ບໍລິສັດ ລາວວິວັດປະກັນໄພ ຈຳກັດ ໄດ້ຈັດເຜີຍແຜ່ໃຫ້ຄວາມຮູ້ດ້ານປະກັນໄພ ໃຫ້ນັກສຶກສາຄະນະກະເສດສາດ ມະຫາວິທະຍາໄລແຫ່ງຊາດ ຂຶ້ນໃນທ້າຍອາທິດທີ່ຜ່ານມາ ທີ່ຄະນະດັ່ງກ່າວ ມີທ່ານ ທອງອຸ້ມ ອິນທະພອນ ຮອງຄະນະບໍດີຄະນະກະເສດສາດ ທ່ານ ພົງສະພົດ ປ່ຽມຈະເລີນ ຜູ້ອຳນວຍການບໍລິສັດລາວວິວັດປະກັນໄພຈຳກັດ ພ້ອມດ້ວຍພະນັກງານ ແລະ ນັກສຶກສາເຂົ້າຮ່ວມ.
ການຈັດເຜີຍແຜ່ດັ່ງກ່າວ ໄດ້ຈັດຂຶ້ນເພື່ອໃຫ້ຄວາມຮູ້ພື້ນຖານທີ່ສຳຄັນຕໍ່ການດຳເນີນຊີວິດ ເພື່ອໃຫ້ຄຳປຶກສາດ້ານການປະກັນໄພທີ່ເໝາະສົມແກ່ນັກສຶກສາ ເພື່ອແນະນຳການບໍລິການຂອງລາວວິວັດປະກັນໄພ ທີ່ມີຄວາມຊ່ຽວຊານໃນການເບິ່ງແຍງດ້ານສຸຂະພາບ ເຊິ່ງເຮັດໃຫ້ລູກຄ້າໄດ້ຮັບຄວາມອຸ່ນໃຈຈາກການເບິ່ງແຍງ ແລະ ການບໍລິການທີ່ວ່ອງໄວ ສະດວກ ເປັນການມອບສິດທິພິເສດໃຫ້ກັບຜູ້ທີ່ສົນໃຈ ໃນການວາງແຜນທາງການເງິນດ້ວຍການປະກັນໄພຈາກບໍລິສັດດັ່ງກ່າວ ນັ້ນກໍເພື່ອແນໃສ່ໃຫ້ນັກສຶກສາມີຄວາມຮູ້ໃນການວາງແຜນທາງການເງິນ ເປັນພື້ນຖານທີ່ມີຄວາມສຳຄັນໃນການດຳເນີນຊີວິດ.
ການປະກັນໄພ (Insurance) ຄື ການບໍລິຫານຄວາມສ່ຽງໄພວິທິໜຶ່ງ ເຊິ່ງໂອນຄວາມສ່ຽງໄພຈາກຜູ້ເອົາປະກັນໄພ ໄປສູ່ບໍລິສັດຜູ້ຮັບປະກັນໄພ ໂດຍເຮັດສັນຍາການຄຸ້ມຄອງໃນສັນຍາປະກັນໄພ ແລະ ຜູ້ເອົາປະກັນໄພຕ້ອງຈ່າຍຄ່າທຳນຽມປະກັນໄພໃຫ້ກັບບໍລິສັດຜູ້ຮັບປະກັນ ເມື່ອເກີດຄວາມເສຍຫາຍ ຜູ້ຮັບປະກັນໄພຈະຊົດໃຊ້ຄ່າສິນທົດແທນປະກັນໄພຕາມທີ່ໄດ້ລະບຸການຄຸ້ມຄອງໄວ້ໃນສັນຍາປະກັນໄພ ຕາມສັນຍາທີ່ໄດ້ຕົກລົງກັນໄວ້ ໃນການວາງແຜນທາງການເງິນ ຄວນຄຳນຶງເຖິງຄວາມສ່ຽງໄພທີ່ອາດເກີດຂຶ້ນໃນອະນາຄົດ ເຊິ່ງເປັນສາເຫດໜຶ່ງ ທີ່ມີຜົນກະທົບຕໍ່ລະບົບການວາງແຜນທາງການເງິນຂອງບຸກຄົນ.
# ພາບ & ຂ່າວ: ເພັດສະໝອນ