ບໍລິສັດ ຊືເຟິງ ລ້ານຊ້າງ ມີເນໂຣນສ໌ ລິມິເຕັດ (LXML) ບໍ່ຄຳ-ທອງເຊໂປນ ໄດ້ຮັບລາງວັນທຸລະກິດອາຊຽນດີເດັ່ນ ສຳລັບຜົນງານໃນການສະກັດກັ້ນການລະບາດພະຍາດໂຄວິດ-19 ເຊິ່ງມອບຮັບລາງວັນດັ່ງກ່າວ ຈັດຂຶ້ນເມື່ອວັນທີ 13 ພະຈິກ 2020 ຢູ່ກອງປະຊຸມສຸດຍອດທຸລະກິດ ແລະ ການລົງທຶນອາຊຽນ 2020 (ABIS 2020) ຢູ່ນະຄອນຫຼວງຮ່າໂນ້ຍ ສສ ຫວຽດນາມ.
ລາງວັນດັ່ງກ່າວ ຮັບຮູ້ທຸລະກິດດີເດັ່ນໃນພາກພື້ນທີ່ໄດ້ປະກອບສ່ວນຕໍ່ການປ້ອງກັນການລະບາດພະຍາດໂຄວິດ-19 LXML ຖືກຄັດເລືອກຈາກຫຼາຍຮ້ອຍຫົວໜ່ວຍທຸລະກິດ ແລະ ນັກລົງທຶນໃນພາກພື້ນ.
LXML ໄດ້ລິເລີ່ມແຜນງານປ້ອງກັນຕ່າງໆແຕ່ເດືອນມັງກອນ ກ່ອນພະຍາດໂຄວິດ-19 ເຂົ້າມາແຜ່ໃນ ສປປ ລາວ ແຜນງານປ້ອງກັນດັ່ງກ່າວ ລວມມີລະບຽບການຄວບຄຸມ ການສື່ສານ ແລະ ປູກຈິດສຳນຶກກ່ຽວກັບພະຍາດ ແລະ ວິທີການປ້ອງກັນ ການຈຳກັດ-ເວັ້ນໄລຍະຫ່າງໃນໂອກາດຕ່າງໆ ແລະ ໄດ້ສຸມໃສ່ສົ່ງເສີມການປ່ຽນແປງດ້ານວັດທະນະທຳ ແລະ ພຶດຕິກຳ ເພື່ອໃຫ້ສອດຄ່ອງກັບວິທີການດຳລົງຊີວິດແບບໃໝ່ ທີ່ມີການປ່ຽນແປງໄປເລື້ອຍໆ ຍ້ອນຄວາມພະຍາຍາມ ແລະ ການລິເລີ່ມແຜນງານເຫຼົ່ານີ້ LXML ຈຶ່ງເປັນ 1 ໃນ 5 ບໍລິສັດ ທີ່ໄດ້ຮັບອະນຸຍາດໃຫ້ສືບຕໍ່ດຳເນີນກິດຈະການໃນໄລຍະປິດການເຂົ້າອອກໃນ ສປປ ລາວ ໂດຍຮ່ວມມືກັບລັດຖະບານ LXML ໄດ້ສະໜອງການສະໜັບສະໜູນ 170.000 ໂດລາສະຫະລັດ ສຳລັບວຽກງານສະກັດກັ້ນພະຍາດໂຄວິດ-19 ໂດຍ LXML ສືບຕໍ່ມຸ່ງໝັ້ນສະໜັບສະໜູນຄວາມພະຍາຍາມຂອງລັດຖະບານ ໃນການສະກັດກັ້ນການລະບາດຂອງພະຍາດໂຄວິດ-19 ແລະ ສືບຕໍ່ມຸ່ງໝັ້ນໃນການຮັກສາພະນັກງານຂອງບໍລິສັດ ແລະ ຊຸມຊົນໃຫ້ປອດໄພຈາກພະຍາດດັ່ງກ່າວ.
# ຂ່າວ & ພາບ: ສະບາໄພ