ວັນທີ 20-21 ພະຈິກ 2020 ຢູ່ທີ່ດ່ານນ້ຳພາວ ແຂວງບໍລິຄຳໄຊ ສອງຄະນະກຳມະການຮ່ວມມືລາວ-ຫວຽດນາມ ແລະ ຫວຽດນາມ-ລາວ ໄດ້ຈັດກອງປະຊຸມພົບປະເຮັດວຽກເພື່ອປຶກສາຫາລືບັນດາເນື້ອໃນເອກະສານຮັບໃຊ້ກອງປະຊຸມຄັ້ງທີ 43 ຂອງຄະນະກຳມະການຮ່ວມມືທະວິພາຄີ ລະຫວ່າງລັດຖະບານແຫ່ງ ສປປ ລາວ ແລະ ລັດຖະບານແຫ່ງ ສສ.ຫວຽດນາມ ປະຈຳປີ 2021 ໂດຍເປັນປະທານຮ່ວມຂອງທ່ານ ຄຳເຜີຍ ແກ້ວກິນນາລີ ຮອງປະທານຜູ້ປະຈຳການຄະນະກຳມະການຮ່ວມມືລາວ-ຫວຽດນາມ ແລະ ທ່ານ ຫງວຽນ ວັນ ຈຸງ ຮອງລັດຖະມົນຕີກະຊວງແຜນການ ແລະ ການລົງທຶນ ຮອງປະທານຄະນະກຳມະການຮ່ວມມືຫວຽດນາມ-ລາວ ພ້ອມດ້ວຍຜູ້ແທນຈາກບັນດາກະຊວງ ອົງການຈາກສູນກາງ ແລະ ທ້ອງຖິ່ນຂອງສອງຝ່າຍເຂົ້າຮ່ວມ.
ກອງປະຊຸມຄັ້ງນີ້ ສອງຝ່າຍໄດ້ຕີລາຄາສູງເຖິງໝາກຜົນຂອງການພົວພັນຮ່ວມມືໃນໜຶ່ງປີຜ່ານມາ ເຖິງວ່າເກີດມີການລະບາດຂອງພະຍາດໂຄວິດ-19 ໃນຕົ້ນປີນີ້ ແຕ່ສອງຝ່າຍກໍບໍ່ໄດ້ເຮັດໃຫ້ການແຜ່ລະບາດ ຂອງພະຍາດໂຄວິດ 19 ເປັນໂຕຂັດຂວາງການພົວພັນຮ່ວມມືລະຫວ່າງສອງປະເທດ ສອງຝ່າຍໄດ້ຮ່ວມກັນປັບປຸງຮ່າງເນື້ອໃນຍຸດທະສາດການຮ່ວມມືລາວ-ຫວຽດນາມ ໄລຍະ 10 ປີ (2021-2030) ສັນຍາຮ່ວມມື ໄລຍະ 5 ປີ (2021-2025) ພ້ອມທັງສະຫຼຸບຕີລາຄາຄືນສະພາບການພົວພັນຮ່ວມມືລົງທຶນລາວ-ຫວຽດນາມ ປີ 2020 ແລະ ກຳນົດທິດທາງການຮ່ວມມືປະຈຳປີ 2021.
ຜົນສຳເລັດກອງປະຊຸມດັ່ງກ່າວ ສອງຝ່າຍໄດ້ເຊັນບົດບັນທຶກໃນການເຮັດວຽກ ເພື່ອເປັນເອກະພາບໃນການກະກຽມເນື້ອໃນໃຫ້ແກ່ກອງປະຊຸມຄັ້ງທີ 43 ປະຈຳປີ 2021 ຂອງຄະນະກຳມະການຮ່ວມມືທະວິພາຄີ ລະຫວ່າງລັດຖະບານແຫ່ງ ສປປ ລາວ ແລະ ລັດຖະບານແຫ່ງ ສສ.ຫວຽດນາມ ເຊິ່ງຄາດຄະເນຈະໄຂຂຶ້ນໃນຕົ້ນເດືອນທັນວາ 2020 ທີ່ຈະມາເຖິງນີ້.
# ຂ່າວ & ພາບ: ຊິລິການດາ