ການນຳໃຊ້ກຳມະສິດ ແມ່ນໃຫ້ນຳໃຊ້ຊັບ ສິ່ງຂອງທີ່ເປັນຂອງຕົນ ເພື່ອຕອບສະໜອງຄວາມຕ້ອງການທາງດ້ານຊີວິດການເປັນຢູ່ ຫຼື ຜົນປະໂຫຍດອັນແນ່ນອນທີ່ຕົນຕ້ອງການ ແຕ່ບໍ່ໃຫ້ກໍ່ຄວາມເສຍຫາຍ ຫຼື ຂັດກັບສິດ ແລະ ຜົນປະໂຫຍດຂອງລັດ ຂອງສັງຄົມ ຫຼື ຂອງບຸກຄົນອື່ນ ສຳລັບການນຳໃຊ້ທີ່ດິນ ນັ້ນ ແມ່ນລວມທັງການນຳໃຊ້ພື້ນທີ່ທາງອາ ກາດ ເທິງໜ້າດິນ ແລະ ພື້ນທີ່ໃຕ້ດິນ ໃນ ຂອບເຂດທີ່ສາມາດນຳໃຊ້ ແລະ ມີຜົນປະ ໂຫຍດເທົ່ານັ້ນ ເວັ້ນເສຍແຕ່ກົດໝາຍຫາກ ໄດ້ກຳນົດໄວ້ເປັນຢ່າງອື່ນ.
ໃນສະພາວະທີ່ຈຳເປັນ ເຈົ້າກຳມະສິດຕໍ່ ຊັບສິ່ງຂອງ ບໍ່ມີສິດຂັດຂວາງຄົນອື່ນ ໃນ ການນຳໃຊ້ຊັບສິ່ງຂອງ ຫຼື ບໍ່ມີສິດຂັດຂວາງ ບຸກຄົນອື່ນ ໃນການກໍ່ຄວາມເສຍຫາຍຕໍ່ຊັບ ສິ່ງຂອງ ຂອງຕົນ ເພື່ອສະກັດກັ້ນ ຫຼື ຫຼຸດ ຜ່ອນໄພອັນຕະລາຍທີ່ເກີດຂຶ້ນ ຫຼື ອາດຈະ ເກີດຂຶ້ນ.
ຕໍ່ກັບຂອບເຂດການນຳໃຊ້ກຳມະສິດໄດ້ ກຳນົດໄວ້ ເພື່ອເປັນບ່ອນອີງໃນການຈັດຕັ້ງ ປະຕິບັດ ແລະ ສິ່ງທີ່ບໍ່ຄວນລະເມີດດັ່ງນີ້:
1. ການກຳນົດເຂດແດນ: ເຂດແດນລະ ຫວ່າງຕອນດິນທີ່ຕິດຈອດກັນ ໃຫ້ກຳນົດ ດ້ວຍການຕົກລົງລະຫວ່າງເຈົ້າຂອງທີ່ດິນທີ່ ຕິດຈອດກັນ ໂດຍມີການຢັ້ງຢືນຂອງຂະແໜງ ການຊັບພະຍາກອນທຳມະຊາດ ແລະ ສິ່ງ ແວດລ້ອມທີ່ກ່ຽວຂ້ອງ ຄ່າໃຊ້ຈ່າຍໃນການ ປັກຫຼັກເຂດແດນຮ່ວມກັນ ໃຫ້ຮັບຜິດຊອບຄົນ ລະເຄິ່ງ ຫຼື ໃຫ້ປະຕິບັດຕາມທີ່ໄດ້ຕົກລົງກັນ.
2. ການລ້ອມຮົ້ວ: ເຈົ້າຂອງທີ່ດິນ ສາມາດລ້ອມຮົ້ວໃນຂອບເຂດທີ່ດິນຂອງຕົນ ແຕ່ບໍ່ໃຫ້ເປັນອຸປະສັກຕໍ່ການສັນຈອນ ຫຼື ລ່ວງເຂດແດນຂອງຕອນດິນທີ່ຢູ່ໃກ້ຄຽງ ແລະ ເຂດສະຫງວນຂອງທາງຕາມທີ່ໄດ້ກຳນົດໄວ້ໃນກົດໝາຍທີ່ກ່ຽວຂ້ອງ.
ໃນກໍລະນີທີ່ຕອນດິນນັ້ນມີທາງເຄີຍທຽວ ໄປມາກ່ອນເຈົ້າຂອງທີ່ດິນໄດ້ສິດນຳໃຊ້ທີ່ດິນ ຕ້ອງຈົ່ງທາງທຽວທີ່ເໝາະສົມ ຫຼື ປ່ຽນແລວ ທາງທີ່ເຄີຍທຽວໄປທາງອື່ນ ແລ້ວຈຶ່ງລ້ອມ ຮົ້ວໄດ້ ແຕ່ຕ້ອງຢູ່ໃນຕອນດິນຂອງຕົນ.
3. ໄລຍະຫ່າງໃນການປຸກສ້າງເຮືອນ: ການປຸກເຮືອນ ການກໍ່ສ້າງອາຄານ ໃຫ້ຮັກສາໄລຍະຫ່າງຢ່າງໜ້ອຍ 50 ຊັງຕີແມັດ ຈາກເຂດແດນ ເວັ້ນເສຍແຕ່ກົດໝາຍໄດ້ກຳນົດໄວ້ຢ່າງອື່ນ.
ໃນກໍລະນີການກໍ່ສ້າງຫາກບໍ່ສອດຄ່ອງກັບ ບົດບັນຍັດຂອງກົດໝາຍ ເຈົ້າຂອງທີ່ດິນທີ່ ຕິດຈອດກັນ ມີສິດທວງໃຫ້ຢຸດເຊົາ ແລະ ຮື້ຖອນສິ່ງກໍ່ສ້າງນັ້ນ ພາຍຫຼັງທີ່ກໍ່ສ້າງມາໄດ້ 1 ປີ ຫຼື ໄດ້ກໍ່ສ້າງສຳເລັດແລ້ວ ເຈົ້າຂອງທີ່ ດິນທີ່ຕິດຈອດກັນມີສິດທວງເອົາໄດ້ແຕ່ຄ່າ ເສຍຫາຍເທົ່ານັ້ນ.
ຕົວຢ່າງ: ນາງ ໂລບ ໄດ້ປຸກສ້າງເຮືອນຂອງ ຕົນກວມເອົາທີ່ດິນຂອງ ທ້າວ ອົດ ຍ້ອນ ທ້າວ ອົດ ຢູ່ຫ່າງໄກ ບໍ່ໄດ້ມາເບິ່ງທີ່ດິນຂອງ ຕົນເປັນເວລາຫຼາຍເດືອນ ແຕ່ເມື່ອມາເບິ່ງທີ່ ດິນຂອງຕົນ ຈຶ່ງຮູ້ວ່ານາງ ໂລບໄດ້ປຸກເຮືອນ ກວມເອົາທີ່ດິນຂອງຕົນ ໃນກໍລະນີນີ້ ທ້າວ ອົດ ມີສິດທວງຄ່າເສຍຫາຍຈາກ ນາງໂລບ ຕາມທີ່ກົດໝາຍໄດ້ກຳນົດໄວ້.
ໂດຍ: ໄມ້ງັດ