຊວງ ປກສ ຈັດຕັ້ງປະຕິບັດບັນດາມາດຕະການຕ່າງໆ ເພື່ອສຸມໃສ່ແກ້ໄຂບັນຫາຢາເສບຕິດຢູ່ ນວ ໂດຍສຸມໃສ່ເຮັດວຽກປ້ອງກັນ ແລະ ສະກັດກັ້ນ ເຊິ່ງໄດ້ແນໃສ່ຈັດຕັ້ງບັນດາມາດຕະການຄວບຄຸມຢາເສບຕິດ ໂດຍການຖືເອົາວຽກງານໂຄສະນາ ສຶກສາອົບຮົມຢູ່ບັນດາໂຮງຮຽນ ໂຮງຈັກ-ໂຮງງານ ໝູ່ບ້ານຕ່າງໆ ສົມທົບກັບຂະບວນການກໍ່ສ້າງຮາກຖານ ສ້າງບ້ານປອດຢາເສບຕິດໄດ້ 348 ບ້ານ ສ້າງໂຮງຮຽນປອດຢາເສບຕິດໄດ້ 156 ແຫ່ງ ໄດ້ເອົາໃຈໃສ່ຂຶ້ນບັນຊີຄຸ້ມຄອງ ແລະ ສຶກສາອົບຮົມເປົ້າໝາຍຢູ່ຕາມໝູ່ບ້ານ ຈັດຕັ້ງການລາດຕະເວນສະກັດກັ້ນຕາມເສັ້ນທາງຂົນສົ່ງຢາເສບຕິດເຂົ້າ-ອອກ ນວ ສ້າງເປັນລາຍຄະດີສະເພາະ ເຊິ່ງສາມາດມ້າງຄະດີໃຫຍ່ນ້ອຍ ແລະ ກຸ້ມແກ້ງມົ້ວສຸມຢາເສບຕິດໄດ້ 941 ເລື່ອງ ໃນນັ້ນ ມົ້ວສຸມເສບຢາ 351 ເລື່ອງ ກັກຕົວມາດຳເນີນຄະດີ ແລະ ສຶກສາອົບຮົມ 1.305 ຄົນ ຢຶດຂອງກາງຢາບ້າ 1,4 ລ້ານກວ່າເມັດ ຢາໄອສ໌ 1.079 ກິໂລ ເຮໂລອິນ 43 ກິໂລ ກັນຊາ 53 ກິໂລ ພ້ອມດ້ວຍອາວຸດ ແລະ ພາຫະນະຈຳນວນໜຶ່ງ ພ້ອມນັ້ນ ກໍໄດ້ປະສານສົມທົບກັບຕຳຫຼວດຫວຽດນາມ ແລະ ໄທ ເພື່ອສະກັດກັ້ນການຂົນສົ່ງຢາເສບຕິດ ການຂົນສົ່ງຢາເສບຕິດຂ້າມປະເທດ.
ໃນຕໍ່ໜ້ານີ້ ກອງບັນຊາການ ປກສ ນວ ຍັງຈະໄດ້ສຸມໃສແກ້ໄຂບັນຫາຢາເສບຕິດ ທັງມ້າງວົງຈອນການມົ້ວສຸມ ກຸ່ມແກ້ງ ເພື່ອຕັດບໍ່ໃຫ້ມີການຂະຫຍາຍຕົວ ທັງຮຽກຮ້ອງໃຫ້ທຸກພາກສ່ວນ ຕະຫຼອດຮອດປະຊາຊົນ ເປັນເຈົ້າການຮ່ວມກັນໃນການສະກັດກັ້ນ ແກ້ໄຂ ແລະ ປາບປາມບັນຫາຢາເສບຕິດຢ່າງຈິງຈັງ ເພື່ອເຮັດໃຫ້ສັງຄົມມີຄວາມສະຫງົບ ເປັນລະຮຽບຮຽບຮ້ອຍ ແກ້ໄຂໄດ້ບັນຫາຢາເສບຕິດຢ່າງຂາດຕົວ.
# ຂ່າວ & ພາບ: ເພັດສະໝອນ