ບູຮານກ່າວໄວ້ວ່າ ລາຍຄົນລາຍໃນ ລາຍເສືອລາຍນອກ ແຕ່ທັງສອງລາຍກໍມີຄວາມໂຫດຮ້າຍເຊັ່ນດຽວກັນ ເພາະຫຍັງ ເພາະວ່າ ລາຍຄົນນັ້ນເບິ່ງຍາກເຫັນຍາກ ແຕ່ຫາກຢາກເບິ່ງຄັກໆແມ່ນຕ້ອງເຫຼົ້າຖອກໃສ່ປາກ ແມ່ນສາມາດຮູ້ໂລດວ່າຄົນຜູ້ນັ້ນມີລາຍແນວໃດ ໂດຍສະເພາະ ການສະແດງປະຕິກິລິຍາໃນເວລາມຶນເມົານັ້ນ ສະແດງວ່າເຮົາຮູ້ກັນໄດ້ແຕ່ໜ້າ ບໍ່ຮູ້ວ່າຈິດໃຈຄິດຢ່າງໃດ ພວກເຮົາເຫັນນຳກັນທຸກມື້ ຢູ່ນຳກັນທຸກມື້ ສຸດທ້າຍຜັດໄປກໍ່ເຫດ ກໍ່ຄະດີ ກໍ່ຄວາມວຸ້ນວາຍຢູ່ໃນສັງຄົມ ບາງຄົນກໍເປັນໜອນບອນໄສ້ ຮັບໃຊ້ກຸ່ມຄົນບໍ່ດີ ຄຳເວົ້າຄ່າສອກ ຢືດອອກຄ່າວາ ດັ່ງນັ້ນ ກົດໝາຍຈຶ່ງໄດ້ກຳນົດມາດຕະການລົງໂທດຕໍ່ບຸກຄົນດັ່ງກ່າວໄວ້ ໂດຍສະເພາະ ຜູ້ທີ່ເອົາຄວາມລັບຂອງລັດ ຫຼື ຄວາມລັບລັດຖະການ ຄວາມລັບຂອງບຸກຄົນໄປເປີດເຜີຍ ໃຫ້ບຸກຄົນທີ່ບໍ່ມີສ່ວນກ່ຽວຂ້ອງໄດ້ຮັບຮູ້ ໂດຍບໍ່ໄດ້ຮັບອະນຸຍາດກ່ອນ.
ລາຍລະອຽດຂອງມາດຕານີ້ ໄດ້ກຳນົດວ່າ ບຸກຄົນຜູ້ໃດທີ່ມີໜ້າທີ່ຮັບຜິດຊອບໃນການເກັບມ້ຽນ ຮັກສາ ນຳໃຊ້ເອກະສານກ່ຽວກັບຄວາມລັບຂອງລັດ ຫາກໄດ້ເປີດເຜີຍຄວາມລັບ ຫຼື ເຮັດໃຫ້ເສຍຄວາມລັບ ຫຼື ເຮັດໃຫ້ເອກະສານດັ່ງກ່າວເສຍຫາຍ.
ຖ້າແມ່ນຄວາມລັບທາງລັດຖະການ ກໍຈະຖືກລົງໂທດຕັດອິດສະຫຼະພາບແຕ່ 1 ປີ ຫາ 3 ປີ ແລະ ຈະຖືກປັບໃໝແຕ່ 3.000.000 ຫາ 20.000.000 ກີບ.
ຕົວຢ່າງ: ນາງ ຂໍ ເປັນພະນັກງານໃນອົງການຈັດຕັ້ງໃດໜຶ່ງ ທີ່ເຫັນເອກະສານທີ່ກ່ຽວຂ້ອງກັບການລົງວິໄນຕໍ່ທ້າວ ສົນ ແລ້ວຜູ້ກ່ຽວນຳເອົາໄປເປີດເຜີຍໃຫ້ບຸກຄົນອື່ນຮູ້ນຳ ໂດຍທີ່ອົງການຈັດຕັ້ງຂອງຜູ້ກ່ຽວຫ້າມບໍ່ໃຫ້ບຸກຄົນໃດ ຫາກນຳເອົາບັນຫາດັ່ງກ່າວອອກໄປເປີດເຜີຍພາຍນອກ.
ສ່ວນການລ່ວງລະເມີດຄວາມລັບສ່ວນຕົວຂອງບຸກຄົນນັ້ນ ຖ້າບຸກຄົນໃດຫາກໄດ້ເປີດເຜີຍຄວາມລັບສ່ວນຕົວຂອງຜູ້ອື່ນທີ່ຕົນໄດ້ຮູ້ຈັກ ໃນເວລາປະຕິບັດວຽກງານວິຊາສະເພາະ ຫຼື ໜ້າທີ່ ຊຶ່ງເປັນການກໍ່ຄວາມເສຍຫາຍແກ່ຜູ້ອື່ນນັ້ນ ຈະຖືກລົງໂທດຕັດອິດສະລະພາບແຕ່ 3 ເດືອນຫາ 6 ເດືອນ ແລະ ຈະຖືກປັບໃໝແຕ່ 3.000.000 ກີບຫາ 10.000.000 ກີບ ຕົວຢ່າງ: ທ້າວ ແຮດ ເປັນແພດຜ່າຕັດ ແລະ ປະສູດ ຜູ້ກ່ຽວອາດໄດ້ເຫັນທຸກຢ່າງໃນເວລາທຳການຜ່າຕັດ ແລະ ຜູ້ກ່ຽວໄດ້ເອົາສິ່ງທີ່ຕົນເຫັນນັ້ນ ໄປເວົ້າສູ່ຜູ້ອື່ນຟັງ ເຮັດໃຫ້ນາງ ຈຸ້ຍ ໄດ້ຮັບຄວາມເສຍຫາຍທາງດ້ານຊື່ສຽງ ແລະ ກຽດສັກສີຂອງຜູ້ກ່ຽວ.
ບຸກຄົນໃດຫາກໄດ້ລັກເປີດຈົດໝາຍ ຈົດໝາຍທາງເອເລັກໂຕຣນິກ ໂທລະເລກ ຫຼື ເອກະສານອື່ນ ຫຼື ລັກຟັງໂທລະສັບຂອງຜູ້ອື່ນ ຊຶ່ງເປັນການກໍ່ຄວາມເສຍຫາຍແກ່ຜູ້ອື່ນນັ້ນ ຈະຖືກລົງໂທດຕັດອິດສະລະພາບແຕ່ 3 ເດືອນຫາ 6 ເດືອນ ແລະ ຈະຖືກປັບໃໝແຕ່ 3.000.000 ຫາ 10.000.000 ກີບ.
ຕົວຢ່າງ: ທ້າວ ສອດ ເຫັນນາງ ຟອດ ລົມໂທລະສັບຢູ່ ທ້າວ ສອດ ຈຶ່ງຍ່າງບັງຕົ້ນໄມ້ຂ້າງນາງ ຟອດ ເພື່ອລັກຟັງການລົມໂທລະສັບຂອງນາງ ຟອດ ໃນເລື່ອງສ່ວນຕົວ ເມື່ອນາງ ຟອດ ຮູ້ຈຶ່ງຢຸດເຊົາ ທ້າວ ສອດ ໄດ້ນຳເອົາເລື່ອງທີ່ໄດ້ຍິນໄດ້ຟັງນັ້ນ ໄປເປີດເຜີຍໃຫ້ບຸກຄົນອື່ນຮູ້ ສະແດງວ່າ ທ້າວ ສອດ ຈະມີຄວາມຮັບຜິດຊອບຕາມມາດຕານີ້ ຖ້າຫາກນາງ ຟອດ ຫາກໄປແຈ້ງຄວາມ ເພື່ອໃຫ້ພາກສ່ວນກ່ຽວຂ້ອງດຳເນີນຄະດີຕໍ່ຜູ້ກ່ຽວ.
ໂດຍ: ໄມ້ງັດ