ທ່ານ ສິລິລາດ ທົງສິນທອງເພັງ ຫົວໜ້າພະແນກການເງິນ ນວ ໄດ້ຂຶ້ນຊີ້ແຈງຕໍ່ຄຳເຫັນເຈາະຈິ້ມຂອງອົງການກວດສອບປະຈຳພາກກາງ ແລະ ບັນດາຜູ້ແທນສະມາຊິກສະພາແຫ່ງຊາດ ແລະ ສະພາປະຊາຊົນ ນວ ໃນຫຼາຍບັນຫາ ຢູ່ໃນກອງປະຊຸມສະໄໝສາມັນເທື່ອທີ 10 ຂອງສະພາປະຊາຊົນ ນວ ຊຸດທີ 1 ໃນມື້ທີສອງ ເປັນຕົ້ນ ກ່ຽວກັບລາຍຮັບ-ລາຍຈ່າຍທີ່ກວດເຫັນເກືອບ 29 ຕື້ກີບ ວ່າ: ບັນຫາດັ່ງກ່າວແມ່ນໄດ້ຮັບການແກ້ໄຂແລ້ວ 7 ຕື້ກວ່າກີບ ຍັງຄ້າງເກືອບ 22 ຕື້ກີບ ເຊິ່ງບ້ວງເງິນນີ້ ແມ່ນເງິນລາຍຮັບຄ່າບໍລິການວິຊາການຂອງຂະແໜງການອ້ອມຂ້າງຂອງ ນວ ເຊິ່ງມີຄວາມຈຳເປັນໃນການໃຊ້ຈ່າຍ ຈຶ່ງໄດ້ຈ່າຍໄປກ່ອນ ແລ້ວຈະນຳສະເໜີຂຶ້ນແຜນໃນປີຕໍ່ໄປ ທັງໄດ້ຊີ້ແຈງກ່ຽວກັບການເປີດບັນຊີທະນາຄານ ຂອງພະແນກສຶກສາທິການ ແລະ ກິລາ ກອງຄຸ້ມຄອງພາຫະນະ ແລະ ການຂັບຂີ່ ນວ ເຊິ່ງໄດ້ແກ້ໄຂສຳເລັດແລ້ວ ນອກນີ້ ກໍໄດ້ຊີ້ແຈງການຄິດໄລ່ອາກອນລາຍໄດ້ ການຄຸ້ມຄອງຊັບສິນທີ່ສານຕັດສິນ ຮິບມາເປັນຂອງລັດ ທີ່ຍັງມີຄວາມຫຍຸ້ງຍາກໃນການຈັດຕັ້ງປະຕິບັດ ຄະດີສ່ວນຫລາຍແກ່ຍາວມາຫຼາຍປີ ເຮັດໃຫ້ຊັບສິນຢູ່ກະແຈກກະຈາຍ ເປ່ເພ່ຫຼຸ້ຍຫ້ຽນ ເຮັດໃຫ້ບໍ່ມີຄວາມເປັນເອກະພາບໃນການປະຕິບັດ.
ພ້ອມດຽວກັນນັ້ນ ກໍຍັງໄດ້ມີການຊີ້ແຈງເຖິງຜົນການກວດສອບໃນປີ2019 ໂດຍສະເພາະໜີ້ຕ້ອງຮັບຂອງສ່ວຍສາອາກອນ ຈຳນວນ 400 ຕື້ກວ່າກີບ ເຊິ່ງສາມາດທ້ວງໄດ້ ແລະ ມອບເຂົ້າງົບປະມານແລ້ວ 54 ຕື້ກວ່າກີບ ສ່ວນທີ່ເຫຼືອແມ່ນຍັງເລັ່ງທວງຄືນ ແລະ ສ່ວນໜຶ່ງແມ່ນເປັນໜີ້ເສຍ ບາງທຸລະກິດແມ່ນຢຸດເຊົາ ແລະ ເປັນໜີ້ທວງຄືນຍາກ ໂດຍໄດ້ສະເໜີໃຫ້ກະຊວງການເງິນລົບລ້າງ ພ້ອມໄດ້ຊີ້ແຈງເຖິງການຈ່າຍລ່ວງໜ້າໃນລະບົບຄັງເງິນແຫ່ງຊາດປະຈຳ ນວ.
# ຂ່າວ & ພາບ: ເພັດສະໝອນ