ທ່ານ ຄໍາຄູນ ໃບລາຕຣີ ຮອງຫົວໜ້າພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວນະຄອນຫຼວງວຽງຈັນ ໄດ້ນໍາພາສະມາຄົມທຸລະກິດທ່ອງທ່ຽວລາວ ແລະ ບັນດາບໍລິສັດທ່ອງທ່ຽວໃນນະຄອນຫຼວງວຽງຈັນ ສໍາຫຼວດຄວາມເປັນໄປໄດ້ໃນການຮ່ວມມືບໍລິການສົ່ງເສີມທ່ອງທ່ຽວພາຍໃນ ໂດຍສະເພາະ ຮ່ວມມືກັບສະຖານທີ່ທ່ອງທ່ຽວທໍາມະຊາດ ນໍ້າປ່ຽນຢໍລະປາ ບ້ານຊຽງແລທ່າ ເມືອງປາກງື່ມ ນະຄອນຫຼວງວຽງຈັນ ວັນທີ 26 ພະຈິກ 2020 ໂດຍຖືກຕ້ອນຮັບຈາກທ່ານ ສົມເພັດ ມ້າວປະເສີດ ປະທານກຸ່ມບໍລິສັດຢໍລະປາ.
ການສໍາຫຼວດສະຖານທີ່ທ່ອງທ່ຽວຄັ້ງນີ້ ເປັນກິດຈະກຳໜຶ່ງເພື່ອສົ່ງເສີມລາວທ່ຽວລາວໃຫ້ມີບັນຍາກາດຄຶກຄື້ນ ຫຼັງຈາກທີ່ໄດ້ຮັບຜົນກະທົບທາງກົງຈາກການແຜ່ລະບາດເຊື້ອພະຍາດໂຄວິດ-19 ເຊິ່ງໄດ້ທ່ຽວຊົມທິວທັດຂອງແຫຼ່ງທ່ອງທ່ຽວ ແລະ ບັນດາກິດຈະກໍາຕ່າງໆ ພິເສດ ໄດ້ຍ່າງຂົວອູ່ 22 ຂົວ ຄວາມຍາວ 1 ກິໂລແມັດ ເພື່ອຊົມນໍ້າຕົກຕາດປ່ຽນຢໍລະປາ ແລະ ໄດ້ຂີ່ລົດທ່ຽວຊົມສວນເຂດນໍ້າ ຈາກນັ້ນ ໄດ້ມີການແລກປ່ຽນ ປຶກສາຫາລືເຊິ່ງກັນ ແລະ ກັນ ເພື່ອກຳນົດແຜນການຮ່ວມມືກັນດ້ານການທ່ອງທ່ຽວ ຕ່າງຝ່າຍຕ່າງໄດ້ຮັບຜົນປະໂຫຍດ ແລະ ເຮັດໃຫ້ທຸລະກິດທ່ອງທ່ຽວມີຄວາມຍືນຍົງ.
# ຂ່າວ & ພາບ : ຂັນທະວີ