ສະຫາຍ ທອງລຸນ ສີສຸລິດ ກຳມະການກົມການເມືອງສູນກາງພັກ ນາຍົກລັດຖະມົນຕີ ເຂົ້າຮ່ວມກອງປະຊຸມດຳເນີນຊີວິດການເມືອງພາຍໃນ ຄະນະບໍລິຫານງານພັກແຂວງສະຫວັນນະເຂດ ທ້າຍສະໄໝທີ VIII ວັນທີ 21-22 ຕຸລາ 2020 ໂດຍມີສະຫາຍ ສັນຕິພາບ ພົມວິຫານ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສະຫວັນນະເຂດ ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.
ສະຫາຍ ທອງລຸນ ສີສຸລິດ ໄດ້ສະແດງຄວາມຊົມເຊີຍຕໍ່ຜົນສຳເລັດອັນພົ້ນເດັ່ນ ຈາກການຊີ້ນຳ-ນຳພາຂອງຄະນະບໍລິຫານງານພັກແຂວງ ໂດຍສະເພາະ ການເຕົ້າໂຮມຄວາມສາມັກຄີ ການປະຕິບັດວຽກງານ ປກຊ-ປກສ ການພັດທະນາເສດຖະກິດ-ສັງຄົມ ການພັດທະນາຊົນນະບົດ ການແກ້ໄຂໄພພິບັດນ້ຳຖ້ວມ ການປ້ອງກັນ ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ແລະ ອື່ນໆ.
ນອກນີ້ ຍັງໄດ້ຊີ້ນຳໃຫ້ບັນດາສະຫາຍໃນຄະນະບໍລິຫານງານພັກແຂວງ ນຳໄປຄົ້ນຄວ້າ ແລະ ພ້ອມກັນຈັດຕັ້ງປະຕິບັດ ເປັນຕົ້ນ ຕ້ອງກຳແໜ້ນຈຸດປະສົງ ແລະ ເປົ້າໝາຍໃນການດຳເນີນຊີວິດການເມືອງຄັ້ງນີ້ ລວມທັງການກະກຽມບຸຄະລະກອນ ເພື່ອສືບຕໍ່ລົງສະໝັກຮັບເລືອກຕັ້ງເຂົ້າໃນຄະນະບໍລິຫານງານພັກແຂວງຊຸດໃໝ່ ໃຫ້ຮັບປະກັນທັງ 3 ຮຸ່ນ ເພດ ແລະ ເຜົ່າ ຄົ້ນຄວ້າຢ່າງເລິກເຊິ່ງ ແລະ ປະກອບຄຳຄິດເຫັນຕໍ່ຮ່າງບົດສຳຫຼວດ ການນຳພາລວມຂອງຄະນະບໍລິຫານງານພັກແຂວງ ໂດຍສະເພາະ ໄຈ້ແຍກໃຫ້ເຫັນຜົນສຳເລັດ ຈຸດດີ ຈຸດອ່ອນ ຂໍ້ຄົງຄ້າງ ສາເຫດ ບົດຮຽນທີ່ຖອດຖອນໄດ້ ແລະ ທິດທາງປັບປຸງແກ້ໄຂໃນຕໍ່ໜ້າ ສຸມໃສ່ລົງເລິກຕີລາຄາຕົນເອງດ້ານຄຸນທາດການເມືອງ ຄຸນສົມບັດສິນທຳປະຕິວັດ ຄວາມຮັບຜິດຊອບຕໍ່ໜ້າທີ່ການເມືອງ ຄວາມຮູ້-ຄວາມສາມາດ ສະຕິຕໍ່ການຈັດຕັ້ງ ຄວາມເປັນແບບຢ່າງນຳໜ້າ ແບບແຜນວິທີເຮັດວຽກ ແບບແຜນການດຳລົງຊີວິດ ແລະ ອື່ນໆ ພ້ອມນີ້ ກໍໃຫ້ໝູ່ຄະນະມີຄຳເຫັນຕຳນິສົ່ງຂ່າວ ເພື່ອກໍ່ສ້າງເຊິ່ງກັນ ແລະ ກັນ ຖືກຕ້ອງກັບຄວາມເປັນຈິງ.
# ຂ່າວ & ພາບ: ສະບາໄພ