ຜູ້ຕິດເຊື້ອພະຍາດ COVID-19 ຈຳນວນ 7 ຄົນທີ່ເຂົ້າຮັບການປິ່ນປົວຢູ່ຕຶກແຍກປ່ຽວ ໂຮງໝໍມິດຕະພາບ ປັດຈຸບັນແມ່ນມີອາການດີຂຶ້ນເປັນລຳດັບ.
ທ່ານ ດຣ ສະໜອງ ທອງຊະນະ ຜູ້ອຳນວຍການໂຮງໝໍມິດຕະພາບ ໄດ້ໃຫ້ສຳພາດໃນລາຍການຮ່ວມແຮງຮ່ວມໃຈຕ້ານໄພ COVID-19 ວ່າ: ໂຮງໝໍມິດຕະພາບໄດ້ເລີ່ມຮັບຜູ້ຕິດເຊື້ອພະຍາດ COVID-19 ເຂົ້າມາປິ່ນປົວເລີ່ມແຕ່ວັນທີ 23 ມີນາເປັນຕົ້ນມາ ແລະ ສືບຕໍ່ຮັບມາຮັກສາທັງໝົດ 7 ກໍລະນີ ອາການຂອງຄົນເຈັບທີ່ຮັບເຂົ້າມາ ແມ່ນນອນຢູ່ໃນກໍລະນີທີ່ເບົາບາງ ມີໄຂ້ ມີໄອ ຫາຍໃຈຝືດ ຈາກການຕິດຕາມການປິ່ນປົວທາງທີມແພດໝໍຂອງພວກເຮົາ ໄດ້ໃສ່ຢາປົວ ໂດຍສົມທົບກັບຄູ່ມືຂອງອົງການອະນາໄມໂລກ ແລະ ຄູ່ຮ່ວມພັດທະນາຕ່າງໆ ເຊີ່ງຜ່ານການຕິຕາມປິ່ນປົວມາຮອດປັດຈຸບັນ ຖືວ່າຄົນເຈັບໄດ້ມີອາການດີຂຶ້ນ ເຊີ່ງອາການດີຂຶ້ນນັ້ນ ໝາຍຄວາມວ່າ ອາການໄຂ້ຫຼຸດລົງ ອາການໄອ ແລະ ອາການເຈັບຄໍດີຂຶ້ນ ແລະ ມີບາງຄົນກໍຖືວ່າມີອາການເປັນປົກກະຕິ.
ສຳລັບການຕິດຕາມປິ່ນປົວ ແມ່ນນຳໃຊ້ທີມແພດຜັດປ່ຽນກັນອາທິດລະ 1 ຄະນະ ຫຼັງຈາກເຂົ້າປິ່ນປົວຄົນເຈັບແລ້ວ ແພດໝໍກໍໄດ້ກັກບໍລິເວນຕົນເອງ 14 ວັນກ່ອນ ຈຶ່ງສາມາດກັບເຮືອນຂອງຕົນໄດ້.
ສ່ວນການປິ່ນປົວຄົນເຈັບທີ່ມີອາການເບົາບາງ ແມ່ນຕ້ອງໄດ້ປິ່ນປົວອີງໃສ່ຄູ່ມືຂອງອົງການອະນາໄມໂລກ ຕາມຫຼັກການແມ່ນປິ່ນປົວຕິດຕາມອາການ 10 ວັນ ຖ້າຄົນເຈັບບໍ່ມີອາການໄຂ້ຢ່າງໜ້ອຍ 72 ຊົ່ວໂມງ ແລະ ບໍ່ມີອາການໄອ ຫຼື ອາການປ່ຽນແປງອື່ນໆດີຂຶ້ນ ຈຶ່ງຈະເອົາຕົວຢ່າງໄປກວດເຊື້ອຄັ້ງທີ 1 ແລ້ວລໍຖ້າອີກ 24 ຊົ່ວໂມງ ແມ່ນຈະໄດ້ນຳເຊື້ອໄປກວດຄັ້ງທີ 2 ຖ້າຜົນກວດບໍ່ພົບເຊື້ອ ພວກເຮົາກໍຈະເອົາຄົນເຈັບກັບບ້ານ ແຕ່ການກັບບ້ານນັ້ນ ກໍໄດ້ມີຂໍ້ແນະນຳຄົນເຈັບ ອີງໃສ່ຄູ່ມືຕ້ອງໄດ້ໃຫ້ຄົນເຈັບປະຕິບັດການຮັກສາໂຕເອງ ກໍຄືປະຕິບັດການແຍກປ່ຽວ ສືບຕໍ່ໃສ່ຜ້າອັດປາກ ແລະ ບໍ່ໃຫ້ພົວພັນກັບຄົນອື່ນໃນເວລາ 14 ວັນ ຈາກນັ້ນ ຄະນະແພດກໍຈະຮ່ວມກັນປະເມີນວ່າ ຜູ້ກ່ຽວສາມາດພົວພັນກັບສັງຄົມ ແລະ ປະກອບການເຮັດວຽກໄດ້ຕາມປົກກະຕິ.
ການຕິດເຊື້ອພະຍາດນີ້ ລ້ວນແລ້ວແຕ່ເກີດຈາກການສຳຜັດລະອອງຝອຍ ແລະ ການສຳຜັດໂດຍກົງກັບຜູ້ຕິດເຊື້ອ ດັ່ງນັ້ນ ພວກເຮົາຈຶ່ງຕ້ອງຮ່ວມກັນປະຕິບັດມາດຕະການຄວບຄຸມການຕິດເຊື້ອ ຄື ຫຼີກລ່ຽງການໄປຊຸມຊົນແອອັດ ການຊຸມນຸມ ຫຼື ຊຸມແຊວ ການຢູ່ໃກ້ຊິດກັນ ໝັ່ນລ້າງມືເປັນປະຈຳ ສາມາດຫຼຸດຜ່ອນການຕິດເຊື້ອໄດ້.
ສຳລັບຄົນເຈັບທີ່ຕິດເຊື້ອພະຍາດນີ້ ທີ່ປິ່ນປົວຢູ່ແຂວງຫຼວງພະບາງ ແມ່ນຈະນຳສະເໜີຂໍ້ມູນຕາມພາຍຫຼັງ.