ຫາກເປັນຜູ້ສັງເກດຈະເຫັນວ່າ ຢູ່ນະຄອນຫຼວງວຽງຈັນເຮົານີ້ ການຄຸ້ມຄອງບໍລິຫານຫຼາຍຢ່າງເພິ່ນມີນິຕິກຳຫຼາຍແທ້ໃດ ? ເປັນຕົ້ນແມ່ນຂໍ້ຕົກລົງ ແຈ້ງການຕ່າງໆ ເຊິ່ງວ່າງມໍ່ໆມານີ້ກໍມີການຄວບຄຸມສຽງເນືອງນັນ ແຕ່ກໍຕ້ອງຍອມຮັບວ່າ ການຈັດຕັ້ງປະຕິບັດບໍ່ຄ່ອຍໄດ້ຮັບຜົນສູງສຸດນໍ ? ກ່ຽວກັບເລື່ອງນີ້ ພວກເຮົາຕ້ອງເຂົ້າໃຈນຳກັນວ່າ ມັນພົວພັນກັບຫຼາຍຝ່າຍ ກໍຄືດຽວກັນກັບເລື່ອງການເຮັດສຳມະໂນໃໝ່ ບັດປະຈຳຕົວໃໝ່ ທີ່ດຳເນີນຢູ່ບາງບ້ານ ບາງເມືອງ ເກີດມີຫາງສຽງເລື່ອງການເກັບຄ່າທຳນຽມຕ່າງໆ ທັ້ງໆທີ່ການຈັດຕັ້ງເພິ່ນມີແຈ້ງການອອກມາແລ້ວ…ແຕ່ເວລາລົງໄປເຮັດວຽກ ພະນັກງານເຮົາບາງຈຸດ… ບາງບ່ອນກໍບໍ່ແຈ້ງລະອຽດ ເລື່ອງລາຄາຄ່າທຳນຽມເອົາແຕ່ຊິເກັບ… ປະຊາຊົນກໍບໍ່ທ້ວງ ມີແຕ່ຈົ່ມ… ກາຍເປັນບັນຫາຊ້ຳເຮື້ອ ທັງໆທີ່ເປັນສິດທິຂອງພົນລະເມືອງທີ່ຕ້ອງທ້ວງຕ້ອງເຕືອນ ຫາກເຫັນວ່າມີການກະທຳລະເມີດນິຕິກຳກ່ຽວຂ້ອງ.
ປະທານ ໄກສອນ ພົມວິຫານ ເຄີຍກ່າວໄວ້ວ່າ:… ບັນຫາການຈັດຕັ້ງປະຕິບັດ ທັງເປັນວິທະຍາສາດ ທັງເປັນສິລະປະ ມັນເປັນວິທະຍາສາດ ກໍຍ້ອນວ່າ ຢາກຈັດຕັ້ງປະຕິບັດໄດ້ດີ ແມ່ນຕ້ອງເຊື່ອມຊຶມແນວທາງ ແລະ ທັດສະນະຂອງພັກ ຕ້ອງກຳສະພາບຕົວຈິງໃຫ້ຊັດເຈນ ຮູ້ໄຈ້ແຍກສະພາບການຕົວຈິງຢ່າງສັດຈະວິພາກ ຈາກນັ້ນ ຈຶ່ງຈະສາມາດວາງແຜນນະໂຍບາຍ ໂຄງການເຄື່ອນໄຫວ ແລະ ເລືອກເອົາໂຄງການທີ່ດີເລີດໄດ້ ໝາຍຄວາມວ່າ ໂຄງການທີ່ສິ້ນເປືອງແຮງງານໜ້ອຍສຸດ ແຕ່ຫາກບັນລຸປະສິດທິຜົນສູງສຸດບົນພື້ນຖານດັ່ງກ່າວນັ້ນ ຈຶ່ງຈັດວາງສັບຊ້ອນກຳລັງເຂົ້າສູ່ການກະທຳຕົວຈິງ.
ບັນຫາຈັດຕັ້ງປະຕິບັດ ເປັນສິລະປະ ກໍຍ້ອນວ່າ ໃນເມື່ອໄດ້ວາງແຜນນະໂຍບາຍ ໂຄງການ ແລະ ຈັດວາງກຳລັງແລ້ວ ຕ້ອງຮູ້ຈັກກຳເອົາກາລະໂອກາດທີ່ອຳນວຍ ເພື່ອເຄື່ອນໄຫວໃຫ້ຖືກກັບກາລະໂອກາດນັ້ນ ຕ້ອງຮູ້ນຳໃຊ້ ຮູ້ສົມທົບທຸກກຳລັງ ແລະ ການເຄື່ອນໄຫວທຸກດ້ານຢ່າງເຂົ້າແກ໊ບເຂົ້າເກຍ ແລະ ເປັນຈັງຫວະດຽວກັນ ຮູ້ວາງນະໂຍບາຍໄມ້ງັດອອກ ໂດຍກຳແໜ້ນບັນດາການພົວພັນທາງຜົນປະໂຫຍດ ເພື່ອປຸກລະດົມມະຫາຊົນ ຊຸກຍູ້ຂະບວນການໃນແຜນການເຄື່ອນໄຫວນັ້ນ ຕ້ອງມີການກຳນົດອັນໃດເປັນຈຸດໜັກ ອັນໃດເປັນຈຸດທົ່ວໄປ ແລະ ຕ້ອງຮູ້ຊອກ ຮູ້ສ້າງແບບຢ່າງ ແລະ ແຜ່ຂະຫຍາຍແບບຢ່າງນັ້ນອອກຢ່າງກວ້າງຂວາງ… (ໄກສອນ ພົມວິຫານ ນິພົນເລືອກເຟັ້ນເຫຼັ້ມ 3 ໜ້າທີ 120-121) ທຸກມະຕິຄຳສັ່ງ ຂໍ້ຕົກລົງ ແຈ້ງການຕ່າງໆຂອງພັກ ລວມເຖິງກົດໝາຍ ແລະ ນິຕິກຳລຸ່ມກົດໝາຍຂອງລັດ ລ້ວນແລ້ວແຕ່ມີມາດຕະການຈັດຕັ້ງປະຕິບັດ ຜ່ານການຈັດຕັ້ງປະຕິບັດ ຈຶ່ງສາມາດຖອດຖອນບົດຮຽນເພື່ອເພີ່ມເຕີມ ແລະ ບູລະນະຢ່າງບໍ່ຢຸດຢັ້ງ ພ້ອມທັງຢຶດໝັ້ນໃນການຈັດຕັ້ງປະຕິບັດໃຫ້ປາກົດຜົນເປັນຈິງ.
ໂດຍ: ແນວລາວ