ການແຂ່ງຂັນຖາມ-ຕອບຄວາມຮູ້ກ່ຽວກັບອາຊຽນລະດັບຊາດ ຄັ້ງທີ 9 ປະຈຳປີ 2020 ຈັດຂຶ້ນວັນທີ 4 ທັນວາ 2020 ທີ່ໂຮງຮຽນ ມັດທະຍົມສຶກສາສົມບູນວຽງຈັນ ນະຄອນຫຼວງວຽງຈັນ (ນວ) ມີທ່ານ ໂພສີ ແກ້ວມະນີວົງ ກຳມະການພັກກະຊວງຖະແຫຼງຂ່າວ ວັດທະນະທະນະທຳ ແລະ ທ່ອງທ່ຽວ ຜູ້ອຳນວຍການໃຫຍ່ວິທະຍຸກະຈາຍສຽງແຫ່ງຊາດ ທັງເປັນຮອງຫົວໜ້າຄະນະຮັບຜິດຊອບຈັດຕັ້ງການແຂ່ງຂັນ ຖາມ-ຕອບ ຄວາມຮູ້ກ່ຽວກັບອາຊຽນ ລະດັບຊາດຄັ້ງທີ 9 ປີ 2020 ພ້ອມນີ້ ມີທ່ານ ຮອງຫົວໜ້າພະແນກສຶກສາທິການ ແລະ ກີລາ ນວ ແຂກຮັບເຊີນ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ວໍລະສັກ ປຣະວົງວຽງຄຳ ຄະນະຮັບຜິດຊອບໂຄງການ ASEAN Quiz ແຫ່ງສປປ ລາວ ໄດ້ກ່າວລາຍງານໃຫ້ຮູ້ວ່າ: ການແຂ່ງຂັນຖາມ-ຕອບຄວາມຮູ້ກ່ຽວກັບອາຊຽນລະດັບຊາດ (ຫຼື NATIONAL ASEAN QUIZ) ຕາມລະບຽບວາງໄວ້ ແມ່ນຈະຕ້ອງຈັດຂຶ້ນທຸກໆສອງປີ ນັບແຕ່ປີ 2002 ເປັນຕົ້ນມາ ໂດຍຄັ້ງນີ້ຈະເປັນຄັ້ງທີ IX ແລ້ວ ການແຂ່ງຂັນແນໃສ່ບັນດານັກຮຽນຂັ້ນມັດທະຍົມຕອນປາຍ ທີ່ມີອາຍຸສະເລ່ຍລະຫວ່າງ 14 – 18 ປີ ເພື່ອຄັດເລືອກເອົານ້ອງນັກຮຽນທີ່ເກ່ງທີ່ສຸດຈຳນວນ 3 ຄົນ ເປັນຕົວແທນປະເທດ ເຂົ້າຮ່ວມການແຂ່ງຂັນ ASEAN QUIZ ລະດັບພາກພື້ນ ຮ່ວມກັບນັກຮຽນເກ່ງທີ່ເປັນຕົວແທນອີກ 9 ປະເທດສະມາຊິກອາຊຽນ ສຳລັບປີນີ້ ອີງຕາມແຈ້ງການຂອງປະເທດເຈົ້າພາບ ການແຂ່ງຄັ້ງນີ້ຈະຈັດຂຶ້ນໃນລະຫວ່າງວັນທີ 15 ແລະ 16 ທັນວາ ປີ 2020 ທີ່ຈະມາເຖິງ ສຳລັບສປປ ລາວເຮົາ ມີນັກຮຽນເກ່ງຈາກໂຮງຮຽນມັດທະຍົມຕອນປາຍທັງພາກລັດ ແລະ ພາກເອກະຊົນຈາກທົ່ວທຸກພາກຂອງປະເທດເຮົາຄື: ຫຼວງພະບາງ ຕົວແທນພາກເໜືອ ສະຫວັນນະເຂດ ພາກກາງ ຈຳປາສັກ ພາກໃຕ້ ແລະ ນວ ການແຂ່ງຂັນໃນຄັ້ງນີ້ ແບ່ງອອກເປັນ 4 ຮອບ ໃນແຕ່ລະຮອບ ບັນດານ້ອງນັກຮຽນນັກແຂ່ງຂັນທັງ 13 ຄົນ ຈະໄດ້ຕອບຄຳຖາມໃນ 4 ໝວດຄວາມຮູ້ ໂດຍຈະມີທັງຄຳຖາມປະເພດຫຼາຍຄຳຕອບໃຫ້ເລືອກ (ຫຼື ແບບປາລາໄນ) ຄຳຖາມແບບເປີດ-ປິດ ແລະ ຄຳຖາມແບບຕື່ມຄຳໃສ່ບ່ອນຫວ່າງ ເຊິ່ງຄຳຖາມທັງໝົດຈະເປັນພາສາອັງກິດ ແລະ ວິທີການຖາມ-ຕອບກໍຈະດຳເນີນໄປຜ່ານລະບົບໄອຊີທີທີ່ທັນສະໄໝ ຈາກການແຂ່ງຂັນຜ່ານທັງ 4 ຮອບຄັດເລືອກໃຫ້ໄດ້ 3 ຄົນສຸດທ້າຍ ອັນດັບໜຶ່ງ ທ້າວ ກິດຊະໄນ ພົມມະວົງສາ ອາຍຸ 18 ປີ ຊັ້ນ ມ7 ໂຮງຮຽນກຽດຕີສັກນານາຊາດ ນວ ອັນດັບ 2 ນາງ ອຳມາລາ ສຸກທິຈັກ ອາຍຸ 15 ປີ ໂຮງຮຽນແສງດາລາ ນວ ແລະ ອັນດັບ3 ນາງ ປາວີນາ ສໍລະຈຳປາ ອາຍຸ 17 ປີ ໂຮງຮຽນປາຖະໜາ ນວ ສ່ວນອັນດັບ 1-3 ຈະໄດ້ຮັບລາງວັນເປັນເງິນສົດ ພ້ອມດ້ວຍຂອງທີ່ລະນຶກອີກຈຳນວນໜຶ່ງຈາກຜູ້ໃຫ້ການອຸປະຖຳໂຄງການ ແລະ ໄດ້ເປັນຕົວແທນນັກຮຽນເກ່ງຂອງ ສປປ ລາວເຣົາ ເພື່ອເຂົ້າຮ່ວມການແຂ່ງຂັນ ASEAN QUIZ ລະດັບພາກພື້ນໃນຄັ້ງທີ 9 ທີ່ຈະມີຂຶ້ນໂດຍ ຜ່ານລະບົບສືສານແບບທາງໄກ ເຊິ່ງເປັນເຈົ້າພາບໂດຍປະເທດສິງກະໂປ ໃນວັນທີ 16-17 ທັນວາ 2020 ຈະມາເຖິງນີ້.
# ຂ່າວ & ພາບ : ບຸນມີ