ທ່ານ ຈັນທະວົງ ປັນຍາສິລິ ເລຂາທິການສະຫະພັນເທຄວັນໂດແຫ່ງຊາດລາວ ແຈ້ງໃຫ້ຊາບເມື່ອບໍ່ດົນມານີ້ ວ່າ: ເບື້ອງຕົ້ນສະຫະພັນເທຄວັນໂດແຫ່ງຊາດລາວ ຈະປະຕິບັດຕາມແຜນການເຄື່ອນໄຫວແຂ່ງຂັນ ເພື່ອພັດທະນາທັບນັກກີລາເທຄວັນໂດ ທັງຮຸ່ນສືບທອດ ແລະ ຮຸ່ນທົ່ວໄປ ປະຈຳປີ 2020 ເພື່ອສະສົມຄະແນນໃຫ້ນັກກີລາ ສາມາດສ້າງເງື່ອນໄຂເຂົ້າຮ່ວມຄັດເລືອກນັກກີລາທີ່ມີພອນສະຫວັນ ກ້າວຂຶ້ນໄປທົດແທນນັກກີລາທີມຊາດ ໂດຍສະເພາະຈະຈັດການແຂ່ງຂັນລາຍການ ເບຍລາວ ໂອເພັນ ໃນເດືອນກຸມພາ 2020 ແຕ່ຍ້ອນພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ (COVID-19) ທີ່ກຳລັງແຜ່ລະບາດຢ່າງໜັກໜ່ວງໃນທົ່ວໂລກ ຈຶ່ງຈຳເປັນຕ້ອງເລື່ອນການແຂ່ງຂັນອອກໄປຈັດໃນເດືອນກໍລະກົດ 2020 ນອກຈາກລາຍການດັ່ງກ່າວແລ້ວ ໃນທ້າຍປີ 2020 ກໍຍັງຈະສືບຕໍ່ຈັດການແຂ່ງຂັນເທຄວັນໂດທົ່ວປະເທດ ຊີງຂັນທ່ານເອັກອັກຄະລັດຖະທູດ ສ ເກົາຫຼີ ຕື່ມອີກ.
ການແຂ່ງຂັນເທຄວັນໂດ 2 ລາຍການໃຫຍ່ ລະດັບຊາດດັ່ງກ່າວ ຄາດວ່າຈະມີນັກກີລາພາຍໃນ ແລະ ຕ່າງປະເທດເຂົ້າຮ່ວມຢ່າງຫຼວງຫຼາຍ ເຊິ່ງຄາດວ່າການແຂ່ງຂັນທັງ 2 ລາຍການ ຈະມີການຊີງໄຊກັນ 120 ກວ່າລາຍການ ຈາກປະເພດຕໍ່ສູ້ປ້ອງກັນຕົວ ແລະ ປະເພດຟ້ອນປຸ່ມເຊ້ ທັງຮຸ່ນອະນຸຊົນ ເຍົາວະຊົນ ແລະ ທົ່ວໄປ ນອກນີ້ພວກເຮົາຍັງຈະສືບຕໍ່ເຝິກຊ້ອມນັກກີລາທີມຊາດ ແຕ່ລະຮຸ່ນຢ່າງເປັນປົກກະຕິ ແລະ ກຽມເປັນເຈົ້າການຈັດການແຂ່ງຂັນມະຫະກຳກີລາແຫ່ງຊາດ ຄັ້ງທີ XI.