ໃນວາລະກອງປະຊຸມສະໄມສາມັນເທື່ອທີ 10 ສະພາປະຊາຊົນນະຄອນຫຼວງວຽງຈັນ ຊຸດທີ I ໃນວັນທີ 29 ທັນວາ 2020 ຜ່ານມາ ທີ່ຫ້ອງວ່າການປົກຄອງນະຄອນຫຼວງວຽງຈັນ ທ່ານ ນາງ ວັນມະນີ ພິມມະສານ ຫົວໜ້າພະແນກອຸດສາຫະກຳ ແລະ ການຄ້ານະຄອນຫຼວງວຽງຈັນ ໄດ້ຂຶ້ນຊີ້ແຈ້ງກ່ຽວກັບການຄຸ້ມຄອງລາຄາສິນຄ້າຕາມທ້ອງຕະຫຼາດຢູ່ ນວ ວ່າ: ການຄຸ້ມຄອງສິນຄ້າ ແລະ ຄ່າບໍລິການ ໄດ້ປະຕິບັດຕາມລາຄາທີ່ຖືກກຳນົດຕາມກົນໄກຕະຫຼາດ ທີ່ມີການຄຸ້ມຄອງດັດສົມຂອງລັດ ລັດກຳນົດສິດໃນການກຳນົດລາຄາ ແລະ ການແຂ່ງຂັນທາງດ້ານລາຄາຂອງຜູ້ດຳເນີນທຸລະກິດຕາມລະບຽບກົດໝາຍ ລັດນຳໃຊ້ມາດຕະການໃນການຄຸ້ມຄອງລາຄາຕາມຄວາມຈຳເປັນ ບົນພື້ນຖານຫຼັກການ ບໍ່ຈຳແນກປະຕິບັດ ແລະ ຄວາມໂປ່ງໃສ ເຊິ່ງໄດ້ນຳໃຊ້ມາດຕະການຄຸ້ມຄອງລາຄາໃນ 2 ຮູບແບບຄື: ມາດຕະການຄຸ້ມຄອງລາຄາ ແລະ ມາດຕະການຕິດຕາມການເໜັງຕີງຂອງລາຄາ ອີງຕາມມາດຕາ 6 ຂອງດຳລັດ 474/ນຍ ການຄວບຄຸມລາຄາປະກອບມີ 8 ປະເພດສິນຄ້າຄື: ນ້ຳມັນເຊື້ອໄຟ ອາຍແກັດ ຊີ້ນໝູ ປານິນກະຊັງ ເຂົ້າກິນ ແລະ ຕິດຕາມການເໜັງຕີງຂອງລາຄາບັນຊີ ຂ ລວມມີ 205 ລາຍການ.
ເລີ່ມແຕ່ເດືອນມັງກອນປີ 2020 ຮອດປັດຈຸບັນ ເຫັນວ່າສະພາບລາຄາສິນຄ້າມີການເໜັງຕີງຂຶ້ນ ແລະ ລົງ ຕາມກົນໄກຂອງເສດຖະກິດຕະຫຼາດ ມີບາງສິນຄ້າຄື: ພືດຜັກ ຊີ້ນ ໝາກໄມ້ ທີ່ເໜັງຕີງໄປຕາມລະດູການ ໄດ້ມີການຄຸ້ມຄອງລາຄາສີນຄ້າຕາມໂຄງປະກອບຂອງລາຄາສິນຄ້າ ເຊັ່ນ: ເຂົ້າກິນ ສູງສຸດບໍ່ເກີນ 7.400 ກີບຕໍ່ກິໂລ ປານິນກະຊັງບໍ່ເກີນ 20 ພັນກີບຕໍ່ກິໂລ ຊີ້ນໝູແມ່ນໄດ້ປັບລາຄາຂຶ້ນ 2 ຄັ້ງ ສາເຫດການປັບຂຶ້ນລາຄາ ຍ້ອນວ່າເພີ່ມຕົ້ນທຶນການປ້ອງກັນພະຍາດໝູຫູກ່ຳ ຕົ້ນທຶນໃນການນຳເຂົ້າ ສ່ວນປະກອບຫົວອາຫານເພີ່ມຂຶ້ນ ອັດຕາແລກປ່ຽນເງິນຕາເພີ່ມຂຶ້ນ ກຳນົດລາຄາຄັ້ງສຸດທ້າຍ ຊີ້ນໝູຂາຍຍ່ອຍລູກຂຽງ ປະເພດ 1 ລາຄາສູງສຸດບໍ່ເກີນ 44 ພັນກີບຕໍ່ກິໂລ ປະເພດ 2 ບໍ່ເກີນ 41 ພັນກີບຕໍ່ກິໂລ ປະເພດສິນຄ້ານຳເຂົ້າ ໄດ້ມີການປັບລາຄາຂຶ້ນຢູ່ໃນລະຫວ່າງ 3-7% ສາເຫດທີ່ມີການປັບຂຶ້ນ ແມ່ນອີງຕາມອັດຕາເງິນເຟີ້ໃນປີ 2020 ຢູ່ລະຫວ່າງ 3,63 -6,94%. ສຳລັບປັດໄຈທີ່ພາໃຫ້ເກີດການເໜັງລາຄາສິນຄ້າ ແມ່ນມີ 2 ປັດໃຈຄື: ປັດໄຈພາຍນອກ ໃນໄລຍະການລະບາດຂອງພະຍາດໂຄວິດ-19 ການຂົນສົ່ງສິນຄ້າມີຄ່າໃຊ້ຈ່າຍເພີ່ມຂຶ້ນ ເປັນຕົ້ນ ສິນຄ້າປະເພດວັດຖຸດິບ ອຸປະກອນມາຮັບໃຊ້ການຜະລິດ ຍ້ອນນຳເຂົ້າຈາກຕ່າງປະເທດ ການຜະລິດພາຍໃນຍັງອ່ອນນ້ອຍ ກະແຈກກະຈາຍ ແນວພັນ ພ້ອມນັ້ນ ອັດຕາແລກປ່ຽນການກໍມີການຂຶ້ນລົງເຮັດໃຫ້ມີຜົນຕໍ່ການສັ່ງຊື້ສິນຄ້າ ສ່ວນປັດໄຈພາຍໃນ ການຜະລິດພາຍໃນຍັງມີຕົ້ນທຶນສູງ ມີຄວາມຈຳກັດ ເຮັດໄດ້ຕາມລະດູການ ພາກສ່ວນທຸລະກິດຈຳນວນໜຶ່ງມີລາຍຈ່າຍເພີ່ມຂຶ້ນ ເນື່ອງຈາກການປ້ອງກັນໂຄວິດ-19 ສິນຄ້າທີ່ນຳເຂົ້າຈຳນວນໜຶ່ງຍັງບໍ່ມີການຕິດສະຫຼາກ ຊາວຄ້າຂາຍຈຳນວນໜຶ່ງຍັງມີແນວຄິດສວຍໂອກາດຂຶ້ນລາຄາສິນຄ້າຕາມລຳພັງໃຈໃນເທສະການຕ່າງໆ ຫຼື ໄລຍະທີ່ມີການສະໜອງສິນຄ້າບໍ່ພຽງພໍ ດັ່ງນັ້ນ ເພື່ອເປັນການຄຸ້ມຄອງລາຄາສິນຄ້າໃຫ້ເປັນໄປຕາມທີ່ກຳນົດໄວ້ ທາງການຄ້າ ນວ ໄດ້ວາງມາດຕະການດ້ວຍການລົງຕິດຕາມກວດກາສິນຄ້າຢ່າງຕໍ່ເນື່ອງ ທັງໃຊ້ມາດຕະການຢ່າງເຂັ້ມງວດ ໃນກໍລະນີພົບເຫັນຜູ້ສວຍໂອກາດຂຶ້ນລາຄາສິນຄ້າຕາມລຳພັງໃຈ ໂດຍຈະປັບໃໝຕາມລະບຽບການ ຖ້າບໍ່ຕິດປ້າຍລາຄາສິນຄ້າ ມີໂທດປັບໃໝ 5 ແສນ ຫາ 1 ລ້ານກີບຕໍ່ຄັ້ງ ແຈ້ງຂໍ້ມູນເທັດກ່ຽວກັບໂຄງປະກອບລາຄາ ຫຼື ຄັງແຮສຳຮອງ ບໍ່ແຈ້ງໂຄງປະກອບລາຄາ ນຳເອົາສິນຄ້າທີ່ມີໄວ້ໃນຄັງແຮອອກຈຳໜ່າຍໂດຍບໍ່ໄດ້ຮັບອະນຸຍາດ ຢຸດປະຕິເສດ ຫຼື ແກ່ຍາວເວລາການຈຳໜ່າຍ ຫຼື ການບໍລິການໂດຍບໍ່ມີເຫດຜົນເມື່ອມີຄຳສັ່ງຄຸ້ມຄອງລາຄາ ປັບໃໝ 1 ລ້ານ ຫາ 3 ລ້ານກີບຕໍ່ຄັ້ງ ແລະ ນຳໃຊ້ໂຄງປະກອບລາຄາໂດຍບໍ່ໄດ້ຮັບອະນຸຍາດ ປັບໃໝ 1 ລ້ານ ຫາ 5 ລ້ານກີບຕໍ່ຄັ້ງ.
ພ້ອມກັນນັ້ນ ຮຽກຮ້ອງໃຫ້ຊາວຄ້າຂາຍໃຫ້ປະຕິບັດໂຄງປະກອບລາຄາທີ່ໄດ້ກຳນົດໄວ້ ສ່ວນຜູ້ບໍລິໂພກ ຫາກພົບເຫັນການຂຶ້ນລາຄາສິນຄ້າ ສາມາດໂທແຈ້ງ 1510 ຫຼື ເຂົ້າໄປແຈ້ງໄດ້ທີ່ຫ້ອງການຈັດສັນຢູ່ພາຍໃນຕະຫຼາດໂດຍກົງ.
# ຂ່າວ & ພາບ: ເພັດສະໝອນ