ວັນທີ 30 ຕຸລາ 2020 ທ່ານ ເລັດ ໄຊຍະພອນ ເຈົ້າແຂວງອັດຕະປື ເນັ້ນໃຫ້ຄະນະນຳຄູເຝິກ ແລະ ນັກກີລາແຂວງອັດຕະປື ມີຄວາມຕັ້ງໃຈ ແລະ ຕັດສິນໃຈສູງ ເປັນເຈົ້າການນຳກັນທຸກດ້ານ ໂດຍສະເພາະ ມີຄວາມສາມັກຄີເປັນເລີດ ມີລະບຽບວິໄນ ນັບຖືການຈັດຕັ້ງ ເຊີດຊູນ້ຳໃຈຄວາມເປັນນັກກີລາໃຫ້ສູງສົ່ງ ເຂົ້າໃຈເປົ້າໝາຍລວມ ອົດທົນ ເດັດດ່ຽວ ແລະ ພ້ອມກັນກ້າວໄປສູ່ໄຊຊະນະຢ່າງມີສັກສີ ໃນການເຂົ້າຮ່ວມການແຂ່ງຂັນບານເຕະທົ່ວປະເທດ ເພື່ອຄຳນັບຮັບຕ້ອນວັນຊາດ ຄົບຮອບ 45 ປີ ຈັດຂຶ້ນຢູ່ນະຄອນຫຼວງວຽງຈັນ ວັນທີ 6-21 ພະຈິກ 2020.
ທ່ານ ສົມໄຊ ແກ້ວມະນີວັນ ຮອງປະທານສະຫະພັນກີລາບານເຕະແຂວງອັດຕະປື ໄດ້ລາຍງານການກະກຽມຄວາມພ້ອມ ເຂົ້າຮ່ວມງານແຂ່ງຂັນບານເຕະທົ່ວປະເທດຄັ້ງນີ້ວ່າ: ປັດຈຸບັນ ສະຫະພັນກີລາບານເຕະແຂວງມີຄວາມພ້ອມທຸກດ້ານ 100% ພາຍຫຼັງທີ່ໄດ້ມີການດຳເນີນການຄັດເລືອກເອົາຕົວນັກກີລາທີ່ດີເດັ່ນ ແລະ ມີພອນສະຫວັນໄດ້ຕາມກຳນົດ ຈາກ 5 ຕົວເມືອງພາຍໃນແຂວງ ພ້ອມທັງໄດ້ດຳເນີນການເຝິກຊ້ອມ ຢ່າງຖືກຕາມຫຼັກການວິທະຍາສາດການກີລາທຸກປະການ ເຊິ່ງການເຂົ້າຮ່ວມຄັ້ງນີ້ ແຂວງຕັ້ງເປົ້າຈະພະຍາຍາມ ສູ້ຊົນໃຫ້ຜ່ານເຂົ້າເຖິງຮອບ 8 ທີມສຸດທ້າຍ ຫຼັງຜົນການຈັບສະຫຼາກແບ່ງກຸ່ມປາກົດວ່າ ນັກເຕະແຂວງອັດຕະປື ຖືກຈັດຢູ່ກຸ່ມ C ຮ່ວມກັບແຂວງຫຼວງນ້ຳທາ ໄຊຍະບູລີ ແລະ ແຂວງຫຼວງພະບາງ.