ທ່ານນາງ ເກດມະນີ ບັນດາສັກ ຄະນະປະຈຳ ປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນນະຄອນຫຼວງວຽງຈັນ (ຄວສຜ ສປ ນວ) ພ້ອມຄະນະ ລົງຢ້ຽມຢາມ ແລະ ຊຸກຍູ້ການຈັດຕັ້ງປະຕິບັດວຽກງານຢູ່ໂຮງຮຽນກຽດຕິສັກນາໆຊາດ ວັນທີ 21 ຕຸລາ 2020 ໂດຍໄດ້ຮັບການຕ້ອນຮັບຈາກທ່ານນາງ ຈັນສະຫງ່າ ວາລະກອນ ຜູ້ອຳນວຍການໂຮງຮຽນດັ່ງກ່າວ ແລະ ພາກສ່ວນກ່ຽວຂ້ອງ.
ທ່ານນາງ ຈັນແດງ ແສງວໍລະວົງ ຮອງຜູ້ອຳນວຍການໂຮງຮຽນກຽດຕິສັກນາໆຊາດ ໄດ້ລາຍງານວ່າ: ໂຮງຮຽນກຽດຕິສັກນາໆຊາດ ໄດ້ຮັບອະນຸຍາດຈາກກະຊວງສຶກສາທິການ ແລະ ກີລາ ໃຫ້ເປີດສອນຫຼັກສູດ ນາໆຊາດ ແລະ ຫຼັກສູດແຫ່ງຊາດ ແຕ່ຂັ້ນອະນຸບານ-ປະຖົມ-ມັດທະຍົມສົມບູນ ສົກຮຽນ 2019-2020 ມີຄູ-ອາຈານ 154 ຄົນ ໃນນີ້ ຄູຄົນລາວ 66 ຄົນ ຄູຕ່າງປະເທດ 88 ຄົນ ແລະ ພະນັກງານອື່ນໆ 39 ຄົນ ມີນັກຮຽນ 1.221 ຄົນ ໃນນີ້ ຊັ້ນອະນຸບານ 148 ຄົນ ຊັ້ນປະຖົມ 479 ຄົນ ESL 26 ຄົນ ESC 84 ຄົນ ແລະ ຊັ້ນມັດທະຍົມ 484 ຄົນ ການຮຽນສ່ວນໃຫຍ່ແມ່ນຮຽນເປັນຫຼັກສູດນາໆຊາດ ນອກນີ້ ຍັງເປັນສູນສອບເສັງຂອງແຄມບຣິດ ຫຼັກສູດພາສາອັງກິດລະດັບ ມ ຕົ້ນ-ມ ປາຍ ແລະ ໄດ້ສອນ A/AS ເຊິ່ງສອນລະດັບກຽມເຂົ້າມະຫາວິທະຍາໄລ ແລະ ເປັນໂຮງຮຽນແຫ່ງດຽວທີ່ໄດ້ຮັບອະນຸຍາດໃຫ້ເປັນສູນກາງສອບເສັງເພື່ອວັດລະດັບພາສາອັງກິດ YLE KET PET FCE CEP CAE.
ສົກຮຽນ 2019-2020 ໄດ້ເປີດສອນວິຊາສະແຕມໂຣໂບຕິກ (ນະວັດຕະກຳຫຸ່ນຍົນ) ໃຫ້ນັກຮຽນຊັ້ນມັດທະຍົມ ເພື່ອຊ່ວຍໃຫ້ເຂົາເຈົ້າໄດ້ຮຽນວິຊາວິທະຍາສາດ ເຕັກໂນໂລຢີ ວິສະວະກຳ ແລະ ຄະນິດສາດງ່າຍຂຶ້ນ ໃນໄລຍະການແຜ່ລະບາດຂອງພະຍາດໂຄວິດ-19 ຄູ-ອາຈານ ໄດ້ກະກຽມການຮຽນ-ການສອນໃຫ້ນັກຮຽນຂອງຕົນທັງພາຍໃນ ແລະ ຕ່າງປະເທດທີ່ບໍ່ສາມາດກັບຄືນມາຮຽນຢູ່ໂຮງຮຽນໄດ້ ຜ່ານສື່ອອນລາຍຫຼາຍຊ່ອງທາງ ເປັນຕົ້ນ WhatsApp Zoom ClassDojo Google Classroom ແລະ ອື່ນໆ ພ້ອມນີ້ ຍັງໄດ້ກະກຽມຄວາມພ້ອມໃນການເປີດການຮຽນ-ການສອນແບບອອນລາຍໃຫ້ນັກຮຽນທຸກຊັ້ນ ຫາກເກີດມີການລະບາດຂອງພະຍາດໂຄວິດ-19 ຄັ້ງໃໝ່.
# ຂ່າວ & ພາບ: ສະບາໄພ