ເຖິງວ່າ “ໄຂມັນ” ເປັນໂທດຕໍ່ຮ່າງກາຍ ແຕ່ຍັງມີໄຂມັນອີກແບບທີ່ຈຳເປັນຕໍ່ຮ່າງກາຍຢູ່ ຄື ຖ້າຈະຈຳແນກຢ່າງງ່າຍໆ ຄື ມີ “ໄຂມັນດີ” ຫຼື ເອຊດີແອລ (HDL: High Density Lipoprotein) ແລະ “ໄຂມັນຮ້າຍ” ຫຼື ແອລດີແອລ (LDL: Low Density Lipoprotein)
ເຫັນແບບນີ້ກໍຢ່າໄດ້ງົງເດີ ເພາະຊື່ເອີ້ນກໍບອກຢູ່ແລ້ວວ່າ ອັນໃດທີ່ມີປະໂຫຍດ ຫຼື ອັນໃດທີ່ມີໂທດ ຊຶ່ງວັນນີ້ໝໍຈະມາແນະນຳໄຂມັນທີ່ມີປະໂຫຍດຕໍ່ຮ່າງກາຍ ຜ່ານອາຫານ ຫຼື ຂອງຮັບປະທານ 4 ຊະນິດທີ່ດີຕໍ່ຊີວິດ ແລະ ສຸຂະພາບ ມາເບິ່ງນຳກັນເລີຍດີກວ່າວ່າອັນໃດທີ່ຄວນກິນ ແດ່ເພື່ອໃຫ້ຮ່າງກາຍໄດ້ຮັບໄຂມັນດີ.
ໝາກຖົ່ວເປືອກແຂງ: ໝາກຖົ່ວເປືອກແຂງນັ້ນ ມີຫຼາຍຊະນິດຫຼາຍເທົ່າທີ່ຫຼາຍຄົນຮູ້ຈັກກັນດີກໍຢ່າງເຊັ່ນ: ອັລມອນ ວອລນັດ ພິສຕາຊິໂອ ຊຶ່ງຈາກການວິໄຈກໍໃຫ້ຂໍ້ມູນວ່າ ຖົ່ວເປືອກແຂງນັ້ນ ມີກົດໄຂມັນບໍ່ອີ່ມຕົວ ທີ່ບໍ່ພຽງແຕ່ຊ່ວຍຫຼຸດໄຂມັນຊະນິດບໍ່ດີ (LDL) ຊຶ່ງເປັນສາເຫດຄວາມສ່ຽງທີ່ອາດຈະເຮັດໃຫ້ເກີດພາວະຫຼອດເລືອດແດງແຂງໄດ້ ແຕ່ຍັງສາມາດເພີ່ມໄຂມັນດີ (HDL) ໃຫ້ກັບຮ່າງກາຍໄດ້ດ້ວຍ.
ນອກຈາກປະສິດທິພາບຕາມທີ່ວ່າມາແລ້ວ ຍັງມີຄຳແນະນຳວ່າ ຖ້າກິນຖົ່ວເປືອກແຂງໄດ້ວັນລະ 30 ກຣາມ ຄວບຄູ່ກັບການຮັບປະທານອາຫານທີ່ມີໄຍອາຫານຊະນິດລະລາຍນ້ຳ ກໍຈະສາມາດຊ່ວຍຫຼຸດຄໍເຣສເຕີຣອລໄດ້ຫຼາຍເຖິງ 30% ລວມທັງຫຼຸດຄວາມສ່ຽງໃນການເປັນໂລກຫົວໃຈໄດ້ເຊັ່ນກັນ ສັບພະຄຸນຂະໜາດນີ້ຈະເບິ່ງຂ້າມໄປໄດ້ຢ່າງໃດ.
ໝາກເດືອຍ: ມີຜົນວິໄຈລະບຸວ່າ ການຮັບປະທານໝາກເດືອຍແທນເຂົ້າຂັດຂາວເປັນເວລາຕິດຕໍ່ກັນ 4 ອາທິດນັ້ນ ສາມາດຊ່ວຍລະດັບໄຂມັນ LDL ໄດ້ ແຖມໄຍອາຫານທີ່ຢູ່ໃນໝາກເດືອຍຍັງມີສັບພະຄຸນຊ່ວຍຫຼຸດການດູດຊຶມໄຂ ມັນບໍ່ດີເຂົ້າສູ່ຮ່າງກາຍໄດ້ອີກດ້ວຍ ຫຼື ສຳລັບຄົນທີ່ຕ້ອງການຫຼຸດຄໍເລສເຕີຣອລໃນກະແສເລືອດ ໝາກເດືອຍກໍຊ່ວຍໄດ້ ທີ່ສຳຄັນເໜືອອື່ນໃດຄື ເປັນທັນຍະພືດທີ່ຫາກິນໄດ້ງ່າຍ ແລະ ນຳໄປເປັນສ່ວນປະສົມໃນອາຫານໄດ້ຫຼາກຫຼາຍຢ່າງ ຂຶ້ນຢູ່ກັບຄວາມມັກຂອງແຕ່ລະຄົນ.
ມີການສຶກສາໂດຍໃຫ້ຜູ້ທີ່ມີຄໍເລສເຕີຣອລສູງຈຳນວນ 40 ຄົນ ຮັບປະທານໝາຍເດືອຍວັນລະ 60 ກຣາມ ເປັນເວລາ 4 ອາທິດ ພົບວ່າຜູ້ເຂົ້າຮ່ວມການທົດລອງມີລະດັບຄໍເລສເຕີຣອລລວມ ແລະ ຄໍເລສເຕິຣອລຊະນິດທີ່ບໍ່ດີ (LDL) ຫຼຸດຕ່ຳລົງ (pobpad.com).
ຄວິນົວ (Quinoa): ຄຸນສົມບັດຂອງທັນຍະພືດຈາກແຖບຖິ່ນອາເມຣິກາໃຕ້ ແລະ ອາເມຣິກາໃຕ້ຊະນິດນີ້ ສານອາຫານເຫຼືອລົ້ນ ທັງໂປຣຕີນ ການຊຽມ ຟົສຟໍຣັສ ແມກນີຊຽມ ທາດເຫຼັກ ລວມທັງໄຟເບີ ແລະ ສານຕໍ່ຕ້ານອະນຸມູນອິດສະຫຼະ ແຕ່ທີ່ຈະລືມເວົ້າເຖິງບໍ່ໄດ້ເດັດຂາດກໍຄື “ໄຂມັນດີ” ທັງກົດໄຂມັນຈຳເປັນທີ່ຮ່າງກາຍບໍ່ສາມາດສັງເຄາະເອງໄດ້ (Essential Fatty Acids) ກົດໄຂມັນໄລໂນເລອິກ (Linoleic Acid) ຫຼືກົດໂອເມກາ 6 ທີ່ມີສ່ວນຊ່ວຍປ້ອງກັນ ບໍ່ໃຫ້ຄໍເລສເຕີຣອລໄປເກາະຕົວສະສົມ ຢູ່ທີ່ຜະໜັງຫຼອດເລືອດ ຊ່ວຍຕໍ່ສູ້ກັບໂລກຫົວໃຈ ນອກຈາກນີ້ ຄວິນົວຍັງມີກົດໄຂມັນໂອເມກາ 3 ຊຶ່ງເປັນໄຂມັນຊະນິດດີ ມີປະໂຫຍດຕໍ່ຮ່າງກາຍ.
ວິທີຮັບປະທານຄວິນົວ ສາມາດເຮັດໄດ້ຫຼາຍວິທີ ບໍ່ວ່າຈະເປັນການຫຸງຄືກັບຫຸງເຂົ້າແລ້ວກິນແທນເຂົ້າໄດ້ເລີຍ ຫຼື ຫຸງຮ່ວມກັບເຂົ້າ ແລະ ທັນຍະພືດຊະນິດອື່ນໆ ສ່ວນທີ່ນິຍົມອີກຢ່າງ ກໍຄື ນຳຄວິນົວໄປເປັນສ່ວນປະສົມໃນອາຫານຊະນິດຕ່າງໆ ທັງຂົ້ວເຂົ້າ ເຂົ້າອົບ ເຂົ້າປຽກ ເຂົ້າຕຸ໋ນ ຫຼື ສຸດແທ້ແຕ່ໃຜຈະສ້າງສັນອາຫານ ເພື່ອຄຸນຄ່າທາງໂພຊະນາການທີ່ເພີ່ມຂຶ້ນ.
ອະໂວຄາໂດ: ຈາກແຫຼ່ງກຳເນີດໃນປະເທດເມັກຊິກ ດຽວນີ້ “ອະໂວຄາໂດ” ກາຍເປັນໝາກໄມ້ທີ່ຄົນລາວເຮົາຫາກິນໄດ້ງ່າຍ ອີກທັງລາຄາກໍບໍ່ແພງປານໃດ ແລະ ຂ່າວດີຫຼາຍໆ ກໍຄື ມັນເປັນໝາກໄມ້ທີ່ມີໄຂມັນດີສູງຫຼາຍ ໂດຍໄຂມັນດີທີ່ວ່ານີ້ ເປັນໄຂມັນຊະນິດບໍ່ອີ່ມຕົວ ຊ່ວຍຫຼຸດລະດັບຄໍເລສເຕີຣອລໃນຮ່າງກາຍໄດ້ ແລະ ຝາກໄວ້ອີກໜ້ອຍໜຶ່ງ ສຳລັບຜູ້ທີ່ຢາກຫຼຸດ ຫຼື ຄວບຄຸມນ້ຳໜັກ ອະໂວຄາໂດຈະຊ່ວຍເລື່ອງນີ້ໄດ້ເປັນຢ່າງດີເລີຍ ເພາະເຖິງແມ່ນອະໂວຄາໂດຈະເປັນໝາກໄມ້ທີ່ໃຫ້ພະລັງງານສູງ ແຕ່ນ້ຳຕານຕ່ຳຫຼາຍ ຜູ້ປ່ວຍເບົາຫວານກໍຮັບປະທານໄດ້ແບບບໍ່ຕ້ອງກັງວົນ.
ວ. ດາລາວົງ – ນຳສະເໜີ