ໃນຍຸກສື່ອອນລາຍນີ້ ຄົນເຮົາໄດ້ຮັບຄວາມສະດວກສະບາຍຫຼາຍຢ່າງ ຕົວຢ່າງທີ່ໂດດເດັ່ນເຫັນກັນຢ່າງຈະແຈ້ງ ກໍຄື ໃນໄລຍະການລະບາດຂອງພະຍາດໂຄວິດ-19 ໄລຍະທີ່ຄົນເຮົາບໍ່ສາມາດໄປຫາມາສູ່ກັນ ບໍ່ວ່າຢູ່ພາຍໃນ ກໍຄື ຕ່າງປະເທດນັ້ນ ສື່ດີຈີຕອນ-ອອນລາຍ ກໍຊ່ວຍໃຫ້ຄົນເຮົາໄດ້ພົບກັນໜ້າຈໍ… ອາຫານ ກໍສັ່ງທາງອອນລາຍ ກອງປະຊຸມພາກພື້ນ ແລະ ສາກົນ ກໍຜ່ານອອນລາຍ ເອີ້ນວ່າ Video Conference ແຕ່ພ້ອມດຽວກັນ ຄວາມວຸ້ນວາຍສັບສົນຈາກການໃຊ້ອອນລາຍ ເພື່ອບິດເບືອນຄວາມຈິງກໍແຜ່ລະບາດເປັນເງົາຕາມຕົວ ຜ່ານມາເຄີຍມີກໍລະນີເດັ່ນດັງກ່ຽວກັບສິ່ງທ້າທາຍທີ່ເກີດຈາກການໃຊ້ສື່ສັງຄົມອອນລາຍ ເຊັ່ນ:
ທີ່ມຽນມາ ໃນລະຫວ່າງປີ 2015-2016 ນັ້ນ ຂ່າວໃຫຍ່ດັງໄກຈາກມຽນມາ ມີຫຼາກຫຼາຍ ໃນນັ້ນ ລວມທັງຄວາມຂັດແຍ່ງລະຫວ່າງເຊື້ອຊາດ ເຜົ່າພັນ ແລະ ຄວາມເຊື່ອຖື ໂດຍສະເພາະ ແມ່ນລະຫວ່າງຊາວພຸດທີ່ເປັນຄົນສ່ວນໃຫຍ່ຂອງປະເທດ ແລະ ຊາວມຸດສະລິມ ທີ່ນັບຖືສາສະໜາອິດສະລາມ ໃນຕົວຈິງແລ້ວ ມັນບໍ່ແມ່ນບັນຫາເກີນກວ່າຄວາມສາມາດຂອງມຽນມາຈະແກ້ໄຂໃຫ້ຕົກໄປໄດ້ ແຕ່ທີ່ມັນກາຍເປັນບັນຫາແຜ່ລາມຢ່າງກວ້າງຂວາງນັ້ນ ແມ່ນຍ້ອນພິດໄພຂອງການໃຊ້ສື່ສັງຄົມອອນລາຍຍຸຍົງ ສົ່ງເສີມໃຫ້ເກີດມີອະຄະຕິ ມີຄວາມກຽດຊັງລະຫວ່າງຊາວພຸດ ແລະ ຊາວມຸດສະລິມ ຫົວໂປ່ໂຕການທີ່ເຮັດໜ້າທີ່ໂຄສະນາປູກຝັງຄວາມຄຽດແຄ້ນ ລະຫວ່າງຊາວພຸດກັບຊາວມຸດສະລິມນັ້ນ ກໍແມ່ນພະສົງອົງໜຶ່ງຊື່ວ່າ ວິລະທຸ ເຊິ່ງໄດ້ຮັບສົມຍານາມວ່າ “ນັກກໍ່ການຮ້າຍຊາວພຸດ” ພະອົງນີ້ໄດ້ສ້າງວາທະກຳບິດເບືອນ ເພື່ອໃສ່ຮ້າຍປ້າຍສີຊາວມຸດສະລິມ ທັງຮຽກຮ້ອງໃຫ້ຈຳກັດການເກີດໃນຊຸມຊົນມຸດສະລິມ ໂດຍສ້າງຄວາມຢ້ານກົວວ່າ ຊາວມຸດສະລິມຈະຢຶດຄອງປະເທດມຽນມາທັງໝົດ ໃນອະນາຄົດ ການປຸກລະດົມຜ່ານສື່ສັງຄົມອອນລາຍຂອງພະຫົວຂວາຈັດອົງນີ້ ສາມາດດຶງດູດເອົາຜູ້ສະໜັບສະໜູນໄດ້ເປັນຈຳນວນຫຼວງຫຼາຍ ແຕ່ສຸດທ້າຍ ພະອົງນີ້ກໍຖືກບາບໄລ່ນຳທັນ ຄະນະການນຳສົງຂອງມຽນມາ ກໍໄດ້ສັ່ງບໍ່ໃຫ້ພະວິລະທຸ ເທສະໜາ ກໍຄື ເຄື່ອນໄຫວກິດຈະກຳທາງສາສະໜາໃນຊຸມຊົນເປັນເວລາ 1 ປີ ຄືແຕ່ວັນທີ 10 ມີນາ 2017 ຮອດວັນທີ 9 ມີນາ 2018 ພ້ອມທັງໄດ້ກຳນົດວ່າ ຖ້າພະອົງນີ້ລະເມີດຄຳສັ່ງ ເຂົາກໍຈະຖືກລົງໂທດຕາມກົດໝາຍ.
ທີ່ປະເທດອີຣັກ ການຫຼິ້ນເກມອອນລາຍຢູ່ປະເທດອີຣັກໃນໄລຍະຫຼັງໆມານີ້ ໄດ້ເຮັດໃຫ້ການຄ້າຂອງປະເທດນີ້ປວດຫົວ ເພາະມັນເປັນຊະນວນກໍ່ໃຫ້ເກີດມີການໃຊ້ຄວາມຮຸນແຮງ ແລະ ທຳລາຍຄວາມເປັນລະບຽບຮຽບຮ້ອຍຂອງສັງຄົມ ສ້າງມົນທິນແປດເປື້ອນວັດທະນະທຳ ແລະ ຮີດຄອງປະເພນີອັນດີງາມຂອງຊາດ ປ່ຽນນິດໃສຊາວໜຸ່ມ ເຍົາວະຊົນໃຫ້ກາຍເປັນຄົນແຂງກະດ້າງ ຫຼິ້ນກິນຟຸມເຟືອຍ ແລະ ຂາດໂຮງຮຽນ ປະເພດເກມທີ່ທາງການອີຣັກຖືວ່າເປັນອັນຕະລາຍຮ້າຍແຮງທີ່ສຸດໄດ້ແກ່ ເກມ “ຟອດໄນບຼູແວວ” (Fortnite Blue Whale) ແລະ “PUBG” (Player’s Unknown Battle Grounds) ເປັນ ເກມສົງຄາມທີ່ມີການໃຊ້ຄວາມຮຸນແຮງ ເພື່ອກຳຈັດຜົນຮ້າຍຈາກເກມອອນລາຍທີ່ເປັນອັນຕະລາຍນີ້ ໃນວັນທີ 17 ເມສາ 2019 ທາງສະພາແຫ່ງຊາດອີຣັກ ໄດ້ຮັບຮອງເອົາກົດໝາຍເກືອດຫ້າມທຸກເກມອອນລາຍທີ່ກະຕຸ້ນໃຫ້ມີການໃຊ້ຄວາມຮຸນແຮງ ຈຸດເດັ່ນຂອງກົດໝາຍນັ້ນ ກໍຄື ການຫ້າມມີການພົວພັນດ້ານການເງິນທັງໝົດກັບເຄືອຄ່າຍເກມອອນລາຍທີ່ມີບັນຫາ ເຊິ່ງເປັນການຕັດແຫຼ່ງລາຍຮັບທັງໝົດຂອງບັນດາເຄືອຄ່າຍດັ່ງກ່າວ.
ທີ່ເນປານ ໃນເດືອນກໍລະກົດ 2018 ໄດ້ມີເຫດສະເທືອນຂວັນທົ່ວສັງຄົມເນປານເກີດຂຶ້ນນັ້ນ ຄືຄະດີຂົ່ມຂືນເດັກນັກຮຽນຍິງ ອາຍຸ 13 ປີ ແລ້ວຂ້າຖິ້ມ ເຫດການຂົ່ມຂືນຄັ້ງນັ້ນ ໄດ້ເປັນຊະນວນການປະທ້ວງທົ່ວປະເທດ ເຮັດໃຫ້ມີຄົນຕາຍ 1 ຄົນ ແລະ ບາດເຈັບຫຼາຍສິບຄົນ ພວກປະທ້ວງໄດ້ກ່າວປະນາມລັດຖະບານວ່າ ໄຮ້ນ້ຳຢາໃນການປາບປາມອາຊະຍາກຳ ໂດຍສະເພາະ ແມ່ນຄະດີຂົ່ມຂືນ ຕໍ່ມາໃນວັນທີ 4 ສິງຫາ 2018 ທາງການເນປານ ກໍໄດ້ສັ່ງປິດເວັບໄຊລາມົກ ຈຳນວນ 24.000 ແຫ່ງລົງ ໂດຍອ້າງວ່າ ເວັບໄຊເຫຼົ່ານີ້ລະເປັນຕົ້ນເຫດເຮັດໃຫ້ຄົນມີຕັນຫາໜ້າມືດ ແລ້ວໃຊ້ກຳລັງຄຸກຄາມທາງເພດ.