ວັນທີ 19 ພະຈິກຂອງທຸກໆປີ ໄດ້ຖືກກຳນົດໃຫ້ເປັນວັນ “ຫ້ອງນ້ຳໂລກ” (World Toilet Day) ເວົ້າໃຫ້ລະອຽດໄປກວ່ານັ້ນ ກໍຄື ເປັນວັນສາກົນທີ່ສົ່ງເສີມໃຫ້ທຸກໆປະເທດເອົາໃຈໃສ່ເລື່ອງສຸຂະອະນາໄມ ໂດຍການໃຊ້ຫ້ອງນ້ຳ ຫ້າມຖ່າຍຊະຊາຍ ເຊິ່ງຈະເປັນບ່ອນເພາະພັນເຊື້ອພະຍາດນາໆຊະນິດ ໂດຍສະເພາະ ແມ່ນພະຍາດຖອກທ້ອງ ຈຳໄດ້ວ່າ ສິງກະໂປ ເປັນປະເທດທີ່ສະເໜີໃຫ້ອົງການສະຫະປະຊາຊາດປະກາດເອົາວັນທີ 19 ພະຈິກຂອງແຕ່ລະປີເປັນວັນຫ້ອງນ້ຳໂລກ ເມື່ອເກືອບ 10 ປີຜ່ານມາ ໃນແຕ່ລະປີ ພໍຮອດວັນດັ່ງກ່າວ ທົ່ວໂລກກໍພາກັນທົບທວນຫວນຄືນກ່ຽວກັບບັນຫາວິດຖ່າຍ ກໍຄື ການໃຊ້ນ້ຳສະອາດ ໃນບົດນີ້ ຜູ້ຂຽນມີເລື່ອງເລົ່າກ່ຽວກັບບັນຫາຖ່າຍຊະຊາຍ ກໍຄື ນະໂຍບາຍສົ່ງເສີມການໃຊ້ຫ້ອງນ້ຳຢູ່ບາງປະເທດ.
ທີ່ ເນປານ: ວັນທີ 19 ພະຈິກ 2017 ເປັນຄັ້ງທຳອິດທີ່ທາງການປະເທດເນປານໄດ້ຈັດພິທີລະລຶກວັນຫ້ອງນ້ຳໂລກ ເພື່ອສະຫຼຸບຜົນສຳເລັດໃນການກຳຈັດບັນຫາການຖ່າຍຊະຊາຍ ທີ່ເປັນນິໄສຊຳເຮື້ອມານັບຫຼາຍເຊັ່ນຄົນມາແລ້ວ ປີ 2017 ເປັນປີທີ່ປະເທດເນປານໄດ້ປະກາດລຶບລ້າງການຖ່າຍຊະນະໃຫ້ໄດ້ 100% ແຕ່ມັນກໍເປັນເລື່ອງ “ເວົ້າງ່າຍ ແຕ່ເຮັດຍາກ” ເພາະບັນຫາຂາດຫ້ອງນ້ຳໄດ້ເຮັດໃຫ້ຊາວເນປານ ຈຳນວນ 2,6 ລ້ານຄົນ (ເທົ່າກັບ 9% ຂອງພົນລະເມືອງທົ່ວປະເທດ) ຍັງຖ່າຍຊະຊາຍທົ່ວໄປ ສາເຫດທີ່ບໍ່ສາມາດບັນລຸເປົ້າໝາຍນັ້ນ ບໍ່ພຽງແຕ່ແມ່ນຍ້ອນຂາດຫ້ອງນ້ຳ ແຕ່ຍ້ອນລະບົບສຸຂະອະນາໄມລວມຂອງປະເທດຍັງຫຼ້າຫຼັງ.
ທີ່ ອິນເດຍ: ສະຖິຕິເມື່ອ 5 ປີກ່ອນໜ້ານີ້ ໃຫ້ຮູ້ວ່າ ຄົນອິນເດຍ ທີ່ຖ່າຍຊະຊາຍນັ້ນມີສູງເຖິງ 594 ລ້ານຄົນ ຄື ປະມານເກືອບເຄິ່ງໜຶ່ງຂອງພົນລະເມືອງຂອງປະເທດນີ້ (The Nation 11/6/2015) ເຫດຜົນສ່ວນໜຶ່ງທີ່ພາໃຫ້ຄົນອິນເດຍບໍ່ມັກໃຊ້ຫ້ອງນ້ຳ ກໍຍ້ອນເຫັນວ່າ ຫ້ອງນ້ຳນັ້ນເປື້ອນ ແອອັດ ບໍ່ສະດວກ ພວກເຂົາຖືວ່າ ການຖ່າຍຢູ່ຕາມທຳມະຊາດນັ້ນສະອາດກວ່າ ແລະ ຢູ່ໄກຈາກເຮືອນ ແນວໃດກໍດີ ໃນປີ 2014 ລັດຖະບານອິນເດຍ ພາຍໃຕ້ການນຳຂອງທ່ານນາຍົກລັດຖະມົນຕີ ນາເຣັນດຼາໂມດີ ໄດ້ປະກາດໂຄງການ “ອິນເດຍ ສະອາດ” ດ້ວຍການຍົກສູງບັນຫາສຸຂະອະນາໄມໃນທົ່ວສັງຄົມ ໂດຍຕອບຮັບນະໂຍບາຍດັ່ງກ່າວ ທາງເມືອງອັກຄະເມັດດາບັດ ກໍໄດ້ເຮັດທົດລອງໂຄງການຊຸກຍູ້ໃຫ້ຊາວເມືອງໃຊ້ຫ້ອງນ້ຳໂດຍການໃຊ້ເງິນຈ້າງ ຄືຈ້າງໃຫ້ຄົນໃຊ້ຫ້ອງນ້ຳປະມານ 1 ຣູປີ ຕໍ່ຄັ້ງ ໂຄງການຈ້າງຄົນໃຊ້ຫ້ອງນ້ຳຢູ່ເມືອງໃນລັດອາຈາຣາດ ທາງພາກຕາເວັນຕົກຂອງອິນເດຍນີ້ ໄດ້ເລີ່ມທົດລອງຕາມຫ້ອງນ້ຳສາທາລະນະ 67 ແຫ່ງກ່ອນ ແລະ ວ່າຖ້າເປັນຜົນສຳເລັດ ກໍຈະຂະຫຍາຍໂຄງການນີ້ໃຫ້ກວມເອົາຫ້ອງນ້ຳສາທາລະນະທັງໝົດ 300 ຫົວໜ່ວຍ ພາຍໃນເມືອງແຫ່ງນີ້ ຂ່າວບອກວ່າ ບັນຫາການຖ່າຍຊະຊາຍໃນອິນເດຍ ໄດ້ເປັນຊະນວນກໍ່ໃຫ້ມີກໍລະນີເກີດການລະບາດຂອງພະຍາດຕ່າງໆ ໂດຍສະເພາະ ແມ່ນພະຍາດຖອກທ້ອງ ຢູ່ບ້ານເຮົາຖ້າເຂົ້າຫ້ອງນ້ຳສາທາລະນະຕ້ອງໄດ້ຈ່າຍ ແຕ່ຢູ່ເມືອງອັກຄະເມັດດາບັດຂອງອິນເດຍ ຄົນໃຊ້ຫ້ອງນ້ຳໄດ້ທັງປົດທຸກ ໄດ້ທັງເງິນ ຢູ່ປະເທດລາວພວກເຮົານັ້ນຄົນຖ່າຍຊະຊາຍຍັງມີຫຼາຍຢູ່ ແຕ່ຄ່ອຍໆຫຼຸດລົງ ເລື່ອງນີ້ຕ້ອງຊົມເຊີຍແຂວງບໍລິຄຳໄຊ ທີ່ໄດ້ປະກາດຢຸດຖ່າຍຊະຊາຍທົ່ວແຂວງ ຫວ່າງບໍ່ດົນມານີ້ ດ້ວຍການຊຸກຍູ້ໃຫ້ທຸກຄົວເຮືອນມີວິດຖ່າຍ ແລະ ສ້າງໃຫ້ຄົນຕິດນິໄສຖ່າຍໃສ່ວິດ.